«Эҳёи водии лабташна»

Чанде пеш таҳти ин ном китоби нави журналисти варзида, Корманди шоистаи Тоҷикистон, собиқ корманди рӯзномаи «Хатлон» Аъзам Мӯсоев ба нашр расид. Дар он роҷеъ ба таърихи қадим ва эҳёи водии зархези Вахш, заҳмати бунёдкорони ин иншооти муҳим маълумоти фаровон ҷамъоварӣ шудааст.

Дар китоб қайд шудааст, ки замони шуравӣ, аниқтараш дар доираи панҷсолаи якуми тараққиёти хоҷагии халқи ИҶШС (солҳои 1928-1933), азхудкунии заминҳои нав, бунёди корхонаҳои азими саноати вазнин ва ғайра ба нақша гирифта, марҳила ба марҳила амалӣ шуданд. Бунёди низоми ирригатсионии Вахш низ қатори 150 иншооти муҳими ИҶШС сохтмони зарбдори умумииттифоқӣ эълон шуда буд. 12-уми сентябри соли 1933 оби дарёи Вахш ба канали магистралии Вахш ҷорӣ гардид.

Муаллиф дар китоб корнамоиҳои сокинони минтақаҳои гуногуни Тоҷикистон ва намояндагони халқҳои дигари шуравиро дар эҳё ва шукуфонии водии Вахш воқеъбинона, бо далелҳои мушаххас ва содаю ҷолиб ба қалам додааст. Китоби «Эҳёи водии лабташна» ба муносибати 90-солагии ба кор андохтани системаи обёрии Вахш таҳия ва ба нашр расидааст.