Абдуллои Ориф — қаҳрамони ҷаҳон дар вазни 71 кг

Муҳаррир: Суҳроби Рустам аз 17 август, Бахш: Ҳокимияти давлати / Матлабҳои охирин / Хабари рӯз / Ҷавонон ва варзиш / Хабарҳо, Боздид 123

Дар дуюмин Чемпионати ҷаҳон оид ба гӯштингирӣ паҳлавони ҷавони тоҷик Абдуллои Ориф дар вазни 71 килограмм бо намоиши маҳорати баланди варзишӣ ва иродаи қавӣ бар рақибони худ пирӯз гардида, сазовори ҷойи аввал ва медали тилло шуд.

Абдуллои Ориф — дастпарвари Муассисаи давлатии Мактаби махсуси варзишии вилояти Хатлон оид ба намудҳои гӯштин ба номи С. Раҳимов буда, дар ин мусобиқа бо омодагии хуб ва рӯҳияи баланди варзишӣ ба майдон баромад. Ӯ дар қувваозмоиҳои пайдарпай маҳорати худро нишон дода, то марҳилаи ниҳоӣ расид.

Дар рақобати финалӣ низ паҳлавони хатлонӣ зери фишори рақобати сахт қарор нагирифта, бо истифода аз техникаву маҳорати хеш бар рақибаш бартарӣ пайдо кард. Дар анҷоми сабқат доварон пирӯзиро ба Абдуллои Ориф нисбат доданд ва ҳамин тавр, медали тиллои қаҳрамонии ҷаҳон насиби паҳлавони тоҷик гардид.

Ин дастовард барои варзиши вилояти Хатлон аҳамияти хос дорад. Зеро маҳз дар ҳамин минтақа солҳои зиёд ба рушди гӯштин ва тарбияи паҳлавонони ҷавон таваҷҷуҳи ҷиддӣ зоҳир мешавад. Мактаби махсуси варзишии вилояти Хатлон ба номи С. Раҳимов низ дар омода намудани варзишгарони ҷавон ва тарбияи онҳо дар рӯҳияи рақобатпазирӣ саҳми назаррас дорад.

Пирӯзии Абдуллои Ориф бори дигар собит намуд, ки меҳнати пайваста, тамрини мунтазам ва иродаи қавӣ метавонанд варзишгарро ба қуллаҳои баланди варзиш расонанд. Барои ҷавонони Хатлон, ки роҳи паҳлавониро интихоб кардаанд, чунин дастовардҳо намунаи равшани талош барои расидан ба ҳадафҳои бузург мебошанд.

Акнун номи Абдуллои Ориф дар қатори қаҳрамонони ҷаҳон қарор гирифта, медали тиллои ӯ ҳамчун натиҷаи заҳмати чандинсолаи варзишӣ дар таърихи гӯштин барои Хатлон як саҳифаи тоза боз мекунад.

Алишери Абдулмаҷид,

"Хатлон"