Дар як сатр
» » Шӯрои уламо: «Дар симои ҳар ҷелакпӯш муллоро набинед!»

Шӯрои уламо: «Дар симои ҳар ҷелакпӯш муллоро набинед!»

7-04-2017, 09:35

Шӯрои уламо: «Дар симои ҳар ҷелакпӯш муллоро набинед!»


Чандест, ки филмҳои туркӣ ба мисоли «Ҳомиён», «Садбарги сиёҳ», «Садоқат» ва ба инҳо монанд мардумро чунон шефтаи худ кардаанд, ки қариб ҳамаи хонавода онҳоро бо шавқ тамошо мекунанд. Бештари оилаҳои тоҷик, бахусус, хонаводаҳои рустоӣ ҳар ҳафта на кам аз 2 - 3 филми туркӣ харидорӣ мекунанд.

Ҳунармандони турк ахиран филмеро бо номи «Ҳидоят» ба қавли дигар «Муллои замонавӣ» - ро рӯйи навор оварданд, ки ҳаводоронаш танҳо дар Тоҷикистон ҳисоб надорад. Филми мазкур аз ҳаёти марде қисса мекунад, ки дар ҳама нақш (мулло, дузд, накукор, наҷотбахши одамон, домоди беназир ва ғайра) хуб бозида, бинандаро дар ҳайрат мемонад.

Миёни мардум сару садо зиёд шуд, ки гӯё ин филм лаҳзаҳои тарбиявӣ низ дорад ва тамошои он қобили қабул аст. Вобаста ба ин аз масъулони Маркази исломии Тоҷикистон суол кардем.

Дар посух Шӯрои уламо бо такя ба саҳифаҳои 158-159 - и китоби “Фиқҳи муосир” зикр кардааст, ки назари аҳли ислом дар бораи синамо чунин аст: “Бояд асли филм ва моҳияти он аз ҳар гуна фисқу гуноҳ ва ҳар чизе, ки ба ақоид, дастурот ва одоби исломӣ мухолиф аст, дур бошад. Аммо филмҳое, ки боиси таҳрики ғаризаи ҷинсӣ, ташвиқ ба гуноҳу иртикоби амалҳои нодуруст ва таблиғи афкор ва ақоиди ботил бошанд, тамошои онҳо мамнуъ аст. Агар муҳтавои онҳо аз ин гуфтаҳо орӣ бошанд, боке надорад”.

Қаблан низ Шӯрои уламои Маркази исломии Тоҷикистон филми туркии “Муллои замонавӣ” ё "Ҳидоят"- ро аз як тараф гуноҳ ва аз тарафи дигар дарси ибрат барои онҳое хондааст, ки дар симои ҳар ҷелакпӯш муллоро мебинанд.

Филми туркии “Муллои замонавӣ”, ки ба забони тоҷикӣ тарҷума шудаасту дар Тоҷикистон бинандаи зиёд дорад, як ҷинояткори фирорӣ, ки аз умури дин ҳеҷ огоҳӣ надорад, бо пӯшидани либоси рӯҳонӣ ҳамчун имомхатиб қабул мешавад ва чун мулло ба мардум фатво медиҳад. Ҳамчунин ҳунармандони тоҷик ба мисоли Ташриф Халилов, ки дар ин филм овоз додаанд, аз худ ибораҳои зиёди қабеҳу гӯшхарошро илова карда, бинанда ва шунавандаро нороҳат месозанд. Вале ба қавли баъзе тамошобинон, онҳо аз садоҳои масхараомези Ташриф ҳаловат мебаранд.

Н. Муродов, бинандаи дои-мӣ ва мухлиси ашадии филми «Ҳидоят» ё «Муллои замонавӣ» дар суҳбат чунин гуфт: «Ин филм ҳаҷву шӯхиҳои зиёд дорад ва ман аз дигар филмҳо дида ба он таваҷҷуҳи бештар дорам. Ҳар қисми нави онро бесаброна интизорӣ мекашам. Аз ҳама бештар маро ҳунарнамоии «Шафқат», дӯсти наздики он мулло ба шавқ меорад.

Ба андешаи М. Наврӯз, ӯ дигар филмҳои туркӣ, аз ҷумла «Ҳомиён», «Садбарги сиёҳ», «Водии гургон» ва «Фирорӣ»-ро низ тамошо мекунад, вале миёни онҳо филми «Ҳидоят» ё «Муллои замонавӣ» барояш ҷойгоҳи хос дорад.

Ёдовар мешавем, ки оид ба ин мавзӯъ Президенти кишвар муҳтарам Эмомалӣ Раҳмон низ зимни баромад дар Паёми соли 2015 ба Маҷлиси Олии Ҷумҳурии Тоҷикистон аз филмҳои туркӣ изҳори нигаронӣ ба амал оварда иброз доштанд, ки имрӯз ба кадом хонае ворид шавӣ хурду калони оила ба тамошои ин филмҳо машғуланд.

Филмҳои туркӣ имрӯз дар ҷомеа мавқеи хос пайдо карда, рӯз то рӯз теъдоди ҳаводоронашон бештар мешаванд. Зарур аст, ки пеши роҳи чунин филмҳо ҳарчи зудтар гирифта шуда, ба ивази он филмҳои тарбиявию ахлоқии тоҷикӣ рӯи навор ояд.

Лашкар ШАРИФЗОДА,
узви ИЖТ, барои рӯзномаи «Хатлон»



Шарҳи хонандагон +

Матолиби дигар:

Синамои тоҷик: Аз филмҳои шуҳрати ҷаҳонӣ, то масхарабозию таҳқири забон

Синамои тоҷик: Аз филмҳои шуҳрати ҷаҳонӣ, то масхарабозию таҳқири забон

Хабарҳо, Фарҳанг ва адабиёт, ҲАНГОМА ПАҲЛАВОНОВА
Таклиф мекунам, ки…

Таклиф мекунам, ки…

Фарҳанг ва адабиёт, Ҳаёти иҷтимоӣ, Хабарҳо
«Асрори тақдир» муаррифӣ гардид

«Асрори тақдир» муаррифӣ гардид

Фарҳанг ва адабиёт, Хабарҳо
Наворбардории филми «Асрори тақдир» дар Қӯрғонтеппа

Наворбардории филми «Асрори тақдир» дар Қӯрғонтеппа

Фарҳанг ва адабиёт, Хабарҳо, Ҷавонон ва варзиш, НОСИРҶОН МАЪМУРЗОДА
Мусодира ва маҳви 110 ҳазор фитаи филмҳои пастсифат

Мусодира ва маҳви 110 ҳазор фитаи филмҳои пастсифат

Фарҳанг ва адабиёт, Хабарҳо, НОСИРҶОН МАЪМУРЗОДА