Дар як сатр
» » Модарон, дар батни хеш фарзанди солим парваред

Модарон, дар батни хеш фарзанди солим парваред

15-04-2016, 15:17

Модарон, дар батни хеш фарзанди солим парваред
Ҳамеша андеша мекунем, ки ҷомеаи солим ба фарзандони солим вобастагӣ дорад. Фарзандони солимро модарони солим ба дунё оварда метавонанд. Занони рӯзғордида бар он назаранд, ки ҳарчанд модарони имрӯза фарзандони кам ба дунё оранд ҳам, бештар бемор мешаванд. Ба андешаи онҳо дар замони Шӯравӣ занон зиёд дар хона таваллуд мекарданду ба духтур ҳангоми ҳомиладорӣ кам муроҷиат менамуданд. Байни модарон таваллуди пеш аз муҳлат ва исқоти ҳамл кам ба назар мерасид. Табибон бошанд ин мушкилотро имрӯз аз як тараф агар дар паст будани иммунитет бинанд, аз тарафи дигар дар организми занон вуҷуд доштани вирусҳоро, ки «туҳфа»-и шавҳарони муҳоҷирашон аст, таъкид мекунанд. Аммо, ҳамзамон табибон хатару зарари истифодаи зиёди телефонҳои мобилиро барои занон, бахусус занони ҳомила, аз дигар навъи вирусу бемориҳо камтар намедонанд.

Телефони мобилӣ хатари мубталошавӣ ба саратонро меафзояд

Саломатӣ неъмати бебаҳо барои ҳар як инсон ба ҳисоб меравад. Дар замони пешрафти технология он ҷойгоҳи асосиро ишғол мекунад. Имрӯз воситаҳои зиёди тиббию техникӣ сохта шудаанд, ки барои талаботи рӯзафзуни инсонро қонеъ кардан равона гаштаанд. Агар гӯем, ки бисёр муаммоҳо роҳи ҳалли худро ёфтаанд, хато нахоҳем кард. Аммо дар баробари ин зуҳуроти дигар низ ҳастанд, ки аз ҳисоби таъсири бади ин воситаҳои техникӣ пайдо гаштаанд. Масалан, бартариҳои телефони мобилиро таъкид карда истода, оқибатҳои харобиовару зарари онро нагуфтан кори хуб нахоҳад буд. Имрӯзҳо табибон афзоиши бемориҳоро аз ҳисоби таъсири бади афканишоти электромагнитии телефонҳои мобилӣ мушоҳида мекунанд, ки ба хотири пешгирии ин ҳолатҳои нохуш ҳар кас бояд эҳтиёткор бошад.

Собит шуда, ки телефони мобилӣ зарар дорад ва он аз ҳама зиёд ба афканишоти электромагнитӣ, ки гӯшӣ (трубка) дар атрофи худ ҷамъ мекунад, алоқаманд аст. Чунин майдонро ҳар як асбоби барқӣ, чӣ яхдон ва чӣ телевизору чӣ печи хурдмавҷ ба вуҷуд меорад. Вале телефони мобилӣ бевосита ба мағзи сари мо сарукор дорад ва таъсири зарари майдони электромагнитиро ба мағзи сар чанд карат зиёд менамояд. Тибқи андешаи олимон афканишоти электромагнитӣ пеш аз ҳама барои он ба инсон аз ҳад зиёд хатарнок аст, ки он муддати зиёд аз худ ягон аломате нишон надода, дар пайомад ба организм самараи гӯшношунид ба бор меорад. Хусусан агар он ба узви мураккаб ва ҳассос - мағзи сар алоқаманд бошад. Чунки тағйироти начандон калони мағзи сар метавонад ба тамоми организми инсон таъсири бузург расонад. Бар асари истифодаи тӯлонии телефони мобилӣ имконияти ба вуҷуд омадани касалиҳои саратонӣ дар миён аст. Инро олимон дар натиҷаи таҷрибаҳои бешумори бо ҳайвонот ва одамон гузаронидаашон тасдиқ кардаанд.

Телефони мобилӣ натанҳо ба сар, балки ба тамоми узвҳои бадан таъсири манфӣ мерасонад. Ҳангоми танаффуси байни гуфтугӯҳо бисёре аз мо онро дар киса, баъзан дар наздамон гузошта мехобем. Яъне сарчашмаи зиёде афканишоти электромагнитиро бевосита дар назди худ нигоҳ дошта, организамонро ба сарбории гароне гирифтор мекунем, ки он боиси сустшавии нафақат системаи марказии асаб, балки пастшавии муқовиматпазирии организм ба ангезандаҳои берунӣ, бактерия ва вирусҳои касалиовар мегардад.

«Хайрият, ҳамин телефон ҳаст, вагарна чӣ мекардем?»

Тибқи маълумотҳои мутахассисони соҳаи тиб нишонаҳои пайдошавии бемории асаб ин асабонӣ, дарди сар, ғазабнокӣ, фаромӯшхотирӣ ва бехобӣ мебошад. Инчунин, яке аз сабабҳои зиёд шудани беморӣ ба бисёр истифода бурдани телефони мобилӣ алоқаманд аст.

Бавижа занон, ки солимии ҷомеа аз солимии онҳо вобастагии зиёд дорад, бояд ҳамеша мувозиби сиҳатии худ бошанд ва тарзи дурусти истифодаи телефонҳои мобилиро донанд. Аслан, телефон танҳо василаи гуфтугӯ дар вақти зарурист. Имрӯз ҳама як сухан мегӯянд: «Хайрият, ҳамин телефон ҳаст, вагарна чӣ мекардем?». Албатта, аз як ҷиҳат хуб аст доштани телефон, зеро имрӯз қисми зиёди корҳоро ба ҷое нарафта, бо телефон метавон анҷом дод. Аммо ҷиҳати манфиашро бахусус, занҳо ба назар намегиранд. Аз истифодаи зиёди телефон ба андешаи олимон, инсон метавонад ба бемориҳои сустшавии узви биниш, пайдоиши варамҳо дар майнаи сар, пайдошавии раг дар сина, пайдошавии бемориҳои дил, безурётӣ ва дигар бемориҳо гирифтор шавад. Мо - занҳо набояд фаромӯш созем, ки дар батни хеш фарзанди солим бояд парварем. Аз он ки кӯдаки носолимро ба дунё меорему дар рафти нигоҳубини он хуни ҷигар мешавем, бояд пешопеш андеша кунем. Зеро истифодаи зиёди телефон ҳам метавонад ба кӯдаки дар батни модарбуда ва саломатии худи зан таъсири манфӣ расонад.

Мушоҳидаҳо нишон медиҳанд, ки имрӯзҳо занҳои ҳомила низ дар хона нишаста соатҳои дароз бо хешу наздиконашон суҳбатҳои тӯлонии телефонӣ мекунанд. Табибон бо ташхису мушоҳидаҳои тиббӣ муайян кардаанд, ки истифодаи бисёри телефон ба занони ҳомила зарар дорад. Ҳангоме ки зани ҳомила бо телефон гуфтугӯ мекунад, ба сиҳатии узвҳои кӯдаки дар батнашбуда хатари зиёд мерасонад.

Фарзанди солимро модарон, табибон ва ҷомеа интизоранд…

Ҳанифа Расулова, духтури момодоя аз Маркази солимии репродуктивии шаҳри Қӯрғонтеппа, ки таҷрибаи кории 33-сола дорад, бар ин назар аст, ки занҳо имрӯз худашон ба камхунӣ, бемории ҷоғар ва дигар бемориҳо гирифторанд, аммо боз барои худ бо дасти хеш мушкилот эҷод мекунанд.

- Пушти дари ҳуҷраи момодояҳо бо ҳарфҳои калон навишта шудааст, ки «илтимос, телефонҳоятонро хомӯш созед!», - мегӯяд Ҳанифа Маҷидовна. – Аммо, мутаассифона, занҳо бо садои хеле баланд суҳбат мекунанд. Ин тадбир агар аз як ҷиҳат ба маданият вобаста бошад, аз ҷиҳати дигар ба хотири ҳифзи саломатии худи онҳост. Гарчанде олимон масофаи то 3 метр дурӣ аз телефони хомӯшкардашударо барои инсон тавсия дода бошанд ҳам, занҳои мо бояд дар се моҳи аввали ҳомиладорӣ телефонҳои мобилиро хеле кам истифода баранд. Зеро се моҳи аввал давраи хеле ҳассос, давраи пайдоиши тифл ба ҳисоб меравад. Дар ин се моҳ тамоми узвҳои инсон: гӯш, бинӣ, найчаҳои асаб, чашм, дасту пой ва дигар узвҳо ба қисмҳо ҷудо мегарданд. Баъди семоҳагӣ ҳамроҳаки тифл пайдо мешавад, ки ба воситаи ӯ тифл инкишоф меёбад ва ғизо мегирад. Аз гармии зиёди бачадон ҳамроҳак хуб ҷойгир намешавад ва метавонад ба тифл ва инкишофи ӯ монеа эҷод кунад. Ин гармӣ аз мавҷҳои телефони мобилӣ метавонад ба тифл таъсири манфӣ расонад. Дар натиҷа ба исқоти ҳамл, тифли инкишофнаёфта, таваллуди пеш аз муҳлат ва дигар мушкилиҳо оварда мерасонад.

Ҳанифа Расулова ҳамчунин иброз дошт, ки ҳамеша ба занҳо маслиҳат медиҳад, то телефонро ҳангоми ҳомиладорӣ ва берун аз он кам бо худ гиранд. Аммо дар рафти суҳбат маълум мегардад, ки занҳо телефони мобилиро хеле зиёд истифода мебаранд. Онҳо иқрор мешаванд, ки бо шавҳарони муҳоҷирашон тамоми мушкилоти оилавиро бо телефон ҳал мекунанд, ба ҷуз ин, бо он ҳар хел бозию машғулиятҳо анҷом медиҳанд.

Писарам, халал нарасон ба бозии ман…

Ҳамсуҳбати дигари мо Ситора Тиллоева, равоншинос, мегӯяд, ки занҳо, махсусан занҳои бекору хонашин гоҳе телефон гуфта ҳама чиро фаромӯш мекунанд. «Дуруст аст, ки телефон корҳои зиёди моро осон мекунад. Аз аҳволи пайвандону наздиконамон зуд - зуд бохабар мешавем. Аммо фаромӯш мекунем, ки асабҳоро хароб мекунем, саломатиамонро аз даст медиҳем. Хеле аламовар аст, вақте мебинед, ки аз диққати зиёд ба телефон баъзе занҳо ба интернету вайберу дигар шабакаҳои иҷтимоӣ ва бозиҳои телефонӣ дода шуда, ба кӯдаконашон доду фарёд мезананд, то халал нарасонанд. Он қадар саргарми телефон мешаванд, ки гоҳе масъулияти модариро фаромӯш мекунанд. Ҳатто қисми зиёди оилаҳои ҷавон ҳангоми сар задани нофаҳмиҳои хурди оилавӣ тариқи телефон ба тарафайн аз хабар додан вайрон гардидаанд. Яъне, дар маҷмӯъ, занҳо тарзи дуруст ва дар кадом ҳолат зарур будани телефонро намедонанд. Шояд сарфаҳм намераванд, ки телефону телефонбозӣ натанҳо боиси пеш омадани мушкилоти иҷтимоӣ мегардад, балки ба саломатии худи онҳо ва солимии фазои оилавӣ низ зиён мерасонад».

Занҳои гиромӣ ва модарони азиз, ҳамеша дар фикри саломатии хеш ва фарзандон бояд буд, зеро ҷомеаи солим танҳо дар сурати солимии мову фарзандонамон ташаккул ёфтаву рушд хоҳад кард.

Ҳангомаи ИСМАТ,
«Хатлон»



Шарҳи хонандагон +

Матолиби дигар:

Агар гирифтори зуком шудед…

Агар гирифтори зуком шудед…

Хабарҳо, Тандурустӣ ва экология, ҲАНГОМА ПАҲЛАВОНОВА
«Занамро танҳо духтури ҷинси зан бояд муоина кунад!»

«Занамро танҳо духтури ҷинси зан бояд муоина кунад!»

Ҳаёти иҷтимоӣ, Таҳқиқи журналистӣ, НОСИРҶОН МАЪМУРЗОДА
Қафомонии ақлии кӯдакон ва наврасонро сабаб чист?

Қафомонии ақлии кӯдакон ва наврасонро сабаб чист?

Тандурустӣ ва экология
Ҳушёр бошед! Сигор қувваи мардиро суст мекунад

Ҳушёр бошед! Сигор қувваи мардиро суст мекунад

Тандурустӣ ва экология
Ҳамеша дар хизмати мардум хоҳам буд

Ҳамеша дар хизмати мардум хоҳам буд

Тандурустӣ ва экология, ҲАНГОМА ПАҲЛАВОНОВА