Дар як сатр
» » М. Хидирзода: «зӯроварӣ дар оила зуҳуроти паҳнгашта буда, бартараф намудани он масъалаи муҳими иҷтимоӣ аст»

М. Хидирзода: «зӯроварӣ дар оила зуҳуроти паҳнгашта буда, бартараф намудани он масъалаи муҳими иҷтимоӣ аст»

21-08-2018, 08:24

Ходимони дин дар мавриди пешгирӣ аз зӯроварӣ дар оила нақши бориз дошта метавонанд, чун аҳли ҷомеаи кишвари мо аксаран пайрави дини мубини ислом буда, сухани уламо ба мардум таъсир дорад. Бинобар ин, ходимони дин бояд ба хотири пешгирӣ аз хушунати хонаводагӣ бо кумитаҳои маҳаллаҳо ҳамкорӣ ба роҳ монанд, мавъизаҳо хонанд ва оилаҳои осебпазирро бо машварату маслиҳати судмандашон роҳнамоӣ кунанд. Ин нукта дар нишасти навбатии Шӯрои ҳамоҳангсозии байниидоравӣ оид ба пешгирии зӯроварӣ дар оила дар вилояти Хатлон, ки таҳти роҳбарии муовини раиси вилояти Хатлон Махфират Хидирзода дар шаҳри Бохтар баргузор шуд, баён гардид.

Зимни ифтитоҳи ин ҳамоиш М. Хидирзода таъкид намуд, ки ҷиҳати пешгирии хушунати оилавӣ, таҳкими ҳамдигарфаҳмӣ ва устувории оила дар чорчӯбаи татбиқи Қонуни Ҷумҳурии Тоҷикистон "Дар бораи пешгирии зӯроварӣ дар оила”, ки Президенти Ҷумҳурии Тоҷикистон Эмомалӣ Раҳмон 19 марти соли 2013 ба имзо расониданд, дар вилояти Хатлон як қатор корҳои шоиста анҷом дода шудааст. Дар натиҷа, сатҳи зӯроварӣ дар оила коҳиш ёфта, мизони азҳампошии оилаҳо низ камтар гардидааст. "Бо вуҷуди ин тадбирҳо, ҳанӯз ҳам проблемаи зӯроварии хонаводагӣ омили нигаронкунанда боқӣ монда, таваҷҷуҳи ҳамарӯза мехоҳад”, - афзуд муовини раиси вилоят.

Дар идомаи ҷаласа Муҳаммадӣ Шарифзода, намояндаи шуъба оид ба корҳои дин, танзими анъана ва ҷашну маросимҳои миллии назди мақомоти иҷроияи ҳокимияти давлатии вилояти Хатлон, доир ба нақши намояндагони дин дар пешгирии зӯроварӣ дар оила маърӯза карда, аз ҷумла гуфт, ки бо иштироки донишмандони ислом ва афроди обруманд дар шаҳру навоҳии вилоят силсилаи вохӯриҳо бо мардум анҷом дода шуда, дар он мавзӯи роҳ надодан ба хушунат, эҳтироми байниҳамдигарии зану шавҳар, ҳифзи оила ва ташаккули ҳамдигарфаҳмию ҳамзистӣ мавриди баррасӣ қарор гирифтааст.

Муовини раиси вилоят М. Хидирзода ба масъулини шуъба оид ба корҳои дин, танзими анъана ва ҷашну маросимҳои миллии вилоят дастур дод, ки дар ҳамкорӣ бо ходимони дин вобаста ба мавзӯи нораво будани зӯроварӣ дар оила маводҳои иттилоотӣ омода ва дар миёни мардум, бахусус оилаҳои осебпазир, паҳн намоянд.

Таъкид шуд, ки зӯроварӣ дар оила - кирдори зиддиҳуқуқии барқасдонаи дорои хусусияти ҷисмонӣ, рӯҳӣ, шаҳвонӣ ё иқтисо-дӣ, ки дар доираи муносибатҳои оилавӣ аз ҷониби як узви оила нисбат ба дигар узви оила содир шуда, боиси поймол шудани ҳуқуқ ва озодиҳои ӯ, расонидани зарари ҷисмонӣ ё зарар ба саломатии ӯ мегардад, ё таҳдиди расонидани чунин зарарро ба вуҷуд меорад.

Назорат ва баҳогузорӣ ба фаъ-олияти Шӯроҳои ҳамоҳангсозии байниидоравӣ оид ба пешгирии зӯроварӣ дар оила дар 9 шаҳру ноҳияи лоиҳавӣ (пилотӣ), аз он ҷумла Бохтар, Левакант, Хуросон, Вахш, Кӯшониён, Ҷ. Балхӣ, Панҷ, Шаҳритӯс, Ҳамадонӣ масъалаи дигари матраҳшуда дар нишасти Шӯрои ҳамоҳангсозии вилоятӣ буд.

Таъкид гардид, ки дар баъзе навоҳӣ фаъолияти Шӯрои ҳамоҳангсозии байниидоравӣ оид ба пешгирии зӯроварӣ дар оила ба таври зарурӣ ба роҳ монда нашудааст. Маркази дастгирии ҷабрдидагони зӯроварӣ дар оила танҳо дар ноҳияи Қубодиён амал мекунад. Мавҷуд будани чунин марказҳо барои ҷабрдидагони хушунат муҳим буда, онҳо метавонанд аз кумаку машваратҳои ҳуқуқӣ ва равоншиносӣ баҳравар гарданд.

Намояндагони ташкилоти ҷамъиятии "Ғамхорӣ” дар ин нишаст иттилоъ доданд, ки дар зарфи ним соли гузашта беш аз 460 нафар ба маркази буҳронии "Ғамхорӣ” муроҷиат кардаанд, ки 62 нафарашон мардҳоянд. Ба ин маркази буҳронӣ, асосан, ҷабрдидагони хушунат муроҷиат менамоянд ва зимнан, дар 7 моҳи сипаригардида 21 нафар дар паноҳгоҳи "Ғамхорӣ” нигоҳ дошта шудаанд.

Елена Максименко, директори филиали ГОПА дар Ҷумҳурии Тоҷикистон, ки лоиҳаи пешгирии зӯроварӣ дар оиларо амалӣ мекунад, зикр намуд, ки ин лоиҳа (PDV) аз ҷониби ширкати GOPA дар Тоҷикистон бо дастгирии молиявии Дафтари Швейтсария оид ба ҳамкорӣ мавриди амал қарор дошта, ба беҳбуди сатҳи огаҳии аҳолӣ аз мушкилоти зӯроварии оилавӣ равона гардидааст. Ӯ афзуд, ки тибқи нақшаи кории Шӯрои ҳамоҳангсозии байниидоравӣ оид ба пешгирии зӯроварӣ дар оила дар вилояти Хатлон, давоми соли ҷорӣ шӯроҳои нави ҳамоҳангсозии байниидоравӣ дар шаҳри Кӯлоб ва навоҳии Ховалинг, Балҷувон, Восеъ, Фархор ва Қубодиён созмон дода мешаванд.

- Лоиҳаи GOPA/PDV барои аъзои 10 Шӯрои ҳамоҳангсозии байниидоравӣ ва шӯроҳои навтаъсис омӯзишҳо доир намуда, дар коркарди роликҳо оид ба пешгирии зӯроварӣ дар оила ва баргузории чорабиниҳои таблиғотию маърифатии дигар мусоидат карда истодааст, - афзуд Е. Максименко.

– Дар ҷаҳони муосир зӯроварӣ дар оила зуҳуроти паҳнгашта буда, бартараф намудани он масъалаи муҳими иҷтимоӣ аст, - гуфт Махфират Хидирзода дар интиҳои ҷамъомади Шӯро. – Мустаҳкам намудани механизми самарабахши иҷроиши Қонуни Ҷумҳурии Тоҷикистон «Дар бораи пешгирии зӯроварӣ дар оила», бозравонии ҷабрдидагони зӯроварии хушунати оилавӣ ба субъектони қонуни мазкур, ҳимояи ҳуқуқҳои қурбониёни зӯроварӣ дар оила яке аз самтҳои асосии кори Шӯрои ҳамоҳангсозии байниидоравӣ маҳсуб мегардад. Бинобар ин, аъзои Шӯрои ҳамоҳангсозии байниидоравӣ бояд мунтазам чорабиниҳои иттилоотӣ ва маърифатиро байни қишрҳои мухталифи ҷомеа баргузор намоянд.

Ҳангомаи ИСМАТ,

"Хатлон”



Шарҳи хонандагон +

Матолиби дигар:

Июл - моҳи тренингҳо оид ба пешгирии зӯроварӣ дар оила

Июл - моҳи тренингҳо оид ба пешгирии зӯроварӣ дар оила

Хабарҳо
Пешгирии зӯроварӣ дар оила

Пешгирии зӯроварӣ дар оила

Хабарҳо, Ҳаёти иҷтимоӣ, ФАРОМӮЗ БОБОЕВ
Баҳри пешгирии зӯроварии хонаводагӣ дар оила

Баҳри пешгирии зӯроварии хонаводагӣ дар оила

Хабарҳо, Ҳаёти иҷтимоӣ, ФАРОМӮЗ БОБОЕВ
Баррасии механизм ва фишангҳои таъсиррасонӣ ба пешгирии зӯроварӣ дар оила

Баррасии механизм ва фишангҳои таъсиррасонӣ ба пешгирии зӯроварӣ дар оила

Хабарҳо, Ҳаёти иҷтимоӣ, ФАРОМӮЗ БОБОЕВ
Шаҳритус. Баҳси пешгирии зӯроварӣ дар оила

Шаҳритус. Баҳси пешгирии зӯроварӣ дар оила

Ҳаёти иҷтимоӣ, Хабарҳо, ҲАНГОМА ПАҲЛАВОНОВА