Дар як сатр
» » Н. Саид: «Номувофиқ гузоштани баҳо ба дониши хонандагон истиқлолияти кишварро зери хатар мегузорад»

Н. Саид: «Номувофиқ гузоштани баҳо ба дониши хонандагон истиқлолияти кишварро зери хатар мегузорад»

12-11-2015, 11:41

Н. Саид: «Номувофиқ гузоштани баҳо ба дониши хонандагон истиқлолияти кишварро зери хатар мегузорад»

Дар толори мактаби рақами 1-и ноҳияи Восеъ вохӯрии вазири маориф ва илми ҷумҳурӣ Нуриддин Саид бо мудирони шуъбаҳои маорифи навоҳии минтақа, директорон, муҳосибон ва китобдорони мактабҳои ноҳия баргузор гардид.


Бино ба иттилои дафтари матбуотии Вазорати маориф ва илми Ҷумҳурии Тоҷикистон, зимни вохӯрӣ Мӯсо Ғафурзода, раиси ноҳияи Восеъ, Ғозӣ Мирзоев, кормандони Маркази таҳия, нашр ва муомилоти китобҳои дарсӣ, илмию методӣ ВМИ Комилшоҳ Исоев (директор), Маҳина Бобоева (сармутахассис), сармуҳаррири маҷаллаи «Маърифати омӯзгор» Саида Набиева, сардори Раёсати маорифи вилоят Ҳокимхон Вализода, китобдори минтақавӣ Рустам Пираков иштирок доштанд.

Дар оғоз Ҳ. Вализода ҳозиринро бо рӯзномаи ҷаласа шинос намуд. Дар ҷаласа ба масъалаҳои омодагӣ ба олимпиадаҳои хонандагон ва имтиҳонҳои мутамарказонидашудаи дохилшавӣ, тайёрӣ ба зимистонгузаронӣ ва тартиби иҷораи китобҳои дарсӣ дахл карда шуд.

Китобдори минтақавӣ Рустам Пираков дар бораи вазъи иҷораи китобҳои дарсӣ ва пардохти маблағи онҳо гузориш дод. Зимни баромад нигаронӣ аз ин ҳолат зиёд эҳсос гардид.

Сипас, вазири маориф ва илми ҷумҳурӣ Нуриддин Саид дар хусуси нақши мактаб, китоб ва омӯзгор сухан карда, аз таваҷҷуҳи пайвастаи Ҳукумати Ҷумҳурии Тоҷикистон, бахусус, Сарвари давлат Эмомалӣ Раҳмон изҳори қаноатмандӣ намуд. Вазир мавқеи омӯзгорро дар рушди сифати таҳсилот баланд арзёбӣ намуда, аз номувофиқатии баҳо бо дониши хонандагон интиқод кард.

- Агар аз ин амал, яъне номувофиқ гузоштани баҳо ба дониши хонандагон ҷилавгирӣ накунем, истиқлолияти кишварро зери хатар мегузорем, - таъкид намуд Нуриддин Саид. – Мо бояд ҳар чӣ бештар роҳҳои ислоҳи нуқсонҳои мавҷуда ва пешрафти корро муайян намоем. Фикр мекунам, ташкил намудани мактабҳои такягоҳӣ яке аз омилҳои асосӣ дар ин маврид мебошад. Омили дигар баланд бардоштани такмили ихтисоси омӯзгорон аст, ки то ҳанӯз қонеъкунанда буда наметавонад. Дониши хонандаи имрӯзро мо бо таҳсилоти миёнаи умумӣ ва ё ғайриихтисос наметавонем мукаммал гардонем. Масъалаи дигаре, ки имрӯз ташвишовар гаштааст, ба кӯркӯрона интихоб намудани касб рабт дорад. Низоми имтиҳонҳои мутамарказонидашудаи дохилшавӣ бори дигар инро собит сохт. Фаҳмондадиҳӣ бояд дар ин самт бештар гардад.

Вазир дар масъалаи ҷалби раисони ноҳияҳо ва соҳибкорони ватанӣ ба мактабу маориф аз тарафи мудирони шуъбаҳои маориф, дар робита ҳалли мушкилоти зимистонгузаронӣ, таҷҳизонидани кабинетҳои фаннӣ, бунёди мактабу кӯдакистон ва марказҳои инкишофи кӯдакон, ташкили муассисаҳои таълимии хусусӣ ва паҳлуҳои дигари соҳа ҳарф зада, иштирокдоронро ба масъулиятшиносии бештар водор намуд.

Нуриддин Саид дар роҳи бартараф намудани зуҳуроти хешутаборчигӣ, ҷилавгирӣ аз бегонапарастӣ ва гаравидан ба ҳаракатҳои иртиҷоӣ зарурати таъмини китобхонаҳои мактабиро бо китобҳои бадеӣ шарти муҳим донист.

- Дуруст аст, ки Вазорати маориф ва илм барои эҳёи китобхонаҳои мактабӣ тамоми тадбирҳоро меҷӯяд, аз ҷумла, чопи китобҳои бадеии бачагона аз осори адибони классику муосири тоҷику ҷаҳонро роҳандозӣ намудааст. Аммо чаро мо аксияи китобҳои бадеиро ташкил накунем, дар ҳоле ки ҳазорҳо китобҳои хуби бадеиро дар дасти фурӯшандагони кӯчагӣ дидан мумкин аст? - гуфт вазир.

Вазъи пардохти маблағи иҷоравии китобҳои дарсӣ аз масъалаҳои муҳими соҳа аст, ки бе назардошти он хонандагонро бо китобҳои дарсӣ таъмин карда наметавонем. Мутаассифона, на ҳамеша ва на аз тарафи ҳамаи масъулин ин маънӣ ба дурустӣ дарк карда мешавад. Бояд ба назар гирифт, ки чопи китобҳои дарсӣ маҳз ба ҳамин нукта, яъне, низоми ҷамъоварии маблағҳои он вобастагӣ дорад. Нуриддин Саид ба масъалаи обуна ба нашрияҳои соҳавӣ ва зарурати дастрасӣ ба рӯзномаву маҷаллаҳо низ дахолат намуд. Зикр шуд, ки обуна ба нашрияҳои соҳавӣ як омили муҳими баланд бардоштани такмили донишу касбияти омӯзгорон аст ва саҳлангорӣ ба он мувофиқи мақсад нест. Дар ин роҳ робита бо АВО, мақомоти иҷроияи ҳокимияти давлатӣ ва соҳибкорони ватанӣ метавонад натиҷа оварад.

Комрони БАХТИЁР


Шарҳи хонандагон +

Матолиби дигар:

Вохӯрии Давлаталӣ Саид бо соҳибкорони Хатлон

Вохӯрии Давлаталӣ Саид бо соҳибкорони Хатлон

Иқтисоду тиҷорат, Хабарҳо, НОСИРҶОН МАЪМУРЗОДА
Чаро омӯзгор бо либоси хоси наварӯсон ба мактаб меояд?

Чаро омӯзгор бо либоси хоси наварӯсон ба мактаб меояд?

Фарҳанг ва адабиёт, Хабарҳо, Маориф ва илм, ҲАНГОМА ПАҲЛАВОНОВА
С. Шерзода: «Омӯзгорони ҷавонро бояд дилгарм созем»

С. Шерзода: «Омӯзгорони ҷавонро бояд дилгарм созем»

Хабарҳо, Маориф ва илм
Дар мактабҳои вилоят 777 омӯзгор намерасад

Дар мактабҳои вилоят 777 омӯзгор намерасад

Хабарҳо, Маориф ва илм, ҲАНГОМА ПАҲЛАВОНОВА
«Интихоби ман - маҳсулоти ватанӣ»

«Интихоби ман - маҳсулоти ватанӣ»

Хабарҳо, Маориф ва илм