Нахустнамоиши филми "Модар фаришта буд" дар Рӯзи кинои тоҷик

Ба муносибати Рӯзи кинои тоҷик, ки ҳар сол 16 октябр дар кишвар таҷлил мегардад, имрӯз дар шаҳри Бохтар нахустнамоиши филми кутоҳметражи “Модар фаришта буд” баргузор мегардад.

Филми мазкур истеҳсоли муассисаи давлатии вилоятии “Хатлонсинамо” буда, намоиши он дар кинотолори “Кохи Лоҳутӣ” сурат мегирад.

Қобили зикр аст, ки “Хатлонсинамо” дар давоми шаш соли фаъолияти худ тавонист 10 филми ҳунарӣ, аз ҷумла “Марги сафед”, “Асрори тақдир”, “Хаёлӣ”, “Саҳв”, “Фариштаи Умед”, “Рӯзноманигор”, “Гирдоб”, “Номус”, силсилафилми ҳунарии “Артист” ва инак, филми ҳунарии “Модар фаришта буд”-ро таҳия кунад.

Дар баробари ин, 4 филми мустанад, якчанд ролику лавҳаҳои телевизионӣ аз манзараҳои зебои вилояти Хатлон, лавҳаҳои ҷашниву тарғиботӣ ва сайёиро ба навор гирифта, тавассути шабакаҳои телевизиониву интернетӣ ва кинотолорҳо пешкаши алоқамандони синамои миллӣ гардонидааст.

Муассисаи давлатии вилоятии “Хатлонсинамо” таҳти сарпарастии Мақомоти иҷроияи ҳокимияти давлатии вилояти Хатлон қарор дошта, бо мақсади таҳияи филмҳои миллӣ, тарғибу ташвиқи суннату анъанаҳо, тарбияи ҳисси ватанпарастӣ, густариши ойинҳои фарҳангӣ, тамаддунҳои миллати тоҷик ва ҳифзи арзишҳои миллӣ, инчунин таҳкими ваҳдату ҳамдигарфаҳмӣ дар ҷомеаи кишвар таъсис дода шудааст.

http://khatlon-ruznoma.tj/