Форуми занони Хатлон: “САДОҚАТИ МОДАРОН БА ПЕШВОИ МИЛЛАТ САДОҚАТ БА ВАТАН АСТ”

Муҳаррир: Суҳроби Рустам аз 05 октябр, Бахш: Ҳокимияти давлати / Слайдер / Матлабҳои охирин / Хабари рӯз / Фарҳанг ва адабиёт / Хабарҳо, Боздид 340

Имрӯз дар шаҳри Бохтар Форуми занони вилояти Хатлон таҳти унвони “Садоқати модарон ба Пешвои миллат садоқат ба Ватан аст” баргузор гардид. Дар ин ҳамоиш муовини раиси вилояти Хатлон Фирӯза Шарифӣ, аҳли зиё, меҳтарони меҳнат, модарону бонувони фаъоли вилоят ширкат варзиданд.

Фирӯза Шарифӣ зимни ироаи сухани худ қайд кард, ки маҳз хиради сиёсии Пешвои миллат муҳтарам Эмомалӣ Раҳмон ва хизматҳои мондагори он кас барои ҳифзи Истиқлоли давлатӣ, таҳкими давлатдорӣ ва барқарории сулҳу суботи миллӣ буд, ки имрӯз мо – занону бонувони Тоҷикистон дар фазои амну осоиштагӣ ва пешрафту шукуфоии Ватани азиз зиндагонӣ дорем.

- Таърихи навини давлатдории тоҷиконро бе заҳмату талош, хизматҳои арзандаву шоистаи Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон тасаввур кардан имконнопазир аст, - изҳор дошт муовини раиси вилоят. - Бояд эътироф намуд, ки дар ибтидои солҳои соҳибистиқлолӣ ба зимма гирифтани масъулият ба кори давлатдориву давлатсозӣ, дар ҷойи хушку холӣ, бе заминаҳои муайяни устувори молиявию моддӣ, иқтисодиёти фалаҷгашта саҳлу осон набуд. Танҳо нафаре метавонист дар ин корҳо дастболо шавад, ки бо дарки баланди ҳувияти миллӣ тамоми ҳастиву вуҷудашро ба миллату сарзамини хеш фидо кунад.

Заковату хиради азалӣ, дурбинӣва зиракиву ҳушёрии сиёсии Сарвари тоҷикони ҷаҳон маҳаки асосӣва бунёдии таъмини ҳамаи ин музаффариятҳост.

Пешвои муаззами миллат ҳамеша изҳор медоранд, ки ба неруи созандаи занони фарзонаву оқили тоҷик такя менамоянд. Занону модарон дар баробари ба ҷо овардани рисолати аслии худ – устувор гардонидани оила, тарбияи шоистаи фарзандони боодобу соҳибмаърифат, бонангу номус, ватандӯсту худшинос, инчунин, бо заҳмату талошҳои пайгиронаи худ дар рушди иқтисодию иҷтимоӣ ва фарҳангии кишвар саҳми босазо гузошта истодаанд.

Қайд гардид, ки имрӯзҳо бонувони Хатлонзамин баробари мардон номуси ватандориро ба дӯши худ гирифта, ғайратмандона бо ташаббусҳои созандаи худ Тоҷикистони маҳбубамонро боз ҳам ободу зебо гардонида истодаанд.

Мақомоти иҷроияи ҳокимияти давлатии вилояти Хатлон вобаста ба татбиқи самараноки стратегия ва барномаҳои давлатӣ дар самти кор бо занону бонувон корҳои амалиро анҷом дода истодааст. Шумораи занону бонувони дар мақоми роҳбарикунанда фаъолиятдошта дар миқёси вилоят 13 887 нафарро ташкил медиҳад. Шумораи хизматчиёни давлатӣ аз ҳисоби занон ба 540 нафар баробар шудааст, ки аз ин ҳисоб 210 нафар дар вазифаҳои роҳбарӣ фаъолияти назаррас доранд.

- Заҳмати софдилонаи занон ҳамасола аз ҷониби Роҳбари давлат қадршиносӣ гардида, садҳо нафар занону духтарон соҳиби мукофотҳои олии давлатӣ гардиданд ва мутмаинам, ки бо дастгирии Пешвои миллат минбаъд низ заҳмати занони фаъол, бонувони ташаббускор ва духтарони пешқадам қадрдонӣ хоҳад шуд, - идома дод муовини раиси вилоят Ф. Шарифӣ. - Занону модарон аз дастгирӣ, ҳавасмандгардонӣ ва пешниҳод ба вазифаҳои роҳбарӣ изҳори сипосу миннатдорӣ намуда, дастовардҳои соҳибистиқлолии Тоҷикистони азизро натиҷаи заҳматҳои шабонарӯзии Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон арзёбӣ менамоянд.

Муовини раиси вилоят баргузории Форуми занонро дар арафаи Рӯзи забони давлатӣ рамзӣ арзёбӣ намуда, афзуд, ки нақши Пешвои миллат дар рушди забони тоҷикӣ бесобиқа ва тасаввурнопазир мебошад. Махсусан, асарҳои Президенти кишвар, суханрониҳои ӯ дар маҳфилу чорабиниҳои гуногун дар пайрезии сиёсати забонии давлат, муайян кардани самтҳои асосии инкишофи забон ва забоншиносии тоҷик нақши бунёдӣ ва раҳнамоӣ доштанд. Пешвои миллат муҳтарам Эмомалӣ Раҳмон рушди забони адабии тоҷикӣ ва арҷгузории забони давлатиро муҳим ва муқаддас мешуморанд.

Бо ифтихору сарфарозӣ зикр шуд, ки зан-модар посдори забони миллӣ мебошад. Беҳуда халқ забони давлатиро забони модарӣ намегӯяд. Забон аслан ҳастии миллат ва нишони давлатдории миллист.

Иштирокдорони ҳамоиш изҳори итминон карданд, ки занону бонувони соҳибмаърифат ва бонангу номуси тоҷик ба шукронаи озодиву соҳибихтиёрии давлатамон, дуогӯи саломативу сарфарозии Пешвои миллат ва фазои орому осудаи кишварамон бо истифода аз шароиту имкониятҳои муҳайёкардаи Ҳукумати мамлакат барои пешрафти Ватани маҳбубамон содиқона ва боз ҳам бештар заҳмат мекашанд, ба хотири тарбияи наслҳои ояндасози миллат, ҳифзи забон ва фарҳанги миллӣ саъю талоши бештар мекунанд, дар чаҳорчӯбаи қонунҳои миллиамон - “Дар бораи танзими анъана ва ҷашну маросим дар Ҷумҳурии Тоҷикистон”, “Дар бораи масъулияти падару модар дар таълиму тарбияи фарзанд”, “Дар бораи тарбияи ватандӯстии шаҳрвандон” амал карда, ҷиҳати баланд бардоштани ҳисси ифтихори миллии фарзандон, беҳтар шудани некӯаҳволӣ, шароити зиндагии хонаводаҳои худ саҳми модаронаашонро мегузоранд.

Дар Форуми занони вилояти Хатлон таҳти унвони “Садоқати модарон ба Пешвои миллат садоқат ба Ватан аст” намояндагони бонувони вилоят, ки қувваи фаъолу пешрафтаи ҷомеа ба шумор мераванд, дар боби нангу номуси ватандорӣ, садоқат ба Пешвои маҳбуби миллат, ҳифзи арзишҳои миллию давлатдорӣ табодули назар намуданд.

Ҳангомаи ИСМАТ,
“Хатлон”