Китоби «Тоҷикон» ба сокинони ноҳияи Ховалинг расид

Муҳаррир: Суҳроби Рустам аз 12 июн, Бахш: Ҳокимияти давлати / Матлабҳои охирин / Хабари рӯз, Боздид 1 837

Рӯзи 8 июни соли равон корвони туҳфаи Пешвои миллат- китоби «Тоҷикон» ба ноҳияи Ховалинг расид. Баъди қабули туҳфаи Президенти мамлакат гурӯҳи масъулин ба ҳар як оилаи сокини Ховалинг китоби «Тоҷикон»- ро дастрас мегардонанд. Тибқи маълумоти аъзои комиссияи мазкур теъдоди китобҳо ба ҳар як ҷамоати деҳот тибқи рӯйхати пешниҳодгардида дода мешавад.

Ин асари арзишманди Академик Бобоҷон Ғафуров ба ҳар як оилаи тоҷикистонӣ тақдим мегардад. Ин иқдом аз тарафи Пешвоимуаззами миллат муҳтарам Эмомалӣ Раҳмон бахшида ба ҷашни бузурги миллӣ 30- солагии Истиқлолияти давлатии Ҷумҳурии Тоҷикистон ҳамчун туҳфаи хотирмону пурарзиш ба ҳар оилаи кишварамон дастрас хоҳад шуд. Директори осорхонаи ноҳия Амир Саиди Мункӣ дар суҳбат иброз намуд, ки ин ташаббуси наҷибонаи Пешвои муаззами миллат бисёр саривақтӣ буд. Зеро мардуми мо барои омӯхтани таърихи гузаштаи худ, бахусус, таърихи фарҳангу оиндорӣ ва дигар паҳлуҳои таърихи ҷомеаи қадимаи тоҷик ба ин асари пурбаҳо эҳтиёҷ дошт. Гарчанде ин китоб дар даврони шӯравӣ чоп шуда буд, аммо дастраси ҳамагон набуд. Имрӯз хушбахтона бо меҳру садоқати бепоёни фарзанди фарзонаи миллати тоҷик, Сарвари ғамхор муҳтарам Эмомалӣ Раҳмон ба ҳар як оилаи тоҷикистонӣ ин китоб тақдим мегардад.