ДАР НОҲИЯИ БАЛҶУВОН БА 5076 ОИЛА КИТОБИ «ШОҲНОМА» ТАҚДИМ МЕШАВАД

Дар ноҳияи Балҷувони вилояти Хатлон тақдими китоби «Шоҳнома»-и безаволи Ҳаким Абулқосим Фирдавсӣ ба 5076 оила идома дорад.

Барои амалӣ намудани ин иқдоми фарҳангӣ дар ноҳия гурӯҳи корӣ таъсис дода шудааст, ки аъзои он деҳа ба деҳа китобро ба ҳар оила мерасонанд.

Сокинон ин туҳфаи пурарзиши Президенти Ҷумҳурии Тоҷикистон, Пешвои миллат муҳтарам Эмомалӣ Раҳмонро бо эҳсоси ифтихор ва миннатдорӣ қабул менамоянд.

Иқдоми тақдими «Шоҳнома» ба ҳар оилаи мамлакат, ки бо ташаббуси Пешвои миллат ба роҳ монда шудааст, аҳамияти бузурги маънавӣ дорад. Ин амал дар ташвиқи мутолиа, арҷгузорӣ ба мероси адабӣ ва таҳкими ҳисси худшиносии миллӣ байни наслҳои имрӯза нақши созанда мегузорад.

То имрӯз шумораи зиёди хонаводаҳо ин китоби гаронбаҳоро дастрас намуда, тақсими он дар тамоми ҷамоатҳои ноҳияи Балҷувон идома дорад.