Дар як сатр
» » Бо душмани ман чу дӯст бисёр нишаст…

Бо душмани ман чу дӯст бисёр нишаст…

13-01-2016, 14:36


Хирадманде гуфта, ки «Одамон тағйир намеёбанд. Танҳо мо онҳоро беҳтар мешинохтагӣ мешавем». Дар асл, баъзан ба ҳайрат меоем, ки чаро рафтору гуфтору пиндори фалон дӯсте дигар шудааст. Чаро ғайриинтизор амале содир мекунад, ки ифодагари беэҳтиромию худбартарбинист? Шояд табиати он «дӯст» ҳамин аст?!
Бо душмани ман чу дӯст бисёр нишаст…

Иштироки раиси ҳизби дар Тоҷикистон манъшудаи наҳзати исломӣ Муҳиддин Кабирӣ дар конфронси «Ваҳдати исломӣ», ки рӯзҳои 27-29 декабр дар Эрон барпо гардид, боиси нигаронии амиқи натанҳо доираҳои сиёсии Тоҷикистон, балки аксари равшанфикрони кишварамон шуд. Дар маҳофил ин суол матраҳ мешуд, ки чаро раҳбарияти як кишвари ба мо дӯст, ҳамзамон ва ҳамдин – Эрон нафареро ба «меҳмонӣ» хондааст, ки ҳизбаш дар Тоҷикистон аз сӯйи Суди Олӣ расман террористию экстремистӣ шинохта шудааст. Худаш бошад, аз ҷониби мақомоти ҳифзи ҳуқуқ дар ҷустуҷӯи байналмилалӣ эълон шудааст. Ин ҳам дар ҳолест, ки бо даъвати Эрон кишвари моро дар ин ҳамоиши байналмилалӣ Сулаймон Давлатов, раиси Кумитаи дин, танзими анъана ва ҷашну маросимҳои миллӣ, Саидмукаррам Абдулқодирзода, раиси Шӯрои уламо ва Файзулло Баротзода, раиси Маркази исломшиносии Тоҷикистон, намояндагӣ мекарданд. Гузашта аз ин, дар аксҳое, ки тавассути расонаҳои Эрон дар шабакаҳои иҷтимоӣ паҳн гардид, Муҳиддин Кабириро дар як қатор бо Саидмукаррам Абдулқодирзода ҷо додаанд. Чунин муносибати мақомоти Эронро ҷуз нописандӣ ва беэҳтиромӣ нисбат ба давлати Тоҷикистон, ба таври дигар намешавад шарҳ дод.

Дар нотаи Вазорати корҳои хориҷии Тоҷикистон, ки 29 декабр ба сафири Эрон дар Душанбе супурда шуд, аз ҷумла омадааст, ки «вазорат бо камоли таассуф таъкид мекунад, ки ба Конфронс собиқ раиси Ҳизби ифротгаро ва террористии наҳзати исломи Тоҷикистон Муҳиддин Кабирӣ низ, ки нисбаташ барои кӯшиши табадулоти давлатӣ ва ғасби ҳокимияти конститутсионӣ дар Тоҷикистон парвандаи ҷиноятӣ оғоз гардида, айни ҳол ӯ дар ҷустуҷӯи Интерпол қарор дорад, даъват шуда буд.

Вазорати корҳои хориҷии Ҷумҳурии Тоҷикистон чунин амали созмондиҳандагони конфронси мазкурро қобили қабул намедонад ва қотеъона изҳор медорад, ки чунин муносибат ба мухолифони давлат ва миллати Тоҷикистон ба равобити ҳасанаи Ҷумҳурии Тоҷикистон ва Ҷумҳурии Исломии Эрон метавонад халал ворид намояд».

Кумитаи дин, танзими анъана ва ҷашну маросимҳои миллии Тоҷикистон низ аз даъват шудани Кабирӣ ба ҳамоиши Теҳрон интиқод кард. Дар изҳороти ин кумита бо таъкид ба ин нукта, ки Суди Олии Тоҷикистон рӯзи 29 сентябри соли 2015 фаъолияти ин ҳизбро мамнӯъ эълон карда, раҳбарияташ барои ҳамдастӣ ва сармоягузории ошӯби генерал Абдуҳалим Назарзода дар Душанбе ва Ваҳдат муттаҳам мешаванд, суоле матраҳ шудааст: «Чаро ҷониби Эрон дидаву дониста роҳбари ин ҳизбро, ки бо дархости Тоҷикистон дар ҷустуҷӯи байналмилалӣ қарор дорад, ба ин конфронс даъват кардааст? Паҳлӯи дигари масъала ин аст, ки ҷониби Эрон, ки ҳамеша аз Тоҷикистон ба сифати дӯсту бародари ҳамфарҳангу ҳамнажоду ҳамдин ёд мекунад, оё ба мавқеъ ва қонунгузории кишвари бародари худ арҷ ва эҳтиром мегузорад, ё не? Ин мавқеи Эрон - даъвати шахсе, ки бо дархости «кишвари бародар» дар ҷустуҷӯи байналмилалӣ қарор дорад, дар чунин як ҳамоиши сатҳи баланд суолҳои зиёди бидуни посухро дар зеҳнҳо ба вуҷуд меорад. Ё Эрон аз ҳаводиси ибтидои моҳи сентябри Душанбе бехабар буд?».

Аҷиб аст, ки то ҳол мақомоти расмии Эрон дар масъалаи манъи фаъолияти ҳизби наҳзати исломии Тоҷикистон ва даъвати Кабирӣ ба ин ҳамоиши байналмилалӣ изҳори назар накардааст. Танҳо Файзулло Баротзода, раиси Маркази исломшиносии Тоҷикистон, дар суҳбат бо расонаҳо гуфтааст, ки ҷониби Эрон аз ҳайати Тоҷикистон пӯзиш хостааст.

Саидмукаррам Абдулқодирзода, раиси Шӯрои уламои Марказии исломӣ (муфтиёти собиқ)-и Тоҷикистон, низ аз Эрон барои пазироияш аз Муҳиддин Кабирӣ, раҳбари ҳизби дар Тоҷикистон мамнӯи наҳзати исломӣ, интиқод кард. Абдулқодирзода инро навъе «пуштибонӣ аз террористон» номид ва гуфт: «Дар ҳоле ки моҳи сентябр Додгоҳи олии Тоҷикистон ҳизби наҳзати исломиро ба феҳристи аҳзоби террорист шомил карда ва фаъолияташро дар қаламрави ин кишвар мамнӯъ кард, даъвати расмии раҳбари ин ҳизб ба Теҳронро чӣ гуна бояд тавзеҳ дод? Ҳоло рӯшан шуд, кӣ аз ин ҳизби террорист ва раҳбари он ҳимоят ва пуштибонии молӣ мекунад».

Дар идома С. Абдулқодирзода паҳлуи ҳам шинондани аъзои расмии ҳайати давлати Тоҷикистон ва Муҳиддин Кабириро дар ҳамоиши «Ваҳдати исломӣ» як навъ таҳқир ба ҷониби Тоҷикистон ва хилофи одоби меҳмоннавозии Эрон арзёбӣ кард. ӯ гуфт, ки Эрон бо даъвати Муҳиддин Кабирӣ ба ҳамоиши «Ваҳдати исломӣ» (27-29 декабри 2015) ва дидори оятуллоҳ Алии Хоманаӣ, раҳбари рӯҳонии Ҷумҳурии исломӣ, бо ӯ ҳимояти ошкори Эронро аз ин ҳизби фаъолияташ дар Тоҷикистон мамнӯъ ба намоиш гузоштааст.

Худойбердӣ Холиқназарзода, раҳбари Маркази тадқиқоти стратегии назди Президенти Тоҷикистон, низ даъвати Муҳиддин Кабириро аз сӯйи Эрон «рафтори хасмона» ё душманона хонд. ӯ гуфт, ки «ҳар касе бо Тоҷикистон муносибати хасмона мекунад, пушаймон хоҳад шуд».

- Ҷониби Эрон мегӯяд, ки Кабириро ба ҳамоиши «Ваҳдати исломӣ» ба ҳайси меҳмон даъват кардааст, - идома дод Х. Холиқназарзода. - Ин муносибати хасмона ва беэҳтиромӣ нисбат ба Тоҷикистон аст, ки метавонад муносибати ду кишварро хадшадор кунад. Чунин бархӯрди Эрон бароямон ногаҳонӣ буд ва чунин гаштро аз тарафи як кишвари дӯсту ҳамзабон интизор надоштем.

Раҳбари МТС афзуд, ки Эрон дар Осиёи Марказӣ фақат бо Тоҷикистон таъриху фарҳанг ва забони муштарак дорад ва набояд «аз пушт ханҷар мезад».

Дар пасманзари ин ҳама сарусадоҳо, ки боз ҳам номи раиси ҳизби манъшудаи наҳзати исломиро вирди забонҳо кард ва М. Кабирию сомонаҳои наздик ба ӯ аз ин ҳамоиш худро «реклама» карданд, андешаи баркашидаи академики тоҷик Қурбон Восеъ бисёр баҷо ба назар мерасад. ӯ дар суҳбат бо хабаргузории «Ховар» гуфт, ки Эрон кишвари ҳамзабони мост ва аз як нафар набояд атрофи давлати дигар валвала сохт. «Муҳиддин Кабирӣ шахсе нест, ки барои ӯ шуда, муносибатҳои давлатӣ бад шаванд ва ё шахсе нест, ки чизеро тағйир дода тавонад», - зикр кард ӯ. Ба андешаи Қ. Восеъ, нафарони расмие, ки аз тарафи Тоҷикистон ба он конфронс рафта буданд, бояд бо Кабирӣ даст ба даст дода, мулоқот намекарданд. Модоме ки он нафар душман аст, намояндагони расмии Тоҷикистонро мебоист, ки расман дар ҳузури ҳама толори маҷлисро тарк мекарданд. Дар он ҳолат Эрон андеша мекард, ки нодуруст рафтор кардааст ва ба хотири як нафар як давлатро ҳамчун дӯст аз даст додан имкон доштааст. Агар намояндагони расмии Тоҷикистон зарофати сиёсӣ медоштанд, ҳеҷ вақт бо Кабирӣ даст ба даст намедоданд. Даст ба даст доданду баъд дар ин ҷо омада, изҳор карданд, ки Эрон кори нодуруст кард. Ҳол он ки набояд дар паҳлуи роҳбари ҳизби ифротгарои мамнӯъшуда менишастанд, балки толорро тарк мекарданд.

Академик Қурбони Восеъ дар як толор ҷамъ овардани намояндагони расмии мамлакат ва шахсеро, ки дар ҷустуҷӯи байналмилалӣ ҳамчун ҷинояткор қарор дорад, кори дасти хадамоти махсус медонад, ки ҳадафи барангехтани иғвои сиёсиро дунбол мекунанд. «Шумо гумон накунед, ки Эрон он шахсро ҳамту даъват кардааст. Мутаассифона, дар кишвари мо иддае аз одамон буданд, ки замоне он қадар пулҳои хориҷиро сарфу харҷ карда, заводу корхонаҳоро хусусӣ карданд, пулҳоро чош доданд. Акнун замоне, ки давлати мо роҳи демократии тараққиёт ва рушдро пеш гирифт, замоне ки Сарвари давлат дар ҷомеаи ҷаҳон шахсияти худро ва дар шахсияти худ Ҷумҳурии Тоҷикистонро ба ҷаҳониён муаррифӣ кард, сухани Сарвари давлат аз минбарҳои баланд шунида мешаванд ва ба эътибори баланд пазируфта мешаванд, вақти ҷавоб додани он нафарони пулхӯрда омадааст… Як Кабирӣ чӣ кор карда метавонад? Вале давлати Эрон самимияти худро аз даст дод. Вақте мо давлати Эрон мегӯем, шояд иштибоҳ мекунем, давлат не, чанд нафаре мебошанд, ки ҳавохоҳони Кабирӣ ҳастанд, мехоҳанд иғво ангезанд. Ман фикр намекунам, ки Сарвари давлати мо муносибатҳои ҳамгавҳарӣ, ҳамзабонӣ, иқтисодӣ, тиҷоратии худро бо кишвари Эрон хатти батлон мекашад», - изҳор дошт донишманди тоҷик.

Имрӯз Эрон бояд мавқеи худро оид равобиташ бо Тоҷикистон мушаххас намояд, то аз вуқӯи ҳар гуна нофаҳмиҳо миёни ду кишвари дӯсту ҳамзабон ҷилавгирӣ шавад ва ҳамкориҳо миёни Душанбе ва Теҳрон минбаъд низ ривоҷу равнақ биёбанд. Набояд имкон дод, ки гурӯҳу ҳизбҳои исломии хориҷӣ аз рӯйи усули «ҷудо куну ҳокимият бирон» кор карда, суботи сиёсию ҳамбастагии аъзои ҷомеаро хадшадор кунанд.

Вале ин ҳарфи Синои бузургворро ҳам месазад ба ёд дошта бошем, ки ишораи барҳақ кардааст: «Бо душмани ман чу дӯст бисёр нишаст…»

«ХАТЛОН»


Шарҳи хонандагон +

Матолиби дигар:

Дӯст хуни ҷигарам мекунад

Дӯст хуни ҷигарам мекунад

Сиёсат, Хабарҳо, Номаҳои Шумо
Каждуми зери бӯрё

Каждуми зери бӯрё

Сиёсат, Хабарҳо, Ҳуқуқу амният, Номаҳои Шумо
Р. Азизӣ: ««Ҳидоятҳо»-и Нурӣ яке аз бунёдҳои асосии ифротгароӣ дар сафҳои п ...

Р. Азизӣ: ««Ҳидоятҳо»-и Нурӣ яке аз бунёдҳои асосии ифротгароӣ дар сафҳои п ...

Сиёсат, Хабарҳо
Намоишгоҳи маҳсулоти Эрон

Намоишгоҳи маҳсулоти Эрон

Иқтисоду тиҷорат, Хабарҳо, АМОН МАҲКАМОВ
Волии Ҳамадон меояд

Волии Ҳамадон меояд

Иқтисоду тиҷорат, Хабарҳо