ДАР ВИЛОЯТИ ХАТЛОН 3128 ОМӮЗГОРИ ҶАВОН АЗ ИМТИЁЗҲО БАҲРАВАР ГАШТААНД

Аз соли 2007 то инҷониб дар асоси Қарори Ҳукумати Ҷумҳурии Тоҷикистон "Дар бораи муқаррар намудани имтиёзҳо барои омӯзгорони ҷавон" 2212 нафар омӯзгори ҷавон соҳиби замини наздиҳавлигӣ ва 187 нафар соҳиби замини полезӣ гардида, ба 729 нафар қарзҳои боимтиёз дода шудааст. Дар умум 3128 нафар аз имтиёзҳо баҳравар гаштаанд.

Ин нуқта дар ҷаласаи натиҷагирии соҳаи маорифи вилояти Хатлон қайд гардид.

Ба иттилои хадамоти матбуоти Раёсати маорифи вилоят, нимаи якуми соли равон дар асоси қарори мазкур ба 60 нафар омӯзгори ҷавон дар шаҳру ноҳияҳои вилояти Хатлон замини наздиҳавлигӣ дода шудааст. Инчунин, ба 64 нафар қарзҳои боимтиёз додаанд, ки омӯзгорони ҷавон дар самти пешбурди зиндагӣ аз онҳо истифода намудаанд. Яъне, дар умум нимаи якуми соли ҷорӣ 124 нафар омӯзгорони ҷавон аз имтиёзҳо бархӯрдор шуданд.

- Вобаста ба ҳавасманд намудани омӯзгорони ҷавон Раёсати маорифи вилояти Хатлон бо раисони шаҳру ноҳияҳо ҳамкориро дар сатҳи лозима ба роҳ мондааст, - зикр намуд манбаъ. - Ин аст, ки ҳавасмандгардонии омӯзгорони ҷавон нисбати солҳои пешин беҳтару бештар шудааст.