"Сияҳҷангал" - китоби нави шоири халқи Тоҷикистон Алимуҳаммад Муродӣ аз чоп баромад

"Сияҳҷангал" китоби ёддошт ва хотираҳоест аз зиндагинома ва роҳи дар сияҳҷангали душворгузари зиндагӣ тайкардаи Шоири халқии Тоҷикистон, дорандаи ҷоизаҳои адабии ба номи Мирзо Турсунзода ва Шамсиддин Шоҳин Алимуҳаммад Муродӣ.

Ин роҳ тахту ҳамвор ва кӯтали осонбаро набуд. Он пур аз хестанҳо, шебу фароз, шодиву ғам, кашталгириву кашталканӣ бо ғаму дард, мушкилоти зиндагӣ, афтодану нашкастану азму талошҳо барои расидан ба қуллаи мурод аст.

Китоб аз се қисмат: "Дар печу хами зиндагӣ", "Ҳикоя ва мақолаҳо", "Қиссаҳои сарироҳӣ" иборат буда, 13 хотира, 6 ҳикоя ва 4 қисса дорад.

Китоб аз 76 саҳифа иборат буда, зиндагиномаи шоирро бозгӯ мекунад.

Умедворем, хонандаи гиромӣ аз мутолиаи ин китоб суде мебарад ва навсафарони сафари роҳи зиндагӣ сабақе мегиранд.