Ба 80 муассиса ҷиҳози таълимӣ дастрас шуд

Дар МТМУ №16-и шаҳри Бохтар намоиш ва тақсимоти таҷҳизоти таълимию технологӣ ба 80 муассисаи таълимии лоиҳавӣ баргузор гардид. Дар ин маросим муовини раиси вилояти Хатлон Фирӯза Шарифӣ, намояндагони шарикони рушд ва дигар масъулон ширкат доштанд.

Таъкид гардид, ки дар доираи сиёсати дарҳои кушод ва ҳамкории зичи Тоҷикистон бо шарикони рушд ҷиҳати беҳтар шудани шароити таълиму тарбия корҳои зиёду нафъоваре анҷом дода мешаванд. Бахусус, дар ҳамкорӣ бо шарикони рушд, ки бо Вазорати маориф ва илм, инчунин Мақомоти иҷроияи ҳокимияти давлатии вилояти Хатлон ба роҳ монда шудааст, ба 80 муассисаи таълимӣ кӯмакҳои гуногун, ба монанди компютер, тахтаи электронӣ, принтер ва дигар ҷиҳози хониш расонида мешавад.

Лоиҳаи “Мактабҳои 2030” дар чанд марҳила амалӣ шуда, ба муассисаҳои таълимӣ кумакҳои зиёде хоҳад расонид. Дар муассисаҳои лоиҳавӣ касбияти омӯзгорон ва шароити таълим беҳтар хоҳад шуд.