Дар як сатр
» » Замони бакорандозии корхонаҳои истеҳсоли аммиак ва карбамид боз ба таъхир афтод

Замони бакорандозии корхонаҳои истеҳсоли аммиак ва карбамид боз ба таъхир афтод

2-08-2018, 09:09

Раиси вилояти Хатлон Давлатшоҳ Гулмаҳмадзода дар нишасти матбуотиаш 18 июл зимни посух ба саволи хабарнигорон дар мавриди замони бакорандозии корхонаи «Нуриҳои Осиё» (собиқ «ТоҷикАзот») гуфт, ки дар муҳлати муқарраршуда, яъне моҳи августи соли 2018, ба анҷом расидани марҳилаи якуми корҳои таҷдиду барқарорсозии корхонаи мазкур зери суол аст.

Дар асоси Созишномаи сармоягузорӣ байни Ҳукумати Ҷумҳурии Тоҷикистон ва ширкати «Хэнан Чжун-Я Гурӯҳи холдингӣ»-и Ҷумҳурии Халқии Хитой оид ба таҷдид ва ба истифода додани корхонаҳои истеҳсоли аммиак ва карбамид дар шаҳри Левакант дар заминаи ҶСК «Азот» (аз 3 сентябри соли 2016), ширкати хитоӣ уҳдадорӣ гирифта буд, ки марҳилаи якуми лоиҳаи мазкурро дар муҳлати якуним сол татбиқ намояд. Мувофиқи уҳдадориҳои ширкати «Хэнан Чжун-Я Гурӯҳи холдингӣ» ва ваъдаҳои роҳбарияти ин ширкат дар назди Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон корхона аз 1 феврали соли 2018 бояд ба фаъолияти истеҳсолӣ шурӯъ мекард.

Аммо, сарфи назар аз ҷадвали рафти корҳои сохтмоние, ки аз ҷониби ширкат тасдиқ шуда буд, корхона ба фаъолият оғоз накард ва Сарвазири мамлакат Қоҳир Расулзода 27 марти соли ҷорӣ зимни вохӯриаш бо намояндагони ширкати «Хэнан Чжун-Я Гурӯҳи холдингӣ» ва ҶСК «Нуриҳои Осиё» аз кашолкориҳо дар рафти корҳои таҷдид изҳори нигаронӣ карда буд. Дар он мулоқот директори ширкати «Хэнан Чжун-Я Гурӯҳи холдингӣ» Сун Вей вобаста ба ҳолати қафомонии рафти корҳои сохтмонӣ дар корхонаи мазкур гуфта буд, ки яке аз сабабҳои он тағйир ёфтани талаботи экологӣ барои истеҳсоли таҷҳизот дар Хитой ба ҳисоб меравад. Сун Вей ҳамзамон итминон дод, ки то моҳи августи соли 2018 корхона ба истеҳсоли маҳсулот шурӯъ менамояд.

Зимни мулоқоти Сарвазири мамлакат бо роҳбарони ширкати хитоӣ қайд гардида буд, ки дар ҳолати сари вақт ба истифода дода нашудани корхона (моҳи августи соли 2018), Ҳукумати Тоҷикистон метавонад ҷиҳати қатъ намудани созишномаи сармоягузорӣ тадбир андешад.

Раиси вилояти Хатлон Давлатшоҳ Гулмаҳмадзода низ бо таъкид ба муқаррароти созишномаи мазкур гуфт, ки ин дафъа низ ширкати хитоӣ дар мавриди баҳрабардорӣ қарор додани корхонаи «Нуриҳои Осиё» таъхир мекунад ва ин омил ба татбиқи нақшаҳо дар самти рушди соҳаи кишоварзӣ таъсири манфӣ мерасонад. «Яке аз сабабҳои норасоии нуриҳои минералӣ дар мавсими кишту кори имсола маҳз ваъдаҳои бакорандозии корхонаи мазкур буд. Соҳибкорони мо барои воридоти нуриҳо аз хориҷа иқдом накарданд, зеро дар сурати ба фаъолият шурӯъ намудани корхона маҳсулоташон ба фурӯш намерафт», - идома дод раиси вилоят.

Пас аз нашри ин нуқтаи назари Давлатшоҳ Гулмаҳмадзода дар ВАО, аз почтаи электронии oriyon_87@list.ru, ки ба Хуршед Самадов ном нафаре мансуб будааст, 20 июл ба унвонии расонаҳои хабарӣ мактубе аз номи директори генералии ҶСК "Нуриҳои Осиё”, ҳамзамон роҳбари намояндагии «Хэнан Чжун-Я Гурӯҳи холдингӣ» дар Ҷумҳурии Тоҷикистон хонум Ван Янся фиристода шуд. Дар ин "баёния” омадааст, ки "изҳорот ё маълумоти пешниҳоднамудаи раиси вилояти Хатлон воқеиятро инъикос намекунад ва ин маъниро ба вуҷуд овардааст, ки гӯё барои ба фаъолият оғоз намудани корхонаи "Нуриҳои Осиё” кори чашмрасе ба анҷом расонида нашудааст”.

Пас аз паҳн шудани ин "баёния”-и намояндагии ширкати хитоӣ идораи рӯзномаи "Хатлон” барои дарёфти шарҳи бештар ба намояндагии «Хэнан Чжун-Я Гурӯҳи Холдингӣ» муроҷиат намуд. Маълум гардид, ки ин номаро ба идораҳои ВАО аз номи ширкат касе нафиристодааст. Ван Кунфун, ёвари директори генералии ҶСК "Нуриҳои Осиё”, зикр кард, ки роҳбари корхона хонум Ван Янся чанд моҳ боз дар Хитой қарор дорад. "Хонум Ван Янся ба хотири ҳалли як қатор масъалаҳо ба Хитой сафар кардааст. Барои паҳн кардани изҳорот ё баёнияе оид ба сабабҳои мавқуф гузоштани замони бакорандозии корхона ягон дастур ҳам нашудааст. Он мактубе, ки гӯё аз номи ширкат ба ВАО фиристода шудааст, дар асл ба корхонаи мо ягон иртибот надорад. Мо дар бораи ин қазия  роҳбарияти  худро огоҳ кардем ва таҳқиқ мекунем, ки кӣ, бо кадом мақсад ин номаро аз номи хонум Ван Янся фиристодааст”, - идома дод ёвари директори генералӣ.

Дар корхонаи "Нуриҳои Осиё” феълан 465 нафар кор мекунанд, ки 348 нафари онҳо шаҳрвандони Тоҷикистон ва 117 нафар шаҳрвандони Хитой будаанд. Корманде бо исми "Хуршед Самадов”, ки аз почтаи электрониаш "баёния”-и намояндагии ширкат ба расонаҳо фиристода шудааст, дар ин корхона фаъолият намекунад.

Ван Кунфун, ёвари директори генералии ҶСК "Нуриҳои Осиё” ҳамчунин тасдиқ намуд, ки раиси вилояти Хатлон дар мавриди қафомонии ҷараёни корҳои сохтмонӣ аз ҷадвали тасдиқшуда дар корхонаи мазкур ҳақ гуфтааст. "Танҳо ҳаминро метавонам бигӯям, ки мо наметавонем марҳилаи якуми таҷдиди корхона, яъне истеҳсоли маҳсулотро дар моҳи август ба анҷом расонем. Санаи муайянеро ҳам наметавонам зикр кунам. Ин аз воридоти таҷҳизоти лозимӣ аз Хитой низ вобастагӣ дорад. Муҳлати навро роҳбарияти ширкат дар мувофиқа бо мақомоти давлатии Тоҷикистон таъин мекунанд”, - гуфт ӯ.

Аммо, ба қавли В. Кунфун, умури сохтмонӣ дар корхона идома доранд. Тақрибан 50-60%-и корҳои сохтмонӣ дар сехҳои коркарди синтези газ, анбори нигоҳдорӣ ва коркарди ангишт, дегхона ва дигар қисматҳои корхона ба анҷом расонида шудаанд.

Қобили зикр аст, ки тибқи Созишномаи сармоягузорӣ байни Ҳукумати Ҷумҳурии Тоҷикистон ва ширкати «Хэнан Чжун-Я Гурӯҳи холдингӣ»-и Ҷумҳурии Халқии Хитой оид ба таҷдид ва ба истифода додани корхонаҳои истеҳсоли аммиак ва карбамид дар шаҳри Левакант дар заминаи ҶСК «Азот» (аз 3 сентябри соли 2016), марҳилаи якуми лоиҳаи сармоягузорӣ то 1 феврали соли 2018 (муҳлати тамдидшуда – авгус-ти соли 2018) ва марҳилаи дуюми лоиҳа то соли 2020 татбиқ мегардид. 

Ёдрас мекунем, ки соли 2016 корхонаи «Тоҷиказот» - яке аз ширкатҳои азими истеҳсоли нуриҳои минералӣ дар Тоҷикистон дар асоси созишномаи сармоягузорӣ бо ширкати хитоии «Хэнан Чжун-Я Гурӯҳи холдингӣ» ба корхонаи муштараки «Нуриҳои Осиё» табдил дода шуд. Ин ширкат азм дорад, ки кори корхонаро ба ангишт гузаронида, дар зарфи се сол барои таҷдид ва бакорандозии он 360 миллион доллари амрикоӣ сармоягузорӣ кунад.

Лоиҳаи сармоягузорӣ дар навбати аввал бун-ёди корхонаҳои истеҳсоли аммиак бо иқтидори 120 ҳазор тонна ва карбамид ба иқтидори 200 ҳазор тонна дар як солро дар назар дошта, дар марҳилаи дуюм васеъкунии иқтидори истеҳсолии корхонаҳои аммиак то 300 ҳазор тонна ва карбамид то 500 ҳазор тонна дар як сол пешбинӣ шудааст. Дар корхонаҳои истеҳсоли аммиак ва карбамиди шаҳри Левакант зиёда аз 1000 ҷойи нави корӣ ташкил хоҳад шуд.

Носирҷон Маъмурзода,

«Хатлон»



Шарҳи хонандагон +

Матолиби дигар:

Сафари кории сарвазири мамлакат ба Леваканту ноҳияи Ҷалолиддини Балхӣ

Сафари кории сарвазири мамлакат ба Леваканту ноҳияи Ҷалолиддини Балхӣ

Ҳокимияти давлатӣ
Дар Қубодиён бузургтарин корхонаи сементи Тоҷикистон бунёд хоҳад шуд

Дар Қубодиён бузургтарин корхонаи сементи Тоҷикистон бунёд хоҳад шуд

Хабарҳо, Иқтисоду тиҷорат, НОСИРҶОН МАЪМУРЗОДА
Шиносоии Сарвазир аз корҳои таҷдиди НБО “Сарбанд”

Шиносоии Сарвазир аз корҳои таҷдиди НБО “Сарбанд”

Хабарҳо, Ҳокимияти давлатӣ, НОСИРҶОН МАЪМУРЗОДА
Идомаи талошҳо барои дубора ба кор андохтани «ТоҷикАзот»

Идомаи талошҳо барои дубора ба кор андохтани «ТоҷикАзот»

Иқтисоду тиҷорат, Хабарҳо, НОСИРҶОН МАЪМУРЗОДА
Умеде барои дубора фаъол шудани «ТоҷикАзот»

Умеде барои дубора фаъол шудани «ТоҷикАзот»

Иқтисоду тиҷорат, Хабарҳо, НОСИРҶОН МАЪМУРЗОДА