Иштирок дар интихобот - масъулияти ҳар як ҷавони зодаи даврони Истиқлол

Интихобот   рукни  асосии  низоми  демократӣ  буда,  василаи муҳим барои ифодаи иродаи мардум ба ҳисоб меравад. Дар Тоҷикистон  ҳамчун  давлати  соҳибистиқлол,  интихобот  на танҳо  ҳуқуқ,  балки  вазифаи  шаҳрвандон  низ  мебошад.  Иштироки  фаъолона  дар  интихобот  нишон  медиҳад,  ки  шаҳрвандон аз ҳадафҳо ва сиёсати кишвар огоҳ буда, барои рушди устувор масъулиятшинос ҳастанд.

Пешвои  миллат  муҳтарам Эмомалӣ  Раҳмон  борҳо  таъкид  намудаанд,  ки  мо  бояд  ҷавононро  дар рӯҳияи  ватандӯстӣ,  эҳтиром  ба  қонун ва  иштироки  фаъолона  дар  корҳои ҷамъиятӣ  тарбия  кунем,  то  онҳо  дар оянда  пуштибони  воқеии  давлат  ва миллат шаванд.

Ҷавонон  беш  аз  60%-и  аҳолии Тоҷикистонро  ташкил  медиҳанд. Ин  омор  нишон  медиҳад,  ки  нақши ҷавонон  дар  равандҳои  сиёсӣ  ва иҷтимоӣ, аз ҷумла дар интихобот, хеле муҳим  аст.  Дар  шароити  ҷаҳони  муосир,  ки  чолишҳои  сиёсӣ,  иқтисодӣ  ва экологӣ  афзоиш  ёфтаанд,  иштироки ҷавонон дар интихобот на танҳо ҳаққи конститутсионӣ,  балки  нишонаи  зиракии сиёсӣ ва иродаи устувори онҳо мебошад.

Таҳлилҳои  байналмилалӣ  нишон медиҳанд, ки кишварҳое, ки дар онҳо шаҳрвандон, бахусус ҷавонон, дар интихобот фаъолона иштирок мекунанд, ба  рушди  устувори  иқтисодӣ  ва  сиёсии худ ноил мешаванд. Масалан, дар Скандинавия  иштироки  шаҳрвандон дар интихобот ба 80-90% мерасад, ки ин ба сатҳи баланди зиндагӣ ва суботи сиёсии ин кишварҳо мусоидат намудааст.

Муҳтарам  Эмомалӣ  Раҳмон  қайд кардаанд: «Ҷавонон неруи бузурги созандаанд ва онҳо метавонанд ояндаи миллатро бо интихоби дуруст таъмин созанд».

Ҳукумати Тоҷикистон барои ҷалби ҷавонон  ба  ҳаёти  сиёсӣ  ва  иҷтимоӣ барномаҳои  мухталиф  қабул  намудааст. Қонуни Ҷумҳурии Тоҷикистон «Дар бораи  сиёсати  давлатии  ҷавонон»  як намунаи равшан аз дастгирии ҷавонон мебошад.  Ҳар  як  ҷавони  огоҳ  бояд фаҳмад, ки раъйи ӯ қувваи қонунӣ дошта,  метавонад  ба  тағйироти  мусбат оварда расонад.

Иштирок  дар  интихобот  –  ин  на  танҳо ҳуқуқ, балки масъулияти шаҳрвандии ҳар як инсон  аст.  Ҷавонон  бояд  дарк  намоянд,  ки интихоби  онҳо  ба  рушди  ояндаи  миллат  ва давлат  таъсир  мегузорад.  Ба  қавли  Пешвои миллат муҳтарам Эмомалӣ Раҳмон: «Ояндаи Тоҷикистон  дар  дасти  ҷавонон  аст.  Ҷавонон бояд бо иродаи қавӣ, зиракии сиёсӣ ва ҳисси баланди ватандӯстӣ роҳи инкишофу шукуфоии кишварро интихоб намоянд».

ҲАР ЯК ҶАВОН БОЯД ДАРК КУНАД, КИ ИШТИРОКИ Ӯ ДАР ИНТИХОБОТ НА ТАНҲО НИШОНАИ ЗИРАКИИ СИЁСӢ АСТ, БАЛКИ ҚАДАМИ АВВАЛИН БА СӮЙИ ОЯНДАИ ДУРАХШОНИ МИЛЛАТ МУБОШАД. ИНТИХОБОТ ИМКОНИЯТЕСТ, КИ ҲАР ЯК ШАХС МЕТАВОНАД БО РАъЙИ ХУД ТАЪСИРИ МУСБАТ РАСОНАД ВА САҲМИ ХУДРО ДАР СОХТМОНИ ДАВЛАТИ ПЕШРАФТА ГУЗОРАД.

Дар  Тоҷикистон   интихобот  василаи муҳими  пайваст  кардани  иродаи  мардум бо  ҳадафҳои  миллӣ  мебошад.  Дар  ин  замина,  ҷавонон  бояд  аз  ҳамаи  имкониятҳои пешниҳодшуда  истифода  бурда,  фаъолона  дар  ҳаёти  сиёсиву  иҷтимоии  кишвар саҳмгузор бошанд. Иштирок дар интихобот ба ҳар  як  шаҳрванди  ҷавон  имконият  медиҳад, ки:
-  Овози  худро  барои  рушди  устувори ҷомеа ва давлат диҳад;
- Ба пешбарии сиёсатҳои оқилона ва созанда мусоидат намояд;
- Ба пешрафти масъалаҳои ҷавонон, ки ба онҳо бевосита дахл доранд, таъсир расонад.

Пешвои  миллат  муҳтарам  Эмомалӣ Раҳмон  ҷавононро  неруи  созанда  ва  қувваи пешбарандаи  ҷомеа  номидаанд.  Сарвари давлатамон борҳо зикр намудаанд, ки масъулияти насли ҷавон танҳо дар интихоб кардани роҳбарони боэътимод нест, балки дар ташаккули ояндаи устувори кишвар низ мебошад.

Ҳамин  тариқ,  ҳар  як  ҷавон  бояд  донад, ки  интихобот  на  танҳо  ҷузъи  сиёсӣ,  балки  як  унсури  муҳими  ташаккули  шуурнокии шаҳрвандӣ  мебошад.  Ҳар  овози  додаи  онҳо саҳме  дар  сохтани  Тоҷикистони  муосир  ва орзуву  ормонҳои  насли  оянда  аст.  Ин  масъулиятро бо ифтихор ва зиракии баланд иҷро кардан  муҳим  мебошад.  Танҳо  бо  иттиҳоду ҳамбастагии  ҷавонон  ва  иштироки  фаъоли онҳо  дар  равандҳои  сиёсӣ  мо  метавонем рушди устувори кишвари худро таъмин намоем ва Тоҷикистонро ба давлати боз ҳам шукуфон табдил диҳем.

умедҷон АМОНӢ, 
унвонҷӯ