ПУЛЕ, КИ ДУ СОҲИЛРО БА ҲАМ ПАЙВАСТ

Муҳаррир: Суҳроби Рустам аз 10 август, Бахш: Ҳокимияти давлати / Слайдер / Матлабҳои охирин / Хабари рӯз / Хабарҳо, Боздид 48

Дар масири деҳаи Тудакавш ва Ҷамоати деҳоти ба номи Шамсиддин Шоҳин пули одамгузар бунёд мешавад.

Ободии маҳал аз корҳои бузург оғоз намешавад. Баъзан сохтмони як пуле, ки барои сокинон роҳи бехатару қулай фароҳам меорад, метавонад дар зиндагии мардум тағйироти назаррас ба вуҷуд оварад. Имрӯзҳо дар масири байни деҳаи Тудакавши Ҷамоати деҳоти Кӯлоб ва Ҷамоати деҳоти ба номи Шамсиддин Шоҳини ноҳияи Муъминобод чунин як иқдоми созанда амалӣ шуда истодааст.

Бо ташаббуси раиси Кумитаи иҷроияи Ҳизби Халқии Демократии Тоҷикистон дар шаҳри Кӯлоб Сайвализода Салим, аҳли оилаи ӯ ва бо саҳми сокинони деҳа сохтмони пули одамгузар оғоз гардидааст. Ин иншоот барои сокинони ду маҳал, бахусус хонандагоне, ки ҳамарӯза барои расидан ба муассисаҳои таълимӣ аз ин масир истифода мебаранд, аҳамияти муҳим дорад.

Сохтмони пули мазкур як зарурати воқеии рӯзмарраи мардум мебошад. Зеро сокинони ин маҳал солҳо боз аз ҳамин масир барои рафтуомад истифода мебаранд. Барои кӯдаконе, ки субҳгоҳон бо мақсади донишомӯзӣ аз хона ба мактаб мераванду баъд аз анҷоми дарс ба хона бармегарданд, мавҷуд будани гузаргоҳи бехатар аҳамияти хос дорад.

Пули навбунёд зиёда аз 100 метр дарозӣ, 1,5 метр паҳноӣ ва 10,5 метр баландӣ хоҳад дошт. Бо мавриди истифода қарор гирифтани он рафтуомади сокинон осон гардида, барои ҳаракати бехатари аҳолӣ, махсусан хонандагон, шароити мусоид фароҳам хоҳад омад.

Айни замон корҳои сохтмониву бунёдкорӣ дар мавзеъ бо маром идома доранд. Дар ин кори хайр аҳли оилаи ташаббускор ва сокинони деҳа фаъолона иштирок намуда, барои ҳарчи зудтар ва босифат анҷом ёфтани сохтмони пул саҳми худро мегузоранд.

Иштироки бевоситаи сокинон дар чунин корҳои созанда далели он аст, ки мардум ободии маҳалли зисти худро масъулияти умумӣ медонанд. Ҳар як сокин мехоҳад маҳале, ки дар он зиндагӣ мекунад, ободу зебо ва барои зиндагии шоиста муносиб бошад. Маҳз ҳамин гуна ташаббусҳои мардумӣ метавонанд ба рушди инфрасохтори маҳаллӣ ва беҳтар шудани шароити зиндагии аҳолӣ мусоидат намоянд.

Ташаббускорон ният доранд, ки корҳои сохтмонии пул дар муҳлати муайян ба анҷом расонида шуда, ба муносибати 35-солагии Истиқлоли давлатии Ҷумҳурии Тоҷикистон мавриди истифода қарор гирад. Ин иқдом барои сокинони маҳал як туҳфаи арзанда ва нишонаи ободкориву созандагӣ хоҳад буд.

Дар солҳои соҳибистиқлолӣ дар кишвар ба рушди инфрасохтор, бунёди роҳу пулҳо ва беҳтар намудани шароити зиндагии аҳолӣ таваҷҷуҳи махсус зоҳир мегардад. Сохтмони чунин иншооти муҳим низ дар заминаи сиёсати созанда ва дурнамои ободонии мамлакат, ки таҳти роҳбарии Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон пайваста амалӣ мешавад, сурат гирифта истодааст.

Иқдоми мазкур ҳамчунин ба ҳадафҳои соли 2026 — «Соли вусъат додани корҳои созандагию бунёдкорӣ ва таҳкиму тақвияти худшиносию худогоҳии миллӣ» — мувофиқ буда, намунаи равшани саҳми сокинон дар ободии маҳалли зист ва пешрафти ҷомеа мебошад.

Зеро ободонӣ танҳо бунёди иншооти бузург нест. Ҳар як роҳ, пул, мактаб ва дигар иншооте, ки мушкили мардумро осон мекунад, қадаме ба сӯи зиндагии беҳтар аст. Пули навбунёд низ барои сокинони ин ду маҳал танҳо як гузаргоҳ набуда, балки роҳи осонтару бехатартар ба сӯи мактаб, кор ва зиндагии ҳаррӯза хоҳад буд.

Умед аст, ки бо анҷоми корҳои сохтмонӣ ин пул дар рӯзҳои таҷлили 35-солагии Истиқлоли давлатӣ ба истифода дода шуда, солҳои зиёд барои сокинон хизмат хоҳад кард.

Ҳамин гуна корҳои созанда собит месозанд, ки ободии Ватан аз ободии ҳар як маҳал оғоз меёбад ва саҳми ҳар як шахс дар ин кори хайр метавонад барои насли имрӯз ва фардо арзишманд бошад.

Алишери Абдулмаҷид,

"ХАТЛОН"