Дар як сатр
» » Занони соҳибкор дар муттаҳидӣ табодули таҷриба мекунанд

Занони соҳибкор дар муттаҳидӣ табодули таҷриба мекунанд

8-10-2015, 16:45

Ахиран ҳайати 12-нафараи занони соҳибкори вилояти Хатлон бо мақсади табодули таҷриба ва густариши ҳамкориҳои дуҷониба бо ҳамтоёни худ ба вилояти Суғд сафари корӣ доштанд.

Занони соҳибкор дар муттаҳидӣ табодули таҷриба мекунанд

Ин тадбир бахшида ба ҳафтаи соҳибкорон аз тарафи Ассотсиатсияи миллии занҳои соҳибкори Точикистон, дар ҳамкорӣ бо Оҷонсии рушди байналмилалии ИМА дар Тоҷикистон, дар чорчӯбаи лоиҳаи «Соҳибкории бонувон воситаи васеъ намудани ҳуқуқ ва имкониятҳои занон»ташкил карда шуд.

Дар доираи ин сафар ҳайати вилояти Хатлон ба муассисаю коргоҳҳои кории занҳои соҳибкори вилояти Суғд ташриф оварда, бо фаъолияти пурсамари онҳо аз наздик шинос шуданд. Аз ҷумла онҳо аз сехи дӯзандагии «Салимабону» (ш. Исфара), хоҷагиҳои деҳконии «Томирис» ва «Мадина» (н. Ҷаббор Расулов), комплекси хизматрасонии «Муроду Мақсад» (ш. Конибодом), кӯдакистонҳои хусусии «Офтобак»-у «Донояк» ва кошонаи ҳусни «Шоира люкс» дидан намуда, мубодилаи афкор ва таҷриба намуданд.

Ҳамчунин ин гурӯҳи занҳои хатлонӣ дар рӯзи дуюми сафари корӣ дар толори «Кохи матбуот»-и шаҳри Хуҷанд бо бонувони соҳибкори вилояти Суғд вохӯрӣ анҷом доданд. Дар мулоқот соҳибкорон миёни ҳам суолу ҷавоб намуда, ба ин васила роҳҳои рушди ҳамкории дутарафаро дида баромаданд. Инчунин худи ҳамон рӯз вохӯрии ҷамъбастӣ бо ҳузури мутахассисони Раёсати кор бо занон ва оилаи мақомоти иҷроияи ҳокимияти давлатии вилояти Суғд ва шахри Хучанд, иштирокчиёни озмуни бонуи соҳибкори сол «Фараҳ-2012» ва «Фараҳ-2014», озмуни «Беҳтарин бизнес-накша байни занони ҷавони Тоҷикистон», аъзои АМЗСТ ва хабарнигорони ВАО баргузор гардид.

Зимни ин ҷамъомад Н. Юнусова, сармутахассиси Раёсати кор бо занон ва оилаи вилояти Суғд, гуфт, ки ҳамкории занони соҳибкори минтақаю вилоятҳо аҳамияти муҳими иқтисодию иҷтимоӣ дошта, барои муаррифии ҳунарҳои мардумӣ ва сайқал додани маҳорати соҳибхоназанҳо мусоидат мекунад.

Ҳайати 12-нафараи соҳибкорони вилояти Хатлон дар охир ҳамроҳи занони суғдӣ аз фаъолияти МЗ «Гулрухсор» дидан карданд.

Занони соҳибкор дар муттаҳидӣ табодули таҷриба мекунанд

Бояд зикр кард, ки қабл аз ин чорабинӣ бо дастгирии Ассотсиатсияи миллии занҳои соҳибкори Тоҷикистон чанд нафар аз занони тоҷири вилояти Хатлон, дар қатори фаъолзанони ҷумҳурӣ, бо мақсади табодули таҷриба ва омӯзиш аз фаъолияти коршиносони мамолики хориҷ дар арсаи соҳибкорӣ ба Амрикову Туркия сафар карда, бо бардоштҳои нек баргаштанд.

Чанд соҳибкори хатлонӣ таассуроти хешро аз ин сафар ба таври зайл баён намуданд: Махфират Саидраҳмонова сокини ноҳияи Шаҳритуз: “Даҳ сол боз дар 8 га замин кори кишоварзиро пеш мебарам. Чанд муддат дар иёлоти Калифорния будам. Ба ман таҷрибаи боғдории ин кишвар бештар хуш омад. Дар ноҳияи мо, ки иқлимаш гарм аст, меваро зиёд нигоҳ дошта намешавад. Чун мепӯсаду ба боғдор зиён меоварад. Ман дар он ҷо роҳи ҳалли ин мушкилро дарёфтам. Акнун вақт равад ҳам, аз таҷрибаҳои омӯхтаам истифода намуда, аввал тамоми дарахтони боғамро решакан карда, ниҳолҳои дигари босифати пайвандӣ мешинонам. Умед дорам аз ин баъд кор ранги дигар мегирад».
Мавлуда Сафарова, иштирокчии озмуни ҷумҳуриявии «Фараҳ-2012»: «Ҳамагӣ як толори либос дар бозори шаҳри Кӯлоб доштам. Ду соли охирсе толори дигар кушода, тиҷораташро васеътар намудам. Бинои толорҳоеро, ки дар иҷора менишастам, харида хусусӣ намудам. Як толори дигар дар бозори «Корвон»-и пойтахт кушодаам. Баъд аз сафари Туркия тасмим гирифтам, ки то охири сол сехи дӯзандагии «Чакани Кӯлоб»-ро низ бунёд намуда, ба мардум намудҳои гуногуни пироҳану тоқиҳои кӯлобӣ пешниҳод намоям. Дидани корхонаҳои азими ин кишвар боз дар вуҷуди ман олами дигареро бедор кард ва ба худ қавл додам, ки бояд аз ин ҳам бештар кор кунам».

Тибқи иттилои Ассотсиатсияи миллии занҳои соҳибкори Тоҷикистон, ин ташкилот феълан беш аз 3000 нафар аъзо дорад. Аъзоёнро соҳибкорони соҳаҳои истеҳсолот, кишоварзӣ, маориф, фурӯши молҳои саноатӣ ва хӯрокворӣ ташкил медиҳанд.

Занони соҳибкор дар муттаҳидӣ табодули таҷриба мекунанд

Бояд гуфт, ки сарвари Ассотсиатсияи мазкур Гулбаҳор Махкамова дар доираи фаъолияти кориаш бо мақсади рушди арсаи соҳибкорӣ миёни занон ҳамеша бо аъзоёни худ машварат намуда, мизи мудаввару вохӯриҳо баргузор менамояд. Ҳамчунин аз тарафи кормандони ин ташкилот, маводҳои навтаринро, ки барои сайқал додани маҳорати соҳибкории занону бонувон мусоидат мекунад, дастрас менамоянд.
Ассотсиатсияи миллии занҳои соҳибкори Тоҷикистон (АМЗСТ) аз соли 1995 фаъолият намуда, ният дорад, ки ба Ассотсиатсияи калонтарини худмаблағгузор табдил гардад ва занони соҳибкори Тоҷикистонро муттаҳид ва дастгирӣ намояд.

Мадина СУЛТОНОВА,
мутахассиси оид ба маркетинги АМЗСТ,

Амонҷон МАҲКАМОВ,
журналист



Шарҳи хонандагон +

Матолиби дигар:

Вохӯрии Давлаталӣ Саид бо соҳибкорони Хатлон

Вохӯрии Давлаталӣ Саид бо соҳибкорони Хатлон

Иқтисоду тиҷорат, Хабарҳо, НОСИРҶОН МАЪМУРЗОДА
Баррасии нақши занон дар рушди илм

Баррасии нақши занон дар рушди илм

Фарҳанг ва адабиёт, Хабарҳо, Маориф ва илм, АМОН МАҲКАМОВ
Омӯзиши соҳибкорӣ дар Шӯрообод

Омӯзиши соҳибкорӣ дар Шӯрообод

Ҳаёти иҷтимоӣ, Хабарҳо, Арсаи кишоварзӣ
Дар соҳибкорӣ монеа ҳаст...

Дар соҳибкорӣ монеа ҳаст...

Иқтисоду тиҷорат, Ҳаёти иҷтимоӣ, Хабарҳо, НИЗОМИДДИН ИСОЕВ
Қӯрғонтеппа. Шумораи занони роҳбар меафзояд

Қӯрғонтеппа. Шумораи занони роҳбар меафзояд

Ҳаёти иҷтимоӣ, Хабарҳо, ҲАНГОМА ПАҲЛАВОНОВА