Дар як сатр
» » Ҳусни ҳаёту файзи зиндагонии мо аз модар аст

Ҳусни ҳаёту файзи зиндагонии мо аз модар аст

7-03-2015, 10:57

Паёми табрикии раиси вилояти Хатлон
Давлатшоҳ Гулмаҳмадзода
бахшида ба Рӯзи модар


Ҳусни ҳаёту файзи зиндагонии мо аз модар аст

Модарону хоҳарони азиз!
Бонувони меҳрубону арҷманд!


Модар дар тамаддуни куҳани мо мақом ва нақши муҳим дорад. Меҳру муҳаббати ӯ ба фарзандон, танзими зиндагӣ, роҳбарии дохилии хона ва фазои орому осудаи оиларо таъмин месозад ва тоҷи шараф гарде аз роҳи модарон аст.

Чи хеле ки Президенти кишвар, Ҷаноби Олӣ, муҳтарам Эмомалӣ Раҳмон қайд намудаанд, «Маҳз модар дар қалби фарзандон тухми меҳру муҳаббат, дӯстиву рафоқат ва некиву накӯкориро мекорад, то оянда насли наврас чун ашхоси масъулиятшиносу меҳнатқарин, ободкору инсондӯст ва ватанпарвар ба камол расад. Бузургони гузаштаи адабу фарҳанги мо бо дарназардошти ин нуқтаҳои ниҳоят муҳим гуфтаанд: Як модари хуб ба сад устод ва омӯзгор меарзад. Ин нақши созандаи модар дар камолоти шахсияти фарзанд ба ҳисоб меравад ва солеҳтарин фарзандон онҳое ҳастанд, ки бо аъмоли неку писандида боиси ифтихори падару модари худ шаванд».

Модар ба истилоҳ вожае мебошад, ки дар тамоми забонҳои ҷаҳон оҳанги навозишкорона дорад ва ҳар қадаре, ки муҳаббати инсоният ба модар зиёд бошад, ҳаёт ҳамон қадар фараҳбахшу дурахшон мегардад. Ҳусни ҳаёту файзи зиндагонии мо аз модар аст ва ӯ ситораи дурахшонест, ки бо нерӯмандии атокардаи Худои мутаол роҳи фарзандро дар тӯли зиндагӣ равшан месозад. Бузургиву зебоӣ, бонангу номус будан, далериву шуҷоатмандӣ, озодихоҳиву адолатпарварӣ ва ҳунармандиву кадбонугии зан – модар дар асотири дирӯзу имрӯз хеле олӣ ва воло васф гардида, симои аслии занро инъикос намудааст.

Ҳанӯз дар аҳди бостон ҷашне бо номи «Сипандормуз» вуҷуд дошта, рӯзи панҷуми моҳи исфанд таҷлил гашта, фариштаи Сипандормуз дар ҷаҳони маънавӣ посдори ишқу муҳаббат, фурӯтаниву бурдборӣ, садоқату фидокорӣ ва дар ҷаҳони моддӣ посбону пуштибони занони неку порсо будааст. Дар ҷашни «Сипандормуз» сурудҳои хоси «Дуруд бар зан, дуруд ба зиндагӣ» суруда мешуд, ки он дуои нек дар ҳакқи занон буда, ба ин васила мардон ба модарону хоҳарон ва ҳамсарону духтарон рӯзи хуш ва рӯзии фаровон мехостанд.

Фарҳанги тоҷик дар тӯли ҳазору панҷсад соли охир бо дини мубини ислом омезиш ёфта, арзишҳои он дар танзиму такмили зиндагии иҷтимоии халқи мо нақши ниҳоят муассир гузошт. Шинохти ҷойгоҳ ва ҳуқуқи зан дар таълимоти дини ислом мақоми хос дорад ва наҷобату шарофат, инчунин баробарии фитрии занону мардон дар каломи осмонии Худованди муттаол – Қуръони маҷид борҳо таъкид шудааст.

Сатҳи маърифати ҷомеа ва нуфузу эътибори он аз рӯйи муносибат ба зан, ба модар муайян карда мешавад. Аз рӯи он арзёбӣ мегардад, ки занон то чӣ андоза соҳибмаърифату соҳибкасбанд ва то чӣ андоза дар ҳаёти ҷомеа фаъол мебошад.

Бузургтарин рисолати модари тоҷик аз азал тарбияи фарзандони нобиғаву хирадманд, ватандӯсту ватанпараст, бонангу номус, далеру шуҷоъ, озодихоҳу адолатпарвар ва ҳунарманду созанда будааст, ки фарзандони фарзонаеро мисли Рӯдакӣ, Фирдавсӣ, Ибни Сино, Умари Хайём, Носири Хусрав, Ҷалолиддини Балхӣ, Ҷомӣ, Аҳмади Дониш, Исмоили Сомонӣ, Садриддин Айнӣ, Бобоҷон Ғафуров, Мирзо Турсунзода, Эмомалӣ Раҳмон ба дунё оварда, дар домани муҳаббати поки худ парварида, барои хизмати башарият додааст.

Ҳукумати Тоҷикистон ҳанӯз аз оғози истиқлолият вобаста ба таҳкими мақому манзалат ва таъмини риояи ҳуқуқи конститутсионии занон тамоми тадбирҳои заруриро андешида, онҳоро мутобиқи меъёрҳои ҷомеаи демократӣ, ҳуқуқбунёд ва дунявӣ амалӣ мегардонад. Ҳадаф аз қабули ин санадҳо, пеш аз ҳама, арҷгузорӣ ба ҳуқуқу озодиҳои занон, баланд бардоштани мақоми зан дар ҷомеа, тавсеаи нақши зан дар ҳаёти сиёсӣ ва иқтисодиву иҷтимоии мамлакат, фароҳам овардани шароити мусоид барои фаъолияти занону бонувон мебошад. Мақомоти иҷроияи ҳокимияти давлатии вилояти Хатлон дар радифи сиёсати пешгирифтаи Ҳукумати Ҷумҳурии Тоҷикистон ва Президенти кишвар, Ҷаноби Олӣ, муҳтарам Эмомалӣ Раҳмон роҷеъ ба баланд бардоштани мақоми зан дар ҷомеа, таъмин намудани баробарҳуқуқии мардону занон, тарбия, интихоб ва ҷобаҷогузории кадрҳои роҳбарикунанда, аз ҷумлаи занону духтарони лаёқатманд, дар вилоят чораҳои дахлдор андешида, имрӯз 4290 нафар занон дар вазифаҳои роҳбарикунандаи соҳаҳои мухталифи хоҷагии халқи вилоят кору фаъолият доранд, ки аз ин шумора 2812 нафарашон роҳбарони хоҷагиҳои деҳқонӣ мебошанд.

Яке аз масъалаҳои муҳимтарини ҳаёти имрӯзаи ҷомеаи мо ташаккули тарзи зиндагии солим, фароҳам овардани шароит барои модару фарзанди солим ва ташкили оилаи солим мебошад. Ин масъала, пеш аз ҳама, ба мунтазам беҳтар намудани сатҳу сифати зиндагии мардум, ҳифзи саломатии занону модарон, баланд бардоштани сатҳи маърифати онҳо ва тарбияи насли аз ҷиҳати ҷисмонӣ ва маънавӣ солим, яъне ба масъалаи оилаи устувор дахл дорад. Зеро оила ниҳоди асосии ҷомеа, манбаи парваришу тарбияи нерӯи солими зеҳниву ҷисмонӣ ва идомадиҳандаи наслҳо ҳисоб ёфта, агар ободиву суботи ҷомеа аз осоишу оромии ҳар як оила вобаста бошад, дар навбати худ ободии ҳар як хонадон аз рӯҳияи поку созанда, сатҳи маърифат ва саломатии зан-модар вобаста аст.

Нақши модар махсусан дар тарбия, омӯхтани забон, таъриху фарҳанг, донишҳои муосир ва умуман камолоти маънавию ахлоқии фарзанд барҷаста ва ҳатто муайянкунанда мебошад. Аз ин рӯ, фаромӯш набояд кард, ки волидайн ва махсусан модарони имрӯза фарзандони худро ба камол расонида, ҳамзамон таърихи ояндаи Ватани хеш, гузашта аз ин таърихи ояндаи башарро эҷод мекунанд. Бинобар ин, худи модарон бояд соҳибмаърифату бофарҳанг ва дорои ҷаҳонбинии васеъ бошанд, то ки дар тарбияву парасторӣ, камолоти маънавию ҷисмонӣ ва ба ҳаёти мустақилона омода кардани фарзандонашон нақшу мақоми онҳо ба хубӣ эҳсос гардад.

Яъне, таълиму тарбияи фарзандон, пеш аз ҳама, вазифаи муқаддаси падару модарон ва баъдан мактабу ҷомеа буда, бо дарназардошти мушкилоту масъалаҳои дар ин самт ҷойдошта, аз ҷумла мустаҳкам намудани робитаи оила бо мактаб баъд аз муҳокимаи васеъ бо аҳли ҷомеа Қонуни Ҷумҳурии Тоҷикистон «Дар бораи масъулияти падару модар дар таълиму тарбияи фарзанд» қабул карда шуд, ки ҳадафи асосӣ аз қабули ин қонуни миллӣ ба воя расонидани насли солиму тарбиядида ва тайёр намудани мутахассисони баландихтисосу соҳибмаърифат мебошад.

Дар вилоят барои аз ҳисоби ҷавондухтарони лаёқатманд тайёр кардани кадрҳои педагогиву тиббӣ, ҷалб намудани онҳо ба касбу ҳунаромӯзӣ, ташкили корхонаҳои коркарди маҳсулоти кишоварзӣ, заргариву дӯзандагӣ ва рушди соҳибкории хурду миёна аз имкониятҳои мавҷуда самаранок истифода намуда, барои таъминоти занон бо кор ва фароҳам овардани шароити хуби корӣ зина ба зина тадбирҳо андешида шуда истодааст.

Имрӯз мавқеи занони тоҷик дар тамоми корҳои давлатию ҷамъиятӣ мусбат арзёбӣ гардида, иштироки фаъолонаи онҳо дар ҳаёти сиёсию фарҳангии кишвар боиси комёбӣ ва муваффақиятҳои давлатдориамон мебошад.

Бо Фармони Президенти Ҷумҳурии Тоҷикистон аз 3 феврали соли 2015, №352 эълон шудани соли 2015 «Соли оила» масоили печопечи маърифати хонаводагӣ, риояю пос доштани суннатҳои оиладории миллӣ ва таълиму тарбияи фарзандонро бозгӯ намуда, баҳри пешгирии омилҳою зуҳуроти номатлуб марҳалаи наверо боз кард.

Сарвари давлат масъалаи издивоҷи хешовандӣ, никоҳи барвақтӣ, маърифати оиладорӣ ва коҳиш додани пошхӯрии оилаҳои ҷавонро ҷиддӣ ба миён гузоштанд. Итминони комил дорам, ки Шумо модарони азиз ва хоҳарони меҳрубон, ки оинаи беғубор, инъикоси симои зоҳирӣ ва ботинии давлат ва миллати тоҷик мебошед ва сатҳи хираду маърифати миллату давлатро таҷассум менамоед, дар тарбияи насли наврас саҳми арзанда хоҳед гузошт.

Модарону хоҳарони арҷманд!

Дар фароварди ин гуфтаҳо ба ҳамаи Шумо санаи фархундаи Рӯзи модар ва иди баҳору зебоиро, ки бо фарорасиаш замину замонро ҳусну ҷилои тоза мебахшад, табрику таҳният гуфта, бароятон тансиҳативу хонаободӣ ва саодати рӯзгорро таманно менамоям.

Саломату сарбаланд бошед!


Шарҳи хонандагон +

Матолиби дигар:

Ба иҷро даромадани «Барномаи рушди оила дар вилояти Хатлон»

Ба иҷро даромадани «Барномаи рушди оила дар вилояти Хатлон»

Ҳаёти иҷтимоӣ, Хабарҳо, НОСИРҶОН МАЪМУРЗОДА
Зан – модар асоси бахт ва нишони зиндагӣ мебошад

Зан – модар асоси бахт ва нишони зиндагӣ мебошад

Ҳаёти иҷтимоӣ, Хабарҳо
Ҷорӣ намудани дарси маърифати оиладорӣ ба нафъи кор аст

Ҷорӣ намудани дарси маърифати оиладорӣ ба нафъи кор аст

Ҳаёти иҷтимоӣ, Номаҳои Шумо
Гулмаҳмадзода аз бонувони Хатлон ситоиш кард

Гулмаҳмадзода аз бонувони Хатлон ситоиш кард

Ҳаёти иҷтимоӣ, Хабарҳо, ҲАНГОМА ПАҲЛАВОНОВА
Қӯрғонтеппа. Тӯйи суннатии 50 кӯдак ва арӯсии ду ҷуфти ҷавон аз оилаҳои ниё ...

Қӯрғонтеппа. Тӯйи суннатии 50 кӯдак ва арӯсии ду ҷуфти ҷавон аз оилаҳои ниё ...

Ҳаёти иҷтимоӣ, Хабарҳо, АСАЛМО САФАРОВА