Дар як сатр
» » Таъсиси на кам аз 200 ҳазор ҷойи нави кор дар Тоҷикистон

Таъсиси на кам аз 200 ҳазор ҷойи нави кор дар Тоҷикистон

17-02-2015, 16:53

Таъсиси на кам аз 200 ҳазор ҷойи нави кор дар Тоҷикистон


Имрӯз, 17 феврал, ҳайати корӣ аз Дастгоҳи иҷроияи Президенти кишвар оид ба шарҳу эзоҳи Паёми имсолаи Сардори давлат ба Маҷлиси Олӣ бо намояндагони соҳаҳои мухталифи хоҷагии халқи шаҳри Қӯрғонтеппа мулоқоти судманд анҷом доданд.

Кори ҷаласаро Музаффар Ашӯриён, роҳбари ин ҳайат, оғоз намуда, зикр кард, ки ҳадаф аз ин ҷаласа суҳбат дар атрофи нуктаҳои асосии Паёми Президенти мамлакат мебошад.

Гуфта шуд, ки дар паём беш аз 20 масъалаи асосии марбут ба сиёсати дохилию хориҷии мамлакат баррасӣ гардид. Аз ҷумла, татбиқи Стратегияи миллии рушд, роҳандозии пурсамари сиёсати буҷетӣ, пардохти саривақтии музди меҳнату нафақа, рушди арсаи энергетика, раҳоӣ аз бунбасти коммуникатсионӣ, таъмини амнияти озуқаворӣ, таъмини аҳолӣ бо оби тозаи нӯшиданӣ, рушди соҳаҳои саноат ва кишоварзӣ, дастгирии давлатии сармоягузории ватанию хориҷӣ, сиёсати қарзӣ ва дастгирии соҳибкорӣ, дастгирии иҷтимоии гурӯҳҳои осебпазир ва эҳтиёҷманд, масъалаҳои муҳоҷирати меҳнатӣ, таъсиси ҷойҳои нави кор, сиёсат дар соҳаи маориф, таълиму тарбияи фарзанд ва масъулияти падару модар, таъмини амнияти иттилоотӣ ва ҳоказо.

Дар ростои ин гуфтаҳо як қатор факту далелҳо ва нишондиҳандаҳои рушд зикр гардиданд, ки бешубҳа, аз сиёсати дурусти давлату Ҳукумати ҷумҳурӣ бо роҳбарии Президенти кишвар Эмомалӣ Раҳмон шаҳодат медиҳад. Чунончи, дар ин давра маҷмӯи маҳсулоти дохилӣ 45,6 миллиард сомонӣ ва афзоиши воқеии он 6,7 дарсадро ташкил дод. Даромади пулии аҳолӣ 12 фисад афзоиш ёфта, дар қаламрави мамлакат беш аз 252 000 ҷой нави кори доимӣ, муваққатӣ ва мавсимӣ ташкил карда шудааст. Ҳамаи ин дастовардҳо боиси аз 35,6 дарсади қаблӣ ба 32 фисад поин рафтани сатҳи камбизоатӣ дар кишвар гардид.

- Перомуни масъалаҳои ҳалталаб барои давраи навбатии рушди кишвар Сарвари давлат таваҷҷуҳи ҳамагонро ба устувории оила, масъулияти падару модар дар таълиму тарбияи фарзанд, масъулияти омӯзгорон дар ин раванд ва зарурати дарки амнияти иттилоотӣ дар замони муосир ҷалб кард, - гуфт дар идомаи суханронӣ Музаффар Ашӯриён. - Ба ин хотир, соли 2015 аз ҷониби Эмомалӣ Раҳмон «Соли оила» эълон гардид.

Тавре ки Музаффар Ашӯриён тазаккур дод, Роҳбари давлат зимни ироаи паём қайд намуд, ки дар баробари таълим ба масъалаҳои тарбияи наврасону ҷавонон ва тарбияи онҳо дар рӯҳияи ватандӯстию инсонпарварӣ ва худогоҳию худшиносӣ диққат додан муҳим мебошад. Ҳамчунин бо мақсади таъмини ҳифзи ҳуқуқи кӯдакон дар Тоҷикистон институти Ваколатдор оид ба ҳифзи ҳуқуқи кӯдак таъсис дода хоҳад шуд.

Худойбердӣ Холиқназар, директори Маркази тадқиқоти стратегии назди Президенти Ҷумҳурии Тоҷикистон, гуфт, ки иқтисодиёти Ҷумҳурии Тоҷикистон дар мушкилтарин айём бо назардошти вазъи ноороми ҷаҳон ва ҳамчунин буҳрони иқтисодӣ, ки бархе аз мамолики дунёро фаро гирифтааст, рушди устуворро нигоҳ доштааст. Бахусус, дар Русия буҳрони шадиди иқтисодӣ ҳукмрон аст, ки ин, албатта, ба кисаи муҳоҷирони меҳнатии мо бетаъсир намемонад. Аммо Ҳукумати Ҷумҳурии Тоҷикистон тасмим гирифтааст, ки имсол дар кишвар на кам аз 200 ҳазор ҷойи нави кор муҳайё созад. Бояд гуфт, ки вазъияти иқтисодии ҷумҳурӣ имсол андак мушкилтар хоҳад шуд ва бинобар ин Сарвари давлат дар паём таъкид кард, ки миллат бояд сарҷамъ бошад, зеро дар ҳамдастӣ кулли мушкилотро паси сар кардан осонтар аст.
Таъсиси на кам аз 200 ҳазор ҷойи нави кор дар Тоҷикистон

Дар натиҷаи меҳнату машаққатҳои шабонарӯзии Сарвари муҳтарами давлати мо дар 3 соли оянда 6 миллиард доллари амрикоӣ сармояи хориҷӣ ба Тоҷикистон ҷалб хоҳад шуд, ки ин миқдор сармоягузорӣ дар Осиёи Марказӣ камназир аст.

Дар идома Худойбердӣ Холиқназар афзуд, ки ҷавонон бояд аз давлат ва зиндагии осоишта шукргузор бошанд ва ҳеҷ вақт кӯшиши ба гурӯҳҳои ифротгаро шомил шуданро накунанд.

Амонҷон МАҲКАМОВ


Шарҳи хонандагон +

Матолиби дигар:

Рӯ ба рӯ бо мардум

Рӯ ба рӯ бо мардум

Ҳаёти иҷтимоӣ, Хабарҳо, Ҷавонон ва варзиш, Маориф ва илм, АСАЛМО САФАРОВА
Роҳбари давлат: Ҷаҳони муосир ниҳоят тағйирёбанда аст

Роҳбари давлат: Ҷаҳони муосир ниҳоят тағйирёбанда аст

Иқтисоду тиҷорат, Хабарҳо, НОСИРҶОН МАЪМУРЗОДА
Сатҳи камбизоатӣ коҳиш ёфтааст

Сатҳи камбизоатӣ коҳиш ёфтааст

Ҳаёти иҷтимоӣ, Хабарҳо
Эмомалӣ Раҳмон: Фарзандро аз рӯзи таваллудаш бояд тарбия кард

Эмомалӣ Раҳмон: Фарзандро аз рӯзи таваллудаш бояд тарбия кард

Ҳаёти иҷтимоӣ, Хабарҳо, НОСИРҶОН МАЪМУРЗОДА
Оғози ироаи Паёми Президенти кишвар ба Маҷлиси Олӣ

Оғози ироаи Паёми Президенти кишвар ба Маҷлиси Олӣ

Хабарҳо