МУМФАРШКУНИИ ЗИЁДА АЗ 6 КИЛОМЕТР РОҲ ДАР ДЕҲАИ ПАХТАКОР ИДОМА ДОРАД

Муҳаррир: Суҳроби Рустам аз 11 август, Бахш: Ҳокимияти давлати / Слайдер / Матлабҳои охирин / Хабари рӯз / Хабарҳо, Боздид 41

Дар шаҳри Кӯлоб ба истиқболи 35-солагии Истиқлоли давлатии Ҷумҳурии Тоҷикистон корҳои ободониву созандагӣ ва бунёдкорӣ вусъат гирифта, дар ин раванд саҳми сокинон ва соҳибкорони маҳаллӣ назаррас арзёбӣ мегардад.

Дар идомаи сафари корӣ Раиси вилояти Хатлон Давлаталӣ Саид бо рафти корҳои ободониву созандагӣ дар деҳаи Пахтакори шаҳри Кӯлоб шинос шуданд. Зимни боздид роҳбарияти Мақомоти иҷроияи ҳокимияти давлатии вилояти Хатлон раванди корҳои мумфаршнамоии роҳи аҳамияти маҳаллии деҳаро мавриди таваҷҷуҳ қарор доданд.

Корҳои мумфаршнамоии роҳи мазкур ба масофаи зиёда аз 6 километр идома дошта, татбиқи ин иқдом барои беҳтар намудани ҳолати роҳ, осон гардидани рафтуомади сокинон ва рушди инфрасохтори маҳаллӣ аҳамияти муҳим дорад.

Мумфаршкунии роҳи деҳа бо ташаббуси сокинон ва соҳибкорони ватандӯсти маҳаллӣ роҳандозӣ гардида, намунаи равшани саҳми ҷомеаи маҳаллӣ дар корҳои ободониву созандагӣ ба ҳисоб меравад.

Зимни шиносоӣ бо ҷараёни корҳо таъкид гардид, ки роҳҳои маҳаллӣ яке аз бахшҳои муҳими инфрасохтор ба шумор рафта, беҳтар намудани ҳолати онҳо барои рушди иқтисодию иҷтимоии маҳал, дастрасии сокинон ба хизматрасониҳо ва фароҳам овардани шароити мусоиди зиндагӣ заминаи муносиб фароҳам меорад.

Дар баробари мумфаршкунии роҳ, сокинони деҳаи Пахтакор ва соҳибкорони маҳаллӣ тасмим доранд, ки бо истифода аз имкониятҳои мавҷуда дигар инфрасохтори зарурии деҳаро низ бунёд ва навсозӣ намоянд. Ин иқдомҳо метавонанд барои боз ҳам беҳтар гардидани шароити зиндагии сокинон ва рушди минбаъдаи деҳа мусоидат намоянд.

Раиси вилояти Хатлон Давлаталӣ Саид зимни вохӯрӣ бо сокинони деҳа таъкид намуданд, ки ҷалби бештари соҳибкорон, шахсони саховатманд ва сокинон ба корҳои ободониву созандагӣ метавонад барои рушди инфрасохтори маҳаллӣ ва ҳалли масъалаҳои иҷтимоии деҳа заминаи мусоид фароҳам оварад.

Сокинони деҳаи Пахтакор низ бо дарки масъулияти шаҳрвандӣ ва ватандӯстӣ дар корҳои ободониву созандагӣ саҳм гузошта, талош доранд, ки маҳалли зисти худро боз ҳам ободу зебо гардонанд.

Мумфаршкунии роҳи зиёда аз 6-километра ва нақшаҳои минбаъдаи бунёду навсозии инфрасохтори деҳа аз ҷумлаи иқдомҳои созандае мебошанд, ки дар арафаи таҷлили 35-солагии Истиқлоли давлатии Ҷумҳурии Тоҷикистон амалӣ мешаванд.

Бо анҷоми чунин ташаббусҳо бошандагони деҳаи Пахтакор низ дар баробари дигар маҳалҳои шаҳри Кӯлоб дар корҳои ободониву созандагӣ саҳми арзандаи худро гузошта, барои истиқболи сазовори ҷашни 35-солагии Истиқлоли давлатӣ заминаи мусоид фароҳам меоранд.

Умарҷон Тошматов,

"ХАТЛОН"