Дар як сатр
» » «Фитри рӯзаро ба моҳифурӯш додам»

«Фитри рӯзаро ба моҳифурӯш додам»

11-07-2015, 09:48

«Фитри рӯзаро ба моҳифурӯш додам»Дар китоби фиқҳи «Аҳсан-ул-ҳидоят» аз Ибни Аббос ривоят аст, ки набӣ алайҳиссалом садақаи фитрро фарз фармуд, ки барои рӯзадор аз саҳв ва суханҳои беҳуда поккунанда аст ва барои мискинон кӯмак аст. Инро касе, ки то вақти намози ид адо кард, садақоти фитраш мақбул аст. Ва касе, ки онро баъд аз намоз дод, фитри рӯза ҳисоб нашуда, танҳо амалӣ хайр аст. Ҳамчунин дар ин маврид паёмбари ислом (с) садақаи фитрро ба ятимону маъюбон, фақирону бечорагон ва ниёзмандон ҳадя карданро афзал шуморидааст.

Сарвари давлат Эмомалӣ Раҳмон дар паёми табрикотиаш бахшида ба моҳи шарифи Рамазон гуфт, ки мардуми мо барои амалӣ намудани ин суннати моҳи муборак, ҳамеша кӯшиш намуда, барои оромии рӯҳу равони хеш хайру саховатро зиёдтар мекунанд, таҳаммулро пеша карда, аз гуноҳҳои ҳамдигар мегузаранд ва сулҳу салоҳро авло дониста, ба ниёзмандону камбизоатҳо, ятимону маъюбон, барҷомондагон ва бечорагону фақирон, дасти хайру эҳсон дароз менамоянд. Умуман, ҳар як инсони дорандаву саховатпеша бояд ба қадри имкон хайрро пеша намояд ва албатта, дар назар дошта бошад, ки дар ин роҳ ба хонавода ва оилаи хеш зиён наоварад.

Ҷаҳонгир Орифҷонов, сокини шаҳри Қӯрғонтеппа, гуфт, ки фитри рӯзаи ҳамаи панҷ узви оилаашро ба зани моҳифурӯше додааст.
- Ҳафтаи гузашта дар бозор аз як зани моҳифурӯш бар ивази 15 сомонӣ 10 дона моҳичаи бирён харидам ва муомилаи нарму модаронаи он зан ба ман хуш омаду 20 сомонӣ фитри рӯзаи оиламонро ба вай додаму дуои нек гирифтам, - баён намуд О. Ҷаҳонгир.

С. О., як марди тоҷир ва сарватманд аз шаҳри Қӯрғонтеппа, баъд аз ҳисобу китоби дороияш муайян кардааст, ки имсол фитри рӯза ва закот аз молаш камобеш ба 40 ҳазор сомонӣ расидааст.

- Аслан камина ҳар сол дар моҳи шарифи Рамазон закоти моламро ба фуқарои қарздор, камбизоату бепарастор, ятиму барҷомонда ва ба маркази бемориҳои рӯҳии ноҳияи Ҳисор инъом мекунам. Аммо имсол тасмим гирифтам, ки пеш аз ҳама, як толибилме, ки дар хориҷи кишвар таҳсил мекунаду аз банда 1 000 доллар қарздор аст, бубахшам, - мегӯяд С. О. – Ҳамчунин, ба оилаҳои баъзе аз пайвандону ҳамсояҳоямон ва он ошною шиносҳое, ки ниёзманданд, аз анвои хӯрдании орду равған ва биринҷу шакар кӯмак хоҳам кард…

Раъно Ҳамидова, сокини шаҳри Қӯрғонтеппа, бо далели он ки вазъи иҷтимоии оилаи духтараш чандон хуб нест, гӯшт ва дигар маводи ғизоӣ харидорӣ карда, ба сифати фитр ба ӯ медиҳад. Ин тасмимро хонум Раъно дар ҳоле гирифт, ки як оилаи камбизоат кӯмакашонро рад кардааст.

- Писарам дар бозор маводи ғизоӣ мефурӯшад ва чанд рӯз пеш равған, биринҷ, мош, лӯбиё, макарон, картошкаю пиёз гирифта, ба хонаи як хеши дурамон, ки фарзандони зиёд дораду дар миёнашон маъюб низ ҳаст, бурда дод, аммо сардори он оила ношукрӣ карда, пагоҳаш он ҳамаро ба як моторол бор карда, ба мо бозпас фиристода гуфтааст: «Агар кӯмак кардан мехоҳед, пул диҳед, дар хонаи мо мошу лӯбиёю картошка зиёд аст», - бо таассуф нақл мекунад Р. Ҳамидова.

Идибек Исҳоқов, муҳоҷирбачае, ки алъон дар Русия кор мекунад, гуфт, ки ӯ ва шариконаш фитри рӯза ва хайрашонро ба ҷавоне, ки ҳамроҳашон кор мекунад, медиҳанд.

- То ҷое, ки ман медонам, падару модари ин ҳамкорамон чанд сол аст, ки беморанду дар Тоҷикистон барои дорую дармонашон пул расонида наметавонанд ва он кӯмакпулиҳое, ки мо ва дигарон медиҳем, ба маошаш зам карда, он маблағро ба хонаашон мефиристад, -мегӯяд И. Исҳоқов.

Абубакр Шокаримов, истиқоматкунандаи ноҳияи Бохтар зикр намуд, ки маблағи фитри рӯзаро ба ҳамсояашон медиҳанд.

- Дар деҳаамон як марди 40-сола зиндагӣ мекунад, ки мардикор асту панҷ кӯдак дорад ва камбағалона умр ба сар мебарад, - афзуд ӯ. - Илова бар ин, хонаи истиқоматиаш дар ҳоли садамавӣ аст. Барои ҳамин, оилаи мо маблағи фитри рӯзаамонро ба он мард медиҳем.

Мирзои Содиқ, сокини шаҳри Қӯрғонтеппа, мегӯяд, ки ҳар сол фитри рӯзаро ба як марди безабону ношунаво медиҳад. Ҳамчунин, ӯ гуфт, ки «дар як хонаамон мардикорони аробакаш аз шаҳри Кӯлоб иҷора меистанд. Аз баски он мардикорон дар моҳи Рамазон рӯзадоранду корашон чандон хуб намешавад, падарам иҷорапулии якмоҳаи онҳоро намегиранд», - афзуд М. Содиқ.

Умринисои Ҳошимзода, истиқоматкунандаи шаҳри Қӯрғонтеппа, мегӯяд, ки маблағи фитрро бар «нафс»-и оилаи худаш сарф хоҳад кард.
- Вақте худи фарзандонам ниёз ба гӯшту ғизои хуб доранд, бояд ман чӣ кор кунам? – дарди дил гуфт ӯ. - Албатта, 1-2 кило гӯшт мегираму як таоми хуб омода намуда, ба серӣ бо фарзандону наберагонам мехӯрем.

Маҳмадӣ Холов, сокини ноҳияи Ҷиликӯл, мегӯяд, ки 50 сомонӣ фитри рӯзаи аъзои оилаашро якҷо бо маҳсулоти деҳқониаш картошка, бодиринг, боимҷону қаланфури булғорӣ ба зане аз деҳаашон садақа мекунад: "Он ҳамсояамон дар замин чизе накоридааст. Чунки дар оила марди коргар нест. Барои ҳамин хайрамро ба ӯ медиҳам".

Ёдовар мешавем, ки дар Тоҷикистон садақаи фитр барои як нафар 4 сомонӣ ва закоти мол аз 12 ҳазору 200 сомонӣ 305 сомонӣ муайян шудааст.

Амонҷон МАҲКАМОВ


Шарҳи хонандагон +

Матолиби дигар:

Барои татбиқи фазилатҳои Иди Фитр ва аркони ислом кӯшиш ба харҷ диҳем

Барои татбиқи фазилатҳои Иди Фитр ва аркони ислом кӯшиш ба харҷ диҳем

Ҳаёти иҷтимоӣ, Хабарҳо
Рӯзи Иди Фитр 17 июл эълон шуд

Рӯзи Иди Фитр 17 июл эълон шуд

Хабарҳо, ҲАНГОМА ПАҲЛАВОНОВА
Зан – «шеф»-и хона!

Зан – «шеф»-и хона!

Ҳаёти иҷтимоӣ, Таҳқиқи журналистӣ, НОСИРҶОН МАЪМУРЗОДА
Кумак ба оилаҳои ниёзманд ва ятимону маъюбон

Кумак ба оилаҳои ниёзманд ва ятимону маъюбон

Хабарҳо, Тандурустӣ ва экология
Қиссаи се аробакаши сарватманд

Қиссаи се аробакаши сарватманд

Таҳқиқи журналистӣ, НОСИРҶОН МАЪМУРЗОДА, АМОН МАҲКАМОВ