Дар як сатр
» » Дӯст доштани Ватан аз имон аст!

Дӯст доштани Ватан аз имон аст!

26-11-2015, 11:00



Паёмбари ислом Муҳаммад (с) дар замони худ мардумро ба ватандӯстию ҳифзи он даъват намуда, дар ҳадиси шариф мегӯяд: «Дӯстдоштани Ватан аз гӯшаи имондорӣ аст».
Дӯст доштани Ватан аз имон аст!

Мухбири рӯзномаи «Хатлон» ба иддае аз ҳамватанон бо суоли «Шумо дӯст доштану ҳифз намудани Ватани хеш – Тоҷикистони азизро чӣ гуна маънидод мекунед?» муроҷиат карда, посухҳои зайл гирифт.

Маъбуди Шариф, донишҷӯи ДДҚ аз ноҳияи Фархор:

- Ман тайёрам ҷони хешро барои ҳифзи Ватани азизам фидо созам. Барои ободии он бошад, ақалан сад ниҳол дар як гӯшаи диёр мешинонам.
Латофат Сафарова, директори мактаби таҳсилоти миёнаи умумии рақами 10-и шаҳри Қӯрғонтеппа:

- Азбаски вазифаи мо-омӯзгорон таълиму тарбияи фарзандони ин Ватану ин миллат аст, ҳифзи Ватанро низ дар анҷоми ин рисолат мебинам.

Фирдавс Раҳмонов, ҷавон аз шаҳри Панҷакенти вилояти Суғд, донишҷӯи ДЭТ дар шаҳри Қӯрғонтеппа:

- Имрӯзҳо бархе аз ҷавонони кӯтоҳандешу гаправ ба гурӯҳҳои ифротгаро шомил шуда, дар мулки бегона ба қавле ҷиҳод мекунанд ва имондориро дар ин мебинанд. Вале ин тавр нест. Ҷиҳод ба андешаи ман Ватандӯстӣ, обод кардани кишвар, баҷо овардани хизмати падару модар аст. Ҷавоне, ки дилаш мешавад зодгоҳаш-Тоҷикистони ободро тарк карда, ба ҷанги одамкушӣ Сурия равад, ба Модар-Ватан хиёнат кардааст. Яъне ин гуна ашхос дар қалбаш муҳаббат ба Ватану азизонро надорад.

Сайли Давлатова, бошандаи шаҳри Қӯрғонтеппа:

- Ман аз он мефахрам, ки писарам Фирӯзҷон ихтиёран дар сафи Қуваҳои мусаллаҳи мамлакат хизмати Модар-Ватанро ба ҷо оварда, марзу буми Ватанро ҳифз менамояд. Ӯ бо ин амали ҷавонмардонаи худ сари маро дар байни дигар модарон баланд бардошт. Ба андешаи ман ҳамин аст, Ватандорию Ватандӯстӣ.

Хуршед Одиназода, майори милитсия:

- Фаъолияти-мо кормандони милитсия пешгирии ҷинояту ҷинояткорӣ, таъмини тартиботи ҷамъиятӣ ва сипари Ватан будан аст. Ватан барои халалдор наёфтани сулҳу оромӣ ҳар амре кунад, кӯшиш менамоям, ки онро бечунучаро иҷро намоям.

Хуҷабӣ Каримова, ноиби ректори ДДҚ ба номи Носири Хусрав оид ба корҳои тарбия:

- Меҳри Ватан ба воситаи шири поки Модар ва аллаи ӯ ба дилу дидаи инсон аз тифли ҷой мегирад бо гузашти вақт он афзунтар мегардад. Фикр мекунам, ҳар нафаре, ки пеш аз ҳама худро дӯст медораду хонаву оилаи хешро ҳифз мекунад, пас Ватанро дӯст медораду онро ҳимоя менамояд.

Шараф Сангов, муовини Палатаи савдо ва саноати вилоят:

- Ватан, обу хоки онро бештар аз ҷону дил дӯст медорам. Ва барои ҳифзи он агар лозим ояд, ҷони худро дареғ намедорам. Дар вазифае, ки феълан машғулам барои рушди иқтисодиёти Ватан ва ободии он хизмат мекунам.

Ҳомидҷон Мурчаев, духтури Маркази ёрии таъҷилии тибии шаҳри Қӯрғонтеппа:

- Хизмати софдилона ба халқ худ дӯстдоштани Ватан аст. Дар ҳимояи саломатии мардум бедорхобӣ карда, дар таъмини тандурустии мардум саҳм мегузорам.

Дар ин росто, Ифонниддин Шамсиддинов, имом-хатиби масҷиди ҷомеи «Эмоми Аъзам»-и шаҳри Қӯрғонтеппа, такя ба тарғиби ватанпарваронаи паёмбари ислом намуда, мегӯянд, ки ҳифзи Ватан низ ҷиҳод аст. Ӯ дар шарҳи ин масъала гуфт: «Мурод аз ҷиҳод ҷаҳду талош мебошад. Агар кӯшиш ба харҷ надиҳӣ Ватанро обод ва ҳифз карда наметавонӣ».

Хулоса

Аз гуфтаҳои паймбар (с) бармеояд, ҳар нафаре, ки Ватани худро дӯст медорад, дар қалб заррае аз имон дорад. Ва нафаре, ки дар ҳифзи Ватан бо рисолати хеш омодаасту онро анҷом медиҳад, ҷиҳоде кардааст дар роҳи Яздони пок.

Аз андешаҳои соҳибватанони тоҷик низ ба хулосае омадем, ки халқи мо ҳамеша дӯстдори Ватану сипаҳсолори ин меҳан мебошанд.

Амонҷон МАҲКАМОВ,
«ХАТЛОН»



Шарҳи хонандагон +

Матолиби дигар:

Ҷавонони шуҷоъ ба хизмати Ватан мераванд

Ҷавонони шуҷоъ ба хизмати Ватан мераванд

Фарҳанг ва адабиёт, Хабарҳо, АМОН МАҲКАМОВ
Ифтихори ватандорӣ

Ифтихори ватандорӣ

Ҷавонон ва варзиш
Ҳимояи марзу буми Ватан аз беҳтарини ҷиҳодҳост

Ҳимояи марзу буми Ватан аз беҳтарини ҷиҳодҳост

Ҳаёти иҷтимоӣ, Ҷавонон ва варзиш
Нишони ҷавонмардӣ

Нишони ҷавонмардӣ

Ҷавонон ва варзиш
Аз фитнаҳо дур бошем

Аз фитнаҳо дур бошем

Номаҳои Шумо