Дар як сатр
» » Қонуни танзим аз исроф пешгирӣ ва шахсони камбизоатро дастгирӣ кард

Қонуни танзим аз исроф пешгирӣ ва шахсони камбизоатро дастгирӣ кард

13-06-2017, 14:49

Қонуни танзим аз исроф пешгирӣ ва шахсони камбизоатро дастгирӣ кард


Аз қабули Қонуни Ҷумҳурии Тоҷикистон «Дар бораи танзими анъана ва ҷашну маросимҳо дар Ҷумҳурии Тоҷикистон», ки бо ташаббуси бевоситаи Президенти Ҷумҳурии Тоҷикистон, Ҷаноби Олӣ муҳтарам Эмомалӣ Раҳмон ва дастгирии якдилонаи мардуми шарифи Тоҷикистон қабул гардида буд, 10 сол сипарӣ гардид. Ин қонуни муҳим 8 июни соли 2007 ба тасвиб расида, аз 5 боб ва 16 модда иборат мебошад.

Баъд аз қабул гардидани қонуни мазкур ба он ду маротиба - 18 июни соли 2008 дар 4 модда (9, 10, 11, 14) ва 21 июли соли 2010 дар ду модда (6 ва 4) тағйироту иловаҳо дароварда шуд.

Зимни омода ва қабул кардани қонуни мазкур фикру ақида ва назари қишрҳои мухталифи мардуми Тоҷикистон, инчунин таҷрибаи мамолики суннимазҳаби равияи Имоми Аъзам ба назар гирифта шуда, ин қонун ба талаботи шариати ислом ягон мухолифат надошта, мақсади қабули он пешгирии исроф ва дастгирии шахсони камбизоат мебошад.

Мавриди зикр аст, ки қабули қонуни мазкур дар шароити буҳрони шадиди иқтисоди ҷаҳонӣ ва болоравии нархи маводи хӯрока, ҷиҳати амалӣ намудани Стратегияи паст намудани сатҳи камбизоатӣ дар ҷумҳурӣ мусоидат менамояд.

Қабл аз қабули қонуни мазкур миёни маъракаҳои хурсандӣ ва азодорӣ фарқият набуд. Маъракаҳо ба як намуд мусобиқаҳои эълоннашуда табдил ёфта, додани оши наҳор барои то ҳазор нафар ва зиёфат дар тарабхонаҳо барои то панҷсад нафар ба назар мерасид.

Бо қабул гардидани қонуни мазкур ба хароҷоту исрофкориҳои бемаврид хотима дода шуда, ин қонун шаҳрвандонро аз ҳама гуна уҳдадориҳои беасос озод намуда, шароит фароҳам овард, ки маъракаҳои хурсандӣ ва азодории худро бо хароҷоти кам гузаронанд. Ташаббуси Президенти мамлакатро барои камхарҷу каммасраф гузаронидани расму ойинҳои мардумӣ тамоми мардуми Тоҷикистон дастгирӣ намуда, дар таҳияю тасвиби қонун барои аз байн бурдани анъанаҳои зарарнок, ки ба арзишҳои умумибашарӣ, суннатҳои миллӣ ва шариат ягон пайвастагӣ надоранд, таклифҳои мушаххасро пешниҳод карданд. Дар асоси талаботи қонуни мазкур имрӯз баргузории ҷашнҳои расмӣ, зодрӯз, хатнасур, тӯйи домодию арӯсӣ, маросимҳои дафну азодорӣ, маросими ҳаҷ ба танзим дароварда шуд. Аз ин лиҳоз, қабули Қонун «Дар бораи танзими анъана ва ҷашну маросимҳо дар Ҷумҳурии Тоҷикистон» тақозои замон буда, барои сари вақт аз байн бурдани маъракаҳои пурдабдаба ва хароҷоти беҳуда, мусоидат карда, иҷрои ин қонун натиҷаҳои мусбат дода истодааст.

Мақомоти иҷроияи ҳокимияти давлатии вилояти Хатлон дастури роҳбари Дастгоҳи иҷроияи Президенти Ҷумҳурии Тоҷикистонро вобаста ба ворид намудани тағйироту иловаҳо дар Қонуни Ҷумҳурии Тоҷикистон «Дар бораи танзими анъана ва ҷашну маросимҳо дар Ҷумҳурии Тоҷикистон» мавриди баррасӣ қарор дода, иттилоъ медиҳад, ки баъд аз қабули қонуни мазкур сатҳи зиндагии мардуми вилоят баланд гардидааст.

Дар баробари ин, ҷиҳати татбиқи қонуни номбурда ҳолатҳое мушоҳида мешаванд, ки як қатор шаҳрвандони вилоят дар риояи муқаррароти қонун бемасъулиятӣ зоҳир менамоянд. Аз ҷумла, агар дар баргузории хатнасур теъдоди иштирок то 60 нафар риоя карда шавад ҳам, аммо мушоҳидаҳо нишон медиҳанд, ки дар гурӯҳи шаҳру ноҳияҳои минтақаи Қӯрғонтеппа маъракаҳои гаҳворабандон пинҳонӣ ба як мусобиқа табдил ёфта, туҳфаҳои гаронбаҳо ба ҳамон тифл тақдим карда мешавад.

Дар баргузории тӯйҳои домодию арӯсӣ, дар гурӯҳи шаҳру ноҳияҳои минтақаи Қӯрғонтеппа баъзан баргузории маъракаҳои қудоталбон ва тақдими сарупо барои меҳмонон аз ду тараф ба назар расида, бо ҳар баҳона рӯйпӯш карда мешаванд.

Маросими дафну азодорӣ дар вилоят тибқи талаботи қонун риоя карда шавад ҳам, мутаассифона, маросими ҷаноза бо ҷамъоварии маблағи кӯмак дар шаҳру ноҳияҳои Кӯлоб ба соҳиби майит бо таври ошкор дар ҷойи махсус (суфра ё кати дуогӯӣ) мушоҳида мешавад. Ҳамзамон, маросимҳои «чил» ва «сол» мувофиқи талаботҳои қонун дар доираи 3 соат муқаррар гардида бошад ҳам, аммо баъди анҷоми вақти муайяншуда занҳо барои дуову фотиҳа ба хонаи соҳибмаърака ташриф меоранд, ки ин ҳолатҳо нофаҳмо боқӣ монда, баҳси байни соҳибмаърака ва комиссияи доимиро ба миён меорад.

Боиси тазаккур аст, ки пайравони дигар ҷараёнҳои исломие, ки характери тундгароӣ ва ифротӣ доранд, аз ҳисоби маҳдуд ё манъ будани баъзе маросимҳои дафну азодорӣ, аз ҷумла хӯрдани нони маросимҳои «чил» ва «сол» истифода намуда, шаҳрвандон, бахусус ҷавононро, аз мазҳаби ҳанафӣ дур намуда, ба ин васила шомилшавии онҳоро ба дигар ҷараёнҳои динии манъшуда тарғиб менамоянд.

Бо татбиқи ҳадафҳои стратегии Ҳукумати Ҷумҳурии Тоҷикистон ва сиёсати Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон сол аз сол сатҳи зиндагии мардум баланд гардида истодааст. Шаҳрвандон имконияти адои маносики Ҳаҷро пайдо намуда, ҳамасола то 2000 нафар сокинони вилоят ба зиёрати Маккаи мукаррама ва Мадинаи мунаввара мераванд. Аммо, баъди адои ҳаҷ барои дидорбинии ҳоҷӣ хешу таборон ва ҳамсояҳову наздикон меоянд. Фарзандони он ҳоҷӣ бо мақсади додани хӯрок ягон чорвои хурд забҳ намуда, хӯрок омода менамоянд, ки ин ҳолат ҳам, байни шаҳрванд ва комиссияи доимию кормандони мақомоти ҳифзи ҳуқуқ нофаҳмоиҳоро ба вуҷуд меорад.
Инак, бо назардошти он ки аксари аҳолии вилояти Хатлон ба кишоварзӣ машғул буда, субҳи барвақт барои кор ба саҳро мебароянд, имконияти аз соати 8:00 то 11:00 омадан ба оши наҳорро надорад. Аз ин лиҳоз, як қисм шаҳрвандон додани оши наҳорро аз соати 6:00-и субҳ оғоз менамоянд, ки қонуншиканӣ ба вуҷуд меояд.

Инчунин, баргузории тӯйи домодию арӯсӣ ва маросимҳои дафну азодорӣ ҳарчанд аз тарафи комиссияҳои доимӣ оид ба танзими анъана ва ҷашну маросимҳои миллии мақомоти иҷроияи ҳокимияти давлатии шаҳру ноҳияҳо ва ҷамоатҳои шаҳраку деҳот таҳти назорат қарор дошта бошанд ҳам, аммо баъзе сохторҳои ҳифзи ҳуқуқ назорати иловагиро ба роҳ мемонанд, ки боиси озурдаҳолии соҳибмаърака мегардад.
Бо дарназардошти гуфтаҳои боло чунин пешниҳод менамоем:

1. Дар моддаи 5-и қонун масъалаи «мувофиқа намудани рейдҳои муштараки сохторҳои ҳифзи ҳуқуқ бо комиссияи доимӣ ва мақоми ваколатдор» илова карда шавад;

2. Дар моддаи 13-и қонун масъалаи «хабар додани соҳибмаърака барои баргузории маъракаҳо ба мақомоти ваколатдор ва сохторҳои маҳаллии он» пурра муайян карда шавад;

3. Бо дарназардошти он ки дар моддаҳои алоҳидаи қонун теъдоди иштирокчиён дар тӯю маъракаҳо муайян шудааст, ҷиҳати ташрифи ҳамсояҳо, аз ҳар як хона як нафар бо моддаи алоҳида дар қонун қайд карда шавад;

4. Дар моддаи 14, сархати 3 «Вақти баргузории тӯю маросимҳо вобаста ба фаслҳои сол дар рӯзҳои истироҳатӣ аз соати 06:00 то 23:00 муқаррар карда шавад.

Давлатшоҳ ГУЛМАҲМАДЗОДА,
раиси вилояти Хатлон



Шарҳи хонандагон +

Матолиби дигар:

Сабти 80 қонуншиканӣ дар се моҳ

Сабти 80 қонуншиканӣ дар се моҳ

Хабарҳо, Фарҳанг ва адабиёт, НОСИРҶОН МАЪМУРЗОДА
Дар роҳи иҷрои ваколатҳо

Дар роҳи иҷрои ваколатҳо

Хабарҳо, Ҳаёти иҷтимоӣ, Номаҳои Шумо
Риояи муқаррароти ин қонун аҳамияти ҳаётӣ дорад

Риояи муқаррароти ин қонун аҳамияти ҳаётӣ дорад

Хабарҳо, Ҳаёти иҷтимоӣ, Номаҳои Шумо
3 млрд. сомонӣ сарфа шуд

3 млрд. сомонӣ сарфа шуд

Ҳаёти иҷтимоӣ, Хабарҳо, ҲАНГОМА ПАҲЛАВОНОВА