Дар як сатр
» » Чаро толибилмон кам китоб мехонанд?

Чаро толибилмон кам китоб мехонанд?

19-04-2016, 11:26

Чаро толибилмон кам китоб мехонанд?

Хуштар зи китоб дар ҷаҳон ёре нест,
Дар ғамкадаи замона ғамхоре нест.
Ҳар лаҳза аз ӯ ба гӯшаи танҳоӣ,
Сад роҳате ҳасту ҳаргиз озоре нест.

Оре, мутолиаи китоб зиндагии шахсро мунаввар месозад, ба дилҳо нур мебахшад, мушкилкушо ва равшангари имрӯзу ояндаи ӯст. Таъриху фарҳангу маданияти ҳар қавму миллат маҳз тавассути китоб нигоҳ дошта шуда, тӯли асрҳо аз насл ба насл мегузарад. Дар ҳар маврид барои имрӯзу ояндаро обод кардан муҳим он аст, ки аввал гузаштаро омӯзем, аз кору фаъолият ва панду ҳикмати бузургон воқиф шавем.

Аз ҷумла, Президенти Ҷумҳурии Тоҷикистон Эмомалӣ Раҳмон дар боби китоб ва ситоиши он чунин гуфтааст: «Китоб аст, ки бо нури донишу маърифат роҳи мардумонро равшан сохта, боиси ҳастиву пойдории миллат, таърих, забон, адабиёт ва фарҳанг гардидааст». Дар ҷои дигар Пешвои миллат ба китоб рӯ оварда мегӯяд: «Китоб аст, ки таърихи куҳанбунёди мо, ганҷинаҳои тамаддуни башарӣ, дурдонаҳои назми ҳазорсолаи мо, достонҳо ва илму дониши даврони бостонӣ, хираду заковати наслҳо ва халқҳоро зинда нигоҳ медорад».

Боиси қаноатмандист, ки дар ин мавзӯъ ҳар сари чанд вақт рӯзномаи «Хатлон» низ маводҳо нашр намуда, ба ин махзани дониш рӯ овардани насли ҷавонро талқин месозад. Имрӯз бояд насли нав донад, ки бе китоб ба пешрафт ва шукуфоӣ умед бастан имконнопазир аст. Бояд дар назар дошт, ки дар ҳама давру замон китоб яке аз воситаҳои расонанда ё маҳфуздорандаи шинохти ҳамаҷонибаи масоили илмӣ, фарҳангӣ, иқтисодӣ буд, ҳаст ва хоҳад монд.

Соли равон дар пойтахти мамлакат намоиш ва фурӯши китобҳо аз ҷониби Ҷумҳурии исломии Эрон дар шаҳри Душанбе баргузор гашт. Дар рӯзҳои ҷашни Наврӯз адибон ва шоирони ин ҳавза ба Тоҷикистон ташриф оварда, бо раҳнамоии масъулини Иттифоқи нависандагони Тоҷикистон ба шаҳру навоҳии вилояти Хатлон ва Бадахшони Кӯҳӣ сафар намуда, бо ҳузури худ таҷлили иди Наврӯзро шаҳомати фаромӯшнашаванда бахшиданд. Албатта ин гуна маҳфилҳо бо адибон аз наздик шинос шудани мардум ва оид ба эҷодиёти онҳо суҳбатороӣ кардан мардумро ба китобхонӣ ҳидоят менамояд.

Бале, мо бояд ҳамқадами замон бошем ва аз пешрафти илму техника ва воситаҳои ахбори компютерӣ баҳра бигирем. Маҳз бо ҳамин мақсадҳои неку шоиста дар Тоҷикистони азизи мо шумораи китобхонаҳо зиёд гашта истодаанд.

Мутаассифона, мушоҳидаҳо нишон медиҳанд, ки таваҷҷуҳи донишҷӯён ва толибилмон ба китоб хондану илм омӯхтан коста гардидааст. Онҳо бештар ба телефонбозӣ машғуланд. Интернетро ба мақсади нолозим истифода мекунанд. Ояндаи давлату миллат ба дӯши ҷавонон вогузор шудааст. Ҳар яки моро мебояд, ки барои ободии сарзамини хеш ва рушди ҷомеа дар талош бошем. Пас, биёед китоб бихонем, зеро бузургон гуфтаанд:

Дониш андар дил чароғи равшан аст.
В-аз ҳама бад бар тани ту ҷавшан аст.

Маҳбуба САИДОВА, таҷрибаомӯзи «Хатлон»
дар Кӯлоб



Шарҳи хонандагон +

Матолиби дигар:

Ҳафтаи китоб дар ноҳия

Ҳафтаи китоб дар ноҳия

Фарҳанг ва адабиёт, Хабарҳо, НИЗОРАМОҲИ ҲАМИД
«Китоб ва мусиқӣ барои кӯдакону наврасон»

«Китоб ва мусиқӣ барои кӯдакону наврасон»

Фарҳанг ва адабиёт, Хабарҳо, Маориф ва илм, НОСИРҶОН МАЪМУРЗОДА
Фестивали китоб то 9 апрел идома мекунад

Фестивали китоб то 9 апрел идома мекунад

Фарҳанг ва адабиёт, Хабарҳо, ҲАНГОМА ПАҲЛАВОНОВА
Тасмими ифтитоҳи фурӯшгоҳи нави китоб

Тасмими ифтитоҳи фурӯшгоҳи нави китоб

Фарҳанг ва адабиёт, Хабарҳо, ҲАНГОМА ПАҲЛАВОНОВА
«Корвони китоб» барои сарбозони Хатлон

«Корвони китоб» барои сарбозони Хатлон

Хабарҳо, НОСИРҶОН МАЪМУРЗОДА