Дар як сатр
» » Аҳриманҳои заҳҳоктабъ дар оташи афрӯхтаи хеш месӯзанд

Аҳриманҳои заҳҳоктабъ дар оташи афрӯхтаи хеш месӯзанд

23-08-2018, 09:17

Аҳриманҳои заҳҳоктабъ дар оташи афрӯхтаи хеш месӯзандВоқеаҳои садаи 21 дар ақсои олам аҳли ҷомеаи ҷаҳонро нигарон намудааст. Ҳизбу ҳаракатҳои ифротию даҳшатзо дар ҳар гӯшаи ҷаҳон ба куштору вайронкуниҳо даст зада, ҳазорҳо нафар одамони бегуноҳро ваҳшиёна ба қатл мерасонанд. Биною иншоот ва мероси таърихии беш аз  ҳазорсолаҳоро ба коми нестӣ мебаранд. Бо ин амали нопоку ноҷавонмардонаи хеш онҳо одамонро тарс медиҳанд.

Бахусус роҳбарону аъзои гумроҳи ҲНИ дар Тоҷикистони соҳибистиқлол обрӯю нуфузе надоранду  сатрҳои дафтари аъмолашонро хурду бузурги кишвар аз худ кардаанд ва медонанд, ки аз амалҳои онҳо бӯйи хуну кушторҳои касношуниду даҳшатзо меояду ба мисли чуғз вайронкору харобкоранд. Аз ҳама сангинтараш он аст, ки на танҳо ҷавононро мағзшӯйӣ мекунанд, балки айни замон наврасонро низ ба ин амалҳои ғайриинсонии хеш ҷалб месозанд.

Воқеаи рӯзи 29 июни соли равон дар шоҳроҳи Душанбе-Данғара рухдода, ки бар асари он 4 нафар сайёҳи хориҷӣ куштаву 2 нафари дигар бо ҷароҳатҳои вазнин ба беморхона афтодаанд, саҳифаи дигари амали хунини наҳзатиёну ватанфурӯшонро дар олам нишон дод. Ин қотилони ба доми наҳзатиёни хунталаб афтодаи сайёҳони хориҷиро дида мисраъҳои шоир Ғоиб Сафарзодаи зиндаёд ба хотири кас мерасад:

 

Пайкари болои  хок афтодаи фарзандро
Мӯйканону рӯйканон
Мекунад оғӯш модар
Мегузорад сар ба рӯи сардгашта синааш,
Зор мегиряд  вай аз банди ҷигар.
В-ин суханҳо мекунад, такрор бо
чашмони тар:
- Ё, Худовандо, чӣ рӯзи сахт омад бар сарам?
Қотили фарзанди худ гаштам,
Магар ман модарам? ...
Баҳри мол андӯхтан сармоядорон ин қадар,
Хуни кас аз нокасӣ резонда дар мулки дигар...

 

Шоир Ғоиб Сафарзода ин мисраъҳои шеъри хешро ба модари амрикоӣ бахшидааст, ки қабл аз ба ҳамлаи ҳавоӣ рафтани фарзандаш ба кишвари Ветнам, худ бо ханҷар ӯро ба ҳалокат мерасонад. Зеро модар медонист, ки фарзандаш дар ҷанги зидди Ветнам ҳазорҳо  нафар тифлони бегуноҳи ветнамиро ба шаҳодат мерасонаду худ низ ҳалок гардида пас намегардад. Аз ин рӯ, тасмим мегирад, ки фарзанди хешро ба ҳалокат расонаду, ӯро бо дасти худ ба хок супорад.

Мутаассифона, аз чӣ бошад, ки  имрӯз баъзе модарон нисбати тақдири фарзандони хеш бетафовутанд. Онҳо моҳҳо, солҳо бедараканду модар парвое надорад ва боре намепурсад, ки фарзандаш дар куҷову бо чӣ кор машғул аст. Ё худ ин ҳамаро медонанду ба хотири маблағҳои хоҷагони хориҷӣ хомӯширо ихтиёр кардаанд? Натиҷаи ин бепарвоиҳост, ки баъзан ҷавонону шаҳрвандонро ҳизбҳои террористӣ ба доми хеш меафтонанд. Даҳшатҳои террористиро тавассути телевизион дида ба андеша меравам, ки оё ин террористону хоҷагони  зархаридашон модар надошта  бошанд, шири сафеди модарро нахӯрда бошанд, ё худ онҳоро ба ҷойи шир бо хун парвардаанд, ки аз рехтани хуни фарзанди инсон сер намешаванд. Бо ин амали ноҷавонмардонаю ваҳшатангези хеш ин заҳҳокҳои асри нав мехоҳанд, ки обрӯйи миллати тоҷику тоҷикистониро дар арсаи ҷаҳон паст зананд, эътибору нуфузи давлати Тоҷикистонро дар олам резонанд. Вале мардуми тоҷику Тоҷикистони азиз ва тамоми олам ин қотилонро бо ин кирдори ваҳшатангезашон нисбати сайёҳони хориҷӣ нафрин мехонанд.

Банда дар мизи мудаввари ҷумҳуриявӣ оид ба "Баланд бардоштани ҳамкории милитсия бо ҷомеа”, ки дар толори маҷлисгоҳи Вазорати корҳои дохилӣ рӯзи 3 августи соли равон баргузор гашт, ширкат доштам. Дар ин чорабинӣ Вазири корҳои дохилӣ генерал-полковники милитсия Раҳимзода Рамазон Ҳамро, роҳбари дафтари барномавии САҲА дар Душанбе хонум Туула Юрёля, кордори муваққатии сафорати ИМА дар Тоҷикистон ҷаноби Кевин Коверт, сафири фавқулода ва мухтори Ҷумҳурии Ҷопон дар Тоҷикистон ҷаноби Хаджимз Киоава, намояндагони сафоратҳои Англия, Швейтсария, Олмон, Созмони Милали Муттаҳид, ташкилоти байналмилалии "Дунёи Бехатар”, аъзоёни Шӯроҳои ҷамъиятӣ оид ба мусоидат ба ислоҳоти милитсия ва дигар намояндагони ҷомеаи шаҳрвандӣ ширкат доштанд. Иштирокдорони мизи мудаввар зимни суханронӣ оид ба ҳодисаи террористии дар шоҳроҳи Душанбе-Данғара рухдода изҳори нигаронӣ намуда, баён доштанд, ки ин ҳодиса ҳар як инсони комилро водор месозад, то бо ҳам муттаҳид гашта, алайҳи ин гуна амалҳои террористӣ мубориза барем.

Дар ин ҳошия мехоҳам, ки андешаҳои  чанд нафар иштирокдорони ин ҳамоишро рӯйи саҳифа оварам.

Раҳимзода Рамазон Ҳамро, вазири корҳои дохилӣ: "Пеш аз ҳама вобаста ба ҳодисаи мудҳишу ғайриинсонӣ, ки якчанд рӯз пеш нисбати шаҳрвандони хориҷӣ ба амал омад ва 2 шаҳрванди Амрико, 1 шаҳрванди Швейтсария, 1 шаҳрванди Нидерландия ба ҳалокат расиданд, ман ба намояндагони сафорати ИМА ва Иттиҳоди Аврупо изҳори тасаллият менамоям. Дар тамоми ҷаҳон ба вуқӯъ омадани чунин ҳодисаҳо ҳамаи моро водор месозад, ки бояд муттаҳид шавем. Ин ҷинояти мудҳиш дар муддати кӯтоҳ бо дастгирии  ҷомеа ва мардум кушода шуд, ки ин аз тақвият ёфтани ҳамкории милитсия бо мардум шаҳодат медиҳад”.

Хонум Туула Юрёля, роҳбари дафтари барномавии САҲА дар Душанбе: "Дар  навбати аввал, аз фурсати муносиб истифода бурда, ба сафири ИМА изҳори ҳамдардӣ мекунам. Ин мушкилоти ҷаҳонӣ ва глобалӣ мебошад. Аз ин лиҳоз, мо бисёртар таваҷҷуҳи худро ба ҳамкории милитсия бо ҷомеа равона кардаем. Имрӯз дар сохтори милитсия ислоҳот ҷараён дорад ва яке аз самтҳои асосии он, ин беҳтар намудани  ҳамкории милитсия бо ҷомеа мебошад. Дар ин раванд нақши Шӯроҳои ҷамъиятӣ оид ба мусоидат ба ислоҳоти милитсия хеле муҳим мебошад.

Ҷаноби Кевин Коверт, кордори муваққатии сафорати ИМА дар Тоҷикистон:"Нахуст барои таъзия ва дастгирӣ ба ҳозирин изҳори миннатдорӣ намуда, ҳаминро қайд карданиам, ки ин ҳодисаи ба  наздикӣ рухдода чеҳраи аслии Тоҷикистонро нишон намедиҳад. Ин он Тоҷикистоне нест, ки ман ӯро дербоз мешиносам ва дӯст медорам. Аъзои оилаи ман, ки дар Тоҷикистон зиндагӣ менамоянд, дар  амн ва бехатаранд ва хушбахтанд.  Фавран ошкор шудани ин ҷиноят натиҷаи фаъолияти кормандони милитсия ва аъзои Шӯроҳои ҷамъиятист. Ҳамкорӣ миёни мақомоти корҳои дохилӣ ва ҷамъият зарур аст.

Танҳо дар якҷоягӣ ва ҳамкорӣ метавонем алайҳи ифротгароӣ ва тундгароӣ мубориза барем”.

Хадшизм Китаока, сафири фавқулода ва мухтори Ҷумҳурии Ҷопон дар Тоҷикистон: "Ба сафорати ИМА ва Иттиҳоди Аврупо нисбати ҳодисаи рухдода ҳамдардӣ баён намуда, ба роҳбарияти ВКД Ҷумҳурии Тоҷикистон барои ҳаллу фасли фаврии ин ҷиноят сипосгузорам. Донистани неру дар ҷомеа як афзалият аст ва бартарӣ нисбати душман мебошад. Ҳар як аъзои ҷомеа имрӯз бояд бедор ва ҳушёр бошад”.

Дар ҳақиқат, ин гуфтаҳои шахсони  воломақому  чеҳраҳои сиёсии давлатҳо  бори дигар гувоҳӣ аз он медиҳанд, ки аъзои ҲТЭ ҲНИ ва хоҷагони хориҷиашон наметавонанд бо ин гуна амалҳои террористӣ-куштори сайёҳони хориҷӣ обрӯи Тоҷикистону мардуми сарбаланди меҳнатдӯст ва роҳбари давлаташонро латна зананд. Имрӯз тамоми ҷаҳон медонанд, ки ифротгару тундгароҳо киҳо ҳастанд ва чӣ мехоҳанду дар ин сайёра ба чӣ гуна амалҳои  ноадолатона қодиранд. Онҳо аҳриманҳои заҳҳоктабъанд, ки зери оташи афрӯхтаи хеш месӯзанд, чунки беҳуда нагуфтаанд:

 
Ҳар ки бар душмании халқ равон аст
чу баҳр,
Зуд бошад, ки сари хеш чу гирдоб хӯрад.

 

А. Сафарова

"Хатлон”



Шарҳи хонандагон +

Матолиби дигар:

Ҳамоиши модарон бар зидди амалҳои террористӣ

Ҳамоиши модарон бар зидди амалҳои террористӣ

Ҳокимияти давлатӣ
Ҳамкорӣ ҷинояткориро коҳиш медиҳад

Ҳамкорӣ ҷинояткориро коҳиш медиҳад

Ҳуқуқу амният, АСАЛМО САФАРОВА
Ифтитоҳи бинои маркази ҳамкории милитсия бо ҷомеа

Ифтитоҳи бинои маркази ҳамкории милитсия бо ҷомеа

Ҳуқуқу амният, КОМРОНИ БАХТИЁР
Тасдиқи рамзи «соли рушди  Сайёҳӣ ва ҳунарҳои мардумӣ»

Тасдиқи рамзи «соли рушди Сайёҳӣ ва ҳунарҳои мардумӣ»

ҲУНАРҲОИ МАРДУМӢ, Ҳаёти иҷтимоӣ
Нахустин нишасти Шӯрои ҷамъиятӣ оид ба ислоҳоти милитсия

Нахустин нишасти Шӯрои ҷамъиятӣ оид ба ислоҳоти милитсия

Хабарҳо, Ҳуқуқу амният, АСАЛМО САФАРОВА