ХОВАЛИНГ. САЙЁҲОНИ ХОРИҶӢ АЗ МАВЗЕҲОИ САЙЁҲИ ДИДАН НАМУДАНД

Муҳаррир: Суҳроби Рустам аз 30 апрел, Бахш: Ҳокимияти давлати / Матлабҳои охирин / Хабари рӯз / Туризм / Хабарҳо, Боздид 0

Дар ноҳияи зебоманзари Ховалинг рафти пешвозгирии сайёҳони хориҷӣ дар фазои гарму самимӣ баргузор гардид. Меҳмононро раиси ноҳияи Ховалинг Рауфзода Саймумин Тоҷиддин ва дигар масъулини мақомоти иҷроияи ҳокимияти давлатии ноҳия самимона истиқбол намуданд.

Сокинони ноҳия меҳмононро бо рӯҳияи баланди меҳмоннавозии тоҷикона пешвоз гирифта, барномаи рангини фарҳангӣ, иборат аз рақсу сурудҳои миллӣ ва намоиши либосҳои анъанавиро манзури онҳо гардониданд. Ин ҳама ҷузъиёти фарҳангӣ дар дили сайёҳон таассуроти амиқ гузошта, аз ғановати тамаддуни миллӣ дарак дод.

Меҳмонон зимни боздид аз ин гӯшаи зебои кишвар аз манзараҳои нотакрори табиат, ҳавои мусаффо ва муҳити орому дилфиреби Ховалинг ба ваҷд омада, таассуроти нек бардоштанд. Кӯҳҳои сарбафалаккашида, чашмасорҳои зулол ва табиати сабзу хуррам барои онҳо як таҷрибаи фаромӯшнашаванда гардид.

Ҳамзамон, ба сайёҳон ёдгориҳои таърихӣ ва мавзеъҳои фарҳангии ноҳия муаррифӣ карда шуданд. Ин маконҳо, ки таърихи куҳани халқи тоҷикро таҷассум менамоянд, таваҷҷуҳи хоси меҳмононро ба худ ҷалб карданд.

Ҳунарҳои мардумӣ низ дар маркази таваҷҷуҳи сайёҳон қарор гирифтанд. Маҳсулоти дастии ҳунармандон, аз ҷумла гулдӯзӣ ва қолинбофӣ, на танҳо ҳамчун намунаи ҳунари волои миллӣ, балки ҳамчун туҳфаҳои хотиравӣ мавриди писанди меҳмонон қарор гирифтанд.

Ба иттилои масъулон, солҳои охир таваҷҷуҳи сайёҳони хориҷӣ ба ноҳияи Ховалинг рӯ ба афзоиш дошта, ин минтақа тадриҷан ба яке аз самтҳои муҳими сайёҳӣ табдил ёфта истодааст. Чунин иқдомҳо дар самти муаррифии имкониятҳои сайёҳӣ ва фарҳангии ноҳия нақши муҳим мебозанд.

Коршиносон бар онанд, ки бо рушди инфрасохтори сайёҳӣ ва баланд бардоштани сатҳи хизматрасонӣ, имкониятҳои ҷалби бештари сайёҳон боз ҳам васеъ мегарданд. Ин раванд, дар навбати худ, ба рушди иқтисоди маҳаллӣ ва муаррифии фарҳанги миллӣ дар сатҳи байналмилалӣ мусоидат хоҳад кард.

Ховалинг бо табиати афсонавӣ, таърихи бой ва меҳмоннавозии самимии сокинонаш метавонад ба яке аз марказҳои асосии сайёҳии кишвар табдил ёбад ва дар хотири ҳар як меҳмон хотираҳои нек боқӣ гузорад.

Алишери Абдулмаҷид

“Хатлон”