Дар як сатр
» » Чаро омӯзгор бо либоси хоси наварӯсон ба мактаб меояд?

Чаро омӯзгор бо либоси хоси наварӯсон ба мактаб меояд?

11-11-2015, 10:00


Чаро омӯзгор бо либоси хоси наварӯсон ба мактаб меояд?Бо мақсади пешгирӣ намудани ҳолатҳои аз раванди таълим дур мондани мактаббачагон, таъмини иштироки онҳо ба дарсҳо, риояи пӯшидани сару либоси мактабӣ, омӯзиши вазъи зимистонгузаронӣ ва ҳолати санитарии мактабҳо, рафти иҷрои Қонуни Ҷумҳурии Тоҷикистон «Дар бораи масъулияти падару модар дар таълиму тарбияи фарзанд», тибқи дастур ва нақшаи кории бахши ҳуқуқи кӯдаки мақомоти иҷроияи ҳокимияти давлатии вилояти Хатлон, дар мувофиқа ва ҳамкорӣ бо мақомоти дахлдори вилоят, Раёсати маориф, ВАО-и Хатлон, Маркази назорати давлатии санитарию эпидемиологии вилоят ва Хадамоти пешгирии ҳуқуқвайронкуниҳо миёни ноболиғону ҷавонони Раёсати Вазорати корҳои дохилӣ дар вилояти Хатлон, ахиран дар ноҳияи Бохтар амалиёти муштарак доир гардид.

Ба иттилои Хатича Бегова, мудири бахши ҳуқуқи кӯдаки мақомоти иҷроияи ҳокимияти давлатии вилояти Хатлон, бо ин мақсад фаъолияти муассисаҳои таълимии №7, №2, №54, №12 ва №6-и ноҳияи Бохтар интихобан мавриди санҷиш қарор дода шуданд. Зимни гузаронидани амалиёт дар муассисаи таълимии №12, ки соли 2014 бо иштироки Президенти кишвар Эмомалӣ Раҳмон ба истифода дода шуда буд, толибилмон ҳангоми соати дарсӣ бекор менишастанд. Ҳарчанд аз замони ба истифода додани чунин як мактаби замонавӣ як сол сипарӣ шуда бошад ҳам, омӯзгорон бо дасту дили гарм кору фаъолият намекунанд. Инчунин ошпазхона, ҳуҷраҳои кории омӯзгорон, хонаи муаллимон ба ҳолати санитарӣ ҷавобгӯ набуданд.

- Муассисаи таълимии №6 низ ба чунин ҳолат гирифтор буд, - мегӯяд Х. Бегова, мудири бахши ҳуқуқи кӯдаки вилоят. - Ин муассиса аз тарафи барномаи озуқа бо хӯрока таъмин карда мешавад, аммо зимни амалиёт маълум гардид, ки хонандагон тайи чанд рӯзи охир таом нахӯрдаанд. Барои иҷро нагардидани талаботи қоида ва меъёрҳои санитарӣ ва саривақт интиқол надодани партовҳои ҳудуди муассиса, нисбати шахси мутасаддӣ, мувофиқи моддаи №112 қисми 1 ҷарима баста шуд. Низоми пӯшидани сару либоси мактабӣ дар ин муассиса аз тарафи омӯзгорон ва хонандагон риоя намешавад. Ҳатто дар ин мактаб манбаи мустақили оби нӯшокӣ вуҷуд надорад. Дар ин мактаб гӯшаи Қонуни Ҷумҳурии Тоҷикистон «Дар бораи масъулияти падару модар дар таълиму тарбияи фарзанд» овехта нашудааст. Қисми зиёди омӯзгорони ин муассисаи таълимӣ ҳатто дар бораи кай қабул гардидани қонуни мазкур ва аз чанд бобу модда иборат буданаш маълумот надоранд.

Камбудӣ ва бемасъулиятию беаҳамиятии омӯзгорони мактаби №7 низ нисбат ба қонуни мазкур дар рафти санҷиш маълум гардид. Нақша-чорабиниҳо оид ба ин қонун аз тарафи директори мактаб барои соли 2015 тасдиқ гардида бошад ҳам, ягон ахбор ва протоколи маҷлисҳои гузаронидашуда ёфт нагардид.

Дар муассисаҳои таълимии №2 ва №54 мушкилоти мактабҳои дар боло зикргардида ҷой дошт. Ошхонаи ин муассисаҳо дар ҳолати ғайрисанитарӣ қарор дошта, омӯзгорон бе нақшаи таълимӣ дарс мегӯянд. Дар мактаби №54 омӯзгори фанни забон ва адабиёт бо либосе, ки хоси наварӯсон асту диққати хонандагонро ҷалб мекунад, дохили мактаб гардид. Ҳангоми аз дафтари муаллима дидан кардан маълум шуд, ки худи омӯзгор ба хатоӣ роҳ дода, ба ҷойи «забон» - «зобон» ва ба ҷойи «синф» - «синиф» навиштааст.

Гурӯҳи корӣ ҳолати воқеиро, ки мавриди санҷиш қарор дода буд, дар бинои муассисаи таълимии №1 бо иштироки директорони муассисаҳои таълимии миёнаи умумии ноҳия мавриди баррасӣ қарор дода, ҷиҳати ислоҳи камбудиҳои ҷойдошта ба масъулин дастур ва маслиҳатҳои методӣ дод.

Ҳангомаи ИСМАТ


Шарҳи хонандагон +

Матолиби дигар:

С. Шерзода: «Омӯзгорони ҷавонро бояд дилгарм созем»

С. Шерзода: «Омӯзгорони ҷавонро бояд дилгарм созем»

Хабарҳо, Маориф ва илм
Темурмалик. Бунёди бинои мактаб дар Кушкия

Темурмалик. Бунёди бинои мактаб дар Кушкия

Хабарҳо, Маориф ва илм, ҲАНГОМА ПАҲЛАВОНОВА
Ҷаримаи 100 дорухона барои риоя накардани гигиена

Ҷаримаи 100 дорухона барои риоя накардани гигиена

Хабарҳо, Тандурустӣ ва экология, НИЗОМИДДИН ИСОЕВ
Н. Хусрав. Таҳсили 3528 хонанда дар синфҳои ӯзбекӣ

Н. Хусрав. Таҳсили 3528 хонанда дар синфҳои ӯзбекӣ

Хабарҳо, Маориф ва илм
Тақдири насли пешбарандаи давлат дар дасти омӯзгор аст

Тақдири насли пешбарандаи давлат дар дасти омӯзгор аст

Ҷавонон ва варзиш, Маориф ва илм