ОҒОЗИ ҶАМЪОВАРИИ ПАХТА ДАР ХАТЛОН БО ИШТИРОКИ РАИСИ ВИЛОЯТ ДАВЛАТАЛӢ САИД

Муҳаррир: Суҳроби Рустам аз 17 август, Бахш: Ҳокимияти давлати / Слайдер / Дигар матолиб / Матлабҳои охирин / Хабари рӯз / Арсаи кишоварзӣ / Хабарҳо, Боздид 76

Дар вилояти Хатлон маъракаи ҷамъоварии ҳосили пахта оғоз гардид. Кишоварзони шаҳру ноҳияҳои минтақаи Бохтар, ки моҳҳои зиёд барои парвариш ва нигоҳубини пахта заҳмат кашидаанд, ба ҷамъоварии ҳосил оғоз намуда, талош доранд онро дар муҳлатҳои муайян ва бо сифати баланд ҷамъоварӣ намоянд.

Имрӯз, раиси вилояти Хатлон Давлаталӣ Саид дар филиали Институти зироаткории вилояти Хатлон дар оғози чиниши пахта иштирок намуда, бо ҳолати майдонҳои кишти ин зироати стратегӣ шинос шуданд.

Зимни боздид иттилоъ дода шуд, ки имсол олимону кишоварзони филиали Институти зироаткорӣ дар маҷмӯъ дар масоҳати 93 гектар пахта кишт намудаанд. Дар 10 гектари ин заминҳо навъҳои серҳосили пахта, аз ҷумла «Дӯстӣ», «Нодир», «Водии заррин», «30-солагии Истиқлолият» ва дигар навъҳои ба шароити иқлимии минтақа мутобиқ бо истифода аз технологияи кишти зери плёнка парвариш карда шудаанд.

Кишти зери плёнка ҳамчун яке аз усулҳои самараноки парвариши пахта имкон медиҳад, ки дар марҳилаи аввали нашъунамои растанӣ шароити мусоид фароҳам оварда шуда, ҳосилнокӣ баланд бардошта шавад. Дар ин замина, истифодаи навъҳои серҳосил ва мутобиқ ба шароити маҳаллӣ низ аз омилҳои муҳими афзоиши истеҳсоли пахта ба ҳисоб меравад.

Фаъолияти филиали Институти зироаткорӣ дар самти илмӣ ва таҷрибавӣ низ аҳамияти муҳим дорад. Олимони муассиса тайи солҳои охир барои ихтироъ, омӯзиш ва ҷорӣ намудани навъҳои нави серҳосили пахта корҳои назаррас анҷом дода, дар таъмини хоҷагиҳои пахтакор бо тухмиҳои хушсифат ва мутобиқ ба шароити минтақа саҳми арзанда мегузоранд.

Раиси вилояти Хатлон Давлаталӣ Саид зимни суҳбат бо олимон ва кишоварзон ба масъалаи истифодаи самараноки замин, риояи қатъии қоидаҳои агротехникӣ, нигоҳубини дурусти киштзор ва ташкили саривақтии корҳои ҷамъоварии ҳосил таваҷҷуҳ зоҳир намуданд.

Таъкид гардид, ки дар марҳилаи ҷамъоварии пахта ба риояи муҳлатҳои агротехникӣ, талаф надодани ҳосил ва истифодаи самараноки техникаву қувваи корӣ бояд диққати ҷиддӣ дода шавад. Зеро ҷамъоварии саривақтӣ ва босифати ҳосил яке аз омилҳои асосии баланд бардоштани самаранокии истеҳсолоти пахтакорӣ мебошад.

Тибқи маълумоти масъулин, имсол дар шаҳри Бохтар дар масоҳати 200 гектар пахта кишт гардида, кишоварзон мақсад доранд аз ин майдонҳо 500 тонна ҳосил ҷамъоварӣ намоянд. Ин нишондиҳанда аз таваҷҷуҳи кишоварзон ба истифодаи самараноки замин ва афзоиши истеҳсоли ашёи хоми ватанӣ шаҳодат медиҳад.

Вилояти Хатлон яке аз минтақаҳои асосии кишоварзии мамлакат буда, барои парвариши зироатҳои техникӣ, бахусус пахта, имкониятҳои мусоиди табиӣ ва иқлимӣ дорад. Шароити гарм ва захираҳои заминии минтақа барои рушди соҳаи пахтакорӣ заминаи муносиб фароҳам овардааст.

Имсол дар вилояти Хатлон дар масоҳати 118 ҳазору 161 гектар пахта кишт карда шудааст. Аз ин масоҳат 32 ҳазору 200 гектар ба кишти пахтаи зери плёнка рост меояд.

Пахта дар иқтисодиёти кишоварзии вилоят мавқеи муҳим дошта, рушди соҳа ба афзоиши истеҳсоли ашёи хоми ватанӣ, таъмини фаъолияти корхонаҳои коркарди пахта ва фароҳам овардани ҷойҳои нави корӣ мусоидат мекунад. Аз ин рӯ, кишоварзони вилоят бо истифода аз имкониятҳои мавҷуда ва технологияи муосири агротехникӣ барои ба даст овардани ҳосили фаровон талош менамоянд.

Оғози чиниши пахта барои пахтакорон марҳилаи муҳим ва масъулиятнок ба ҳисоб меравад. Дар ин давра натиҷаи меҳнати чандмоҳаи онҳо ҷамъбаст гардида, сифату ҳаҷми ҳосили ба дастомада муайян мешавад. Аз ин рӯ, ташкили дурусти маъракаи ҷамъоварӣ, истифодаи самараноки техника, ҷалби қувваи корӣ ва риояи муҳлатҳои муайяншуда аз вазифаҳои асосии хоҷагиҳои пахтакор ба шумор меравад.

Кишоварзони шаҳру ноҳияҳои вилояти Хатлон ҳадаф доранд, ки бо истифодаи самараноки замин, риояи технологияи парвариш ва ташкили дурусти маъракаи ҷамъоварии ҳосил нишондиҳандаҳои истеҳсолиро таъмин намуда, саҳми худро дар рушди соҳаи кишоварзӣ ва афзоиши истеҳсоли маҳсулоти ватанӣ боз ҳам бештар намоянд.