Дар як сатр
» » Матои синтетикӣ зарар дорад

Матои синтетикӣ зарар дорад

2-01-2015, 22:02

Матои синтетикӣ зарар дорадЗанону духтарони тоҷик байни дигар қавму миллатҳои гуногун бо нафосату назокат, лутфу меҳрубонӣ ва ҳусни зебою нотакрори хеш ба куллӣ фарқ мекунанд. Аз қадимулайём бонуи тоҷик бо пӯшидани пироҳани атлас, мӯйи дарози бофташуда ном баровардаанд. Махсусан, либоси атлас ва мӯйҳои дарози бонувон ҳусни онҳоро боз ҳам муниртар мегардонад.

Пас, чаро имрӯз бонувони мо аз пайи «мӯд» рафта, буридан ва рангубор намудани мӯйро манбаи зебоӣ дониста, пӯшидани матоъҳои дорои симу зари зиёд, ки арзишаш қимат асту дар фасли гармо ҳаворо ба бадани инсон намегузаронад, авлотар мешуморанд?

Мусоҳибаи мухбирамонро бо чанд сокини шаҳру навоҳии вилоят перомуни ин масъала пешкаши хонандагон мегардонем.


Лола Бобоҷонова, сокини шаҳри Қӯрғонтеппа:
- Ман ҳамчун зан-модар хилофи пӯшидани матоъҳои симдорам. Чунки пай бурдам, ки ҳангоми ба бар намудани матои симдор бадан ба хориш меояду аз он асабонӣ мешавам. Албатта, дар дӯкону растаҳои бозорҳо матоъҳои гӯё «пеши бозор», ки чашмро мерабоянду назарфиребанд, хеле зиёд мебошад. Вале ин маънои онро надорад, ки маҳз бо чунин либос худро зебо гардонанд. Хислати баъзе занон ба онҳо зебанда нест. Зеро онҳо қабл аз ягон тӯю маърака, иду айём рафтанашон надоштани ин қабил либосҳои «зебо»-ро баҳона пеш оварда, дар хонадон ҷангу ҷанҷолро ба миён меоранд. Ин бошад, боиси дилсардии зану шавҳар мегардад. Дар бораи либоси миллӣ – атласу адрас як андешаамро изҳор менамоям. Имрӯз ҷавондухтарони мо нисбати ин матои баҳорӣ дӯхтани либоси миллӣ назари аврупоӣ доранд. Яъне онҳо либосро бо тарҳи аврупоӣ медӯзанд, на миллӣ. Солҳои қаблӣ гуларӯсон атласро чунон шинам, зебо ба бар менамуданд, ки кас аз он ҳавас мебурд. Вале имрӯз ин кам ба назар мерасад. Мехостам занону духтарони мо ин пироҳани миллиро, ки тоҷикдухтар будани моро дар ҷаҳон муаррифӣ намудааст, бештар ба бар намоянд.

Фарангез, ноҳияи Қумсангир, донишҷӯ:
Агар он мӯйи додаи Худованд, ки на маблағ сарф мегардаду на соатҳои зиёд дар кошонаи ҳусн вақтро беҳуда мегузаронад, хуб парвариш намуда, бофта бошад, натанҳо ҳусни шуморо зебо мегардонад, балки дар ҳаёти иқтисодиву иҷтимоии донишҷӯён нафъе ба бор хоҳад овард. Хуб мешуд, ки дар донишгоҳу коллеҷҳо чун солҳои Шӯравӣ озмуни мӯйдарозон ташкил карда шавад. Шояд ба ин васила буридани мӯй кам ба назар расаду занону бонувони мо боз ҳам зеботар гарданд. Зеро мӯйи дароз аз ақли расои зан шаҳодат медиҳад.

Ҳабибулло Раҷабов, мутахассиси бемориҳои пӯст:
- Хуб медонем, ки пӯшидани либосҳои синтетикӣ ҳатто ба беморӣ оварда мерасонад. Аз ин рӯ, занону хоҳаронро мебояд, ки баҳри зиннат бахшидану аз ҳар гуна бемориҳои пӯст эмин доштани худ аз матоъҳои пахтагине, ки арзишашон ду ё се маротиба арзон асту муҳимаш роҳат ба тан меорад, истифода намоянд. Ин бошад, вазъи иқтисодиву иҷтимоии хонадонро беҳтар намуда, ҳамчунин солимии онҳоро таъмин хоҳад кард. Дар бозорҳои шаҳру навоҳии ҷумҳурии азизамон, аз ҷумла вилояти Хатлон, аз Чину Дубай молу матоъҳои қимматбаҳои синтетикӣ ва пастсифати ба саломатии инсон зараровар ворид мегардад. Аз чӣ бошад, ки занони мо кӯшиш менамоянд, ба қавли онҳо, беҳтаринашро ба бар намоянду аз ҳама зеботар бошанд. Ҳоло ки фасли гармо фаро расидааст, инсон бояд дар тан либоси пахтагин ба бар кунад, то роҳати бадан бошад. Либоси синтетикӣ дар фасли сармо бадани одамро хунук нигоҳ медораду дар фасли гармо баръакс. Аслан, бемориҳои пӯст ҳавои тозаю равшаниро мепарастанд, зеро дар ин муҳит он зудтар шифо меёбад. Биёем, сари либосҳои синтетикӣ: инсон аз онҳо худро ноҳинҷор ҳис мекунад. Агар нафаре гирифтори бемории пӯсту бадан бошад, зарар хоҳад расонд. Аксар шаҳрвандони мо агар ба ягон намуди беморӣ гирифтор шаванд, дарҳол назди ҳамсоя, хешу табор, дорухона раҳсипор мегарданд ва бе ташхису тавсия ба худтабобаткунӣ низ машғул мегарданд. Дар ин сурат метавон гуфт, ки агар он ҷойи ҷароҳат нам бошаду дар тан либоси синтетикӣ ба бар кунем, он ҷароҳат хурӯҷ мекунаду ба дигар беморӣ оварда мерасонад. Мо, мутахассисони соҳаи тиб, дар сурати бо ягон нишонаҳо муроҷиат кардани бемор, онро аз ташхис мегузаронем, пас аз намуди бемориро муайян намудан, ба табобат шурӯъ мекунем. Агар ҷароҳат намнок бошад, он намнокиро хушк мекунем, сипас малҳам мемолем, яъне ҷароҳати намнок равшаниро талаб мекунад. Мо низ тарафдори онем, ки мардум бештар аз либосу матоъҳои пахтагин истифода намоянд, зеро пешгирӣ аз табобат беҳтар аст.

Рухшона, сокини ноҳияи Колхозобод:
- Бо мақсади ширкат дар тӯйи арӯсию домодии хешовандонам барои духтарчаи сесолаам пироҳани кӯдаконаи арӯсӣ харидорӣ намудам, ки истеҳсоли Ҷумҳурии Хитой будааст. Он либос бисёр шинам, гарон ва диққатҷалбкунанда буд. Дар рафти тӯй ногаҳон садои гиряи духтарчаам баланд шуду дарҳол наздаш шитофтам. Кӯдакро дидан замон ваҳм ба дил афтод, ки гирифтори ягон бемории сироятӣ гаштааст магар, ки дар пӯсти баданаш ягон ҷое холӣ намонда, сурхӣ дамида буд. Ба хона рафта, он куртаи зебояшро аз тан баровардам. Аёнам гашт, ки он синтетикӣ будаасту бадани нозуки кӯдакро ярадор намудааст. Ин сабаб шуду то ба имрӯз аз либосҳои пахтагӣ, ки бар нафъи мост, истифода мебарам, чунки барои инсон саломатӣ гавҳари ноёб аст.

Насиба Икромова, ноҳияи Бохтар:

- Мӯйи дарозу ақли расо зебу зиннати зани тоҷик аст. Тақрибан ду ё се сол қабл бахшида ба ҷашнҳои миллӣ озмуни ҷумҳуриявии «Бонуи сол» баргузор гардид, ки чеҳраи зебо, оилаи солим ва мӯйи дароз доштани зан аз шартҳои аслии он буд. Албатта, занҳои мо зебоянду бунёдгари оилаи ободу солим. Вале дар интихоби занҳои мӯйдароз мушкилие ба амал омад. Пас аз ҷустуҷӯҳои тӯлонӣ як нафар зан, ки дарозии мӯяш 1 метру 55 сантиметр буд, сазовори ҷойи аввал ва ғолиби озмуни «Бонуи сол» гардид.

Марҷона, сокини шаҳри Норак:
- Чаро мо, тоҷикон аз либоси миллии хеш, ки баёнгари фарҳангу маданияти мост, кам истифода мебарему либоси аврупоӣ ё аз матоъҳои симдор либос пӯшиданро авлотар медонем? Ё худ тӯйи арӯсии духтаронро гирем: Арӯс сари тахти арӯсӣ бо либоси аврупоӣ (фата), ки ба духтарони мо зебанда нест, маблағи зиёд сарф намуда, барои як соат ин либосро бо маблағи зиёд иҷора мегирад. Хуб мешуд, ки сари тахти арӯсӣ бо либоси атлас баромадани тоҷикдухтар ба ҳукми анъана медаромаду он маблағе, ки сарфа мегардад, барои камбудии тӯйдорон харҷ мешуд.

Махфират ШОИМОВА


Шарҳи хонандагон +

Матолиби дигар:

Модарон, дар батни хеш фарзанди солим парваред

Модарон, дар батни хеш фарзанди солим парваред

Ҳаёти иҷтимоӣ, Хабарҳо, Таҳқиқи журналистӣ, ҲАНГОМА ПАҲЛАВОНОВА
«Ҷилваи ҳусн» - тарғибгари пираҳани миллӣ

«Ҷилваи ҳусн» - тарғибгари пираҳани миллӣ

Фарҳанг ва адабиёт, Хабарҳо, НОСИРҶОН МАЪМУРЗОДА
Агар гирифтори зуком шудед…

Агар гирифтори зуком шудед…

Хабарҳо, Тандурустӣ ва экология, ҲАНГОМА ПАҲЛАВОНОВА
Сокини шаҳр будан масъулият надорад?

Сокини шаҳр будан масъулият надорад?

Хабарҳо, Ҳаёти иҷтимоӣ, Тандурустӣ ва экология, Матолиби чандрасонаӣ, КОМРОНИ БАХТИЁР
«Хушдомани золим» ва «Гопӣ»-ро ба бозор дароварданд

«Хушдомани золим» ва «Гопӣ»-ро ба бозор дароварданд

Ҳаёти иҷтимоӣ, КОМРОНИ БАХТИЁР