Рӯзномаи Хатлон » Ҳокимияти давлати » БА ТИФЛОНИ ПАНҶГОНИК ҲАСАН, ҲУСЕЙН, ФОТИМА, ЗУҲРО ВА ХАТИЧА НОМ ГУЗОШТАНД

Ҳокимияти давлати / Хабари рӯз

БА ТИФЛОНИ ПАНҶГОНИК ҲАСАН, ҲУСЕЙН, ФОТИМА, ЗУҲРО ВА ХАТИЧА НОМ ГУЗОШТАНД

Ин хабарро, 1 январ, Мамат Бобоев, бобои тифлони навзод, зимни суҳбат бо раиси вилояти Хатлон Қурбон Ҳакимзода, ки барои муборакбодӣ ба хонадони онҳо дар деҳаи ба номи Бобоҷон Ғафурови ноҳияи Қубодиён ташриф овард, расонид.

Раиси вилоят ба ин оила туҳфаҳои пулию молӣ ва ғизоии мақомоти иҷроияи ҳокимияти давлатии вилояти Хатлонро расонида, аз аҳволи модару фарзандон пурсон шуд. 

Айни ҳол модари тифлони панҷгоник Дилноза Мамадоваи 31-сола, ки сокини ноҳияи Қубодиёни вилояти Хатлон аст, бо кӯдакони нав-зодаш дар таваллудхонаи ҷумҳуриявии шаҳри Душанбе таҳти муроқибати табибон қарор дошта, вазъашон хуб арзёбӣ мешавад. 

Таваллуди якбора панҷ тифл бори нахуст дар вилояти Хатлон ба қайд гирифта шудааст.

Дилноза Мамадова соли 2008 бо сокини деҳаи Бобоҷон Ғафурови Ҷамоати деҳоти "20-солагии Истиқлол" Барот Бобоев (Нормуродов) оила барпо намуда, аз зиндагии якҷоя соли 2010 соҳиби як духтар - Нормуродова Фирӯза ва соли 2017 соҳиби як писар – Нормуротов Иброҳим шудаанд.

Соли 2020 табибони ноҳия баъди ташхис муайян менамоянд, ки дар батни Д. Мамадова 5 тифл ба вуҷуд омадааст ва барои нигоҳубин ва таҳти назорат қарор додан ба таваллудхонаи ҷумҳуриявии шаҳри Душанбе роҳхат медиҳанд.

Рӯзи 30 декабри соли 2020 Дилноза Мамадова 5 фарзанд – ду писар ва се духтар ба дунё меорад.

Д. Мамадова дар хонаи шавҳараш ҳамроҳи падари шавҳараш – Бобоев Мамат, нафақахӯри 76-сола ва модари шавҳараш Нормуродова Норбӣ, нафақахӯри 74-сола зиндагӣ мекунад. Шавҳараш (Нормуродов) Бобоев Бароти 41-сола муваққатан бекор буда, то замони паҳншавии бемории сироятии нави коронавирус ва эълон шудани пандемия ба муҳоҷирати корӣ ба Росия сафар мекард.

Замини наздиҳавлигии онҳо 0,16 га-ро ташкил дода, 0,14 га замини ёрирасон (президентӣ) доранд.

Мамат Бобоев зимни суҳбат бо раиси вилоят гуфт, ки се фарзанди дигараш низ кӯдакони дугоник доранд. Ҳамакнун шумораи наберагони дугонику панҷгоникаш ба 13 нафар баробар шудааст.

Раиси вилоят Қурбон Ҳакимзода ба масъулон дас-тур доданд, ки дар азнавсозии манзили истиқоматии тифлони панҷгоник ва бунёди ҳуҷраҳои иловагии муносиб барои тифлони  навзод мусоидат намуда, пас аз ба Қубодиён овардани онҳо, навзодон зери назорати ҳамарӯзаи табибон қарор бигиранд.

 

Бо дастури раиси вилояти Хатлон Қурбон Ҳакимзода муовини раиси вилоят Фирӯза Шарифӣ ба дидорбинии модари фарзандони панҷгоник Дилноза Мамадова рафт.

Айни ҳол Дилноза Мамадова дар таваллудхонаи ҷумҳуриявии шаҳри Душанбе ҳамроҳи фарзандонаш таҳти муроқибати табибон қарор дорад.

Фирӯза Шарифӣ ба модари панҷгоникҳо кумаки моддию пулии мақомоти иҷроияи ҳокимияти давлатии вилояти Хатлонро расонида, аз ҳолу аҳволаш пурсон шуд.

Муовини раиси вилоят ҳамчунин бо табибони таваллудхона мулоқот карда, барои ғамхориашон нисбат ба Дилнозаю фарзандонаш изҳори миннатдорӣ намуд. Табибон қайд карданд, ки вазъи сиҳатии модару кӯдакон муътадил буда, як муддати муайян онҳо дар таваллудхона нигоҳубин мешаванд.

Фирӯза Шарифӣ ба модару фарзандони панҷгонааш саломатии қавӣ ва хушрӯзӣ таманно кард.

Ёдовар мешавем, ки сокини 31-солаи ноҳияи Қубодиёни вилояти Хатлон дар арафаи Соли нави мелодӣ 5 фарзанд ба дунё овард, ки чунин рӯйдод бори аввал дар таърихи вилоятамон сабт шудааст.

Шуъбаи иттилоотию таҳлилии дастгоҳи раиси 

вилояти Хатлон

Тегҳо

Дигар хабарҳо

Рӯзнома дар Вазорати фарҳанги Ҷумҳурии Тоҷикистон таҳти рақами 117/рз-97 аз 07 январи соли 2019 аз нав ба ҳисоб гирифта шудааст.

Муассис:

МАҚОМОТИ ИҶРОИЯИ ҲОКИМИЯТИ ДАВЛАТИИ ВИЛОЯТИ ХАТЛОН

САРМУҲАРРИР

Асалмо Сафарзода