Дар як сатр
» » Ватанро бо тавони рустамона посбон бошем

Ватанро бо тавони рустамона посбон бошем

18-07-2015, 14:31

Муроҷиатномаи иштирокчиёни маҷлиси фаъолони ноҳияи Темурмалик ба мардуми шарифи Тоҷикистон



Ватанро бо тавони рустамона посбон бошемҲамватанони азиз!

«Ваҳдати миллӣ сутуне мебошад, ки давлат ва миллати моро пойдору устувор нигоҳ медорад ва вазифаи муқаддаси ҳар яки мо аз он иборат аст, ки бо заҳмати созанда ин пояи давлатдории миллиамонро боз ҳам таҳким бахшем», - таъкид намудаанд Президенти Ҷумҳурии Тоҷикистон Ҷаноби Олӣ муҳтарам Эмомалӣ Раҳмон.

Барои халқи тоҷик солҳои истиқло-лият давраи таҳкими сулҳу субот, ризоияту ваҳдати миллӣ, ташаккули иқтисодиёт, марҳалаи пешрафту таҳавуллоти азим дар ҳама самтҳои зиндагӣ, давраи дастовардҳои беназири сиёсӣ, иҷтимоӣ, иқтисодию маънавӣ ва фарҳангӣ буд.
Раванди сулҳи тоҷикон рӯйдоди душвор, вале муҳими сиёсӣ буд. Бо роҳбарии Президенти Ҷумҳурии Тоҷикистон Ҷаноби Олӣ муҳтарам Эмомалӣ Раҳмон мардуми тоҷик, комилан, ба сулҳу ваҳдат расид. Ин рӯйдод муваффақияту дастоварди бузурги тамоми тоҷикони олам маҳсуб меёбад. Таҷрибаи сулҳофарии тоҷикон, ки асосгузораш Эмомалӣ Раҳмон аст, имрӯзҳо мавриди омӯзиш ва таваҷҷуҳи созмонҳои байналмилалӣ қарор дорад. Ин ба ҷаҳониён собит кард, ки миллати дорои фарҳангу таърихи бузург аз ин имконият ва неъматҳои худодод истифода бурда, худро аз вартаи ҳалокат наҷот дод.

Ҳамдиёрони гиромӣ!
Маҳз ба шарофати сулҳу субот, тинҷию осоиштагӣ, озодандешию таҳкими демократия, дар қатори дигар ҳизбҳои сиёсии дар кишвар фаъолияткунанда Ҳизби наҳзати ислом низ фаъолият дорад ва давоми 15 соли охир дар парлумони кишвар намояндаи худро дошт. Вале, мутаассифона, Ҳизби наҳзат, бахусус, роҳбарияти он дастовардҳои сулҳу субот ва пешрафту тараққиёти Тоҷикистони азизро зери шубҳа қарор дода, ба амалу кирдорҳое даст зада истодаанд, ки воқеаҳои солҳои 90-уми асри 20-умро ба хотир меорад. Бар асари ин ҷанги хонумонсӯз, ки Ҳизби наҳзат, диндорони ифротгарою нимчамуллоҳои мутаассибе чун Кабирию Ҳайит ва даҳҳо ҳамин гуна ашхос ба сари миллати тоҷик бор карданд, зиёда аз 25 ҳазор нафар модарон аз шавҳарони худ ҷудо гардида, қариб 60 ҳазор нафар тифлони бегуноҳ аз навозиши падар маҳрум гаштанд ва ба иқтисодиёти кишвар ба андозаи беш аз 10 миллиард доллари амрикоӣ зарар расид, ки барқарор намудани он вақти тӯлонӣ ва заҳмату талошҳои зиёдро тақозо намуд.

Воқеаҳои шуми солҳои 90-уми асри 20 барои онҳо сабақ нагардида, пардапӯшонаю ошкоро фикру ақидаҳои ифротгароёнаю экстремистии худро таблиғ менамоянд, мардум, бахусус ҷавонони ноогоҳро то ҳанӯз фирефтаи таблиғоти иғвоангезонаи худ намуда истодаанд. Бо роҳҳои ғайриқонунӣ ва пешкории онҳо дар мамлакат мактабҳои хусусии динӣ кушода, дар онҳо таълимоти носолим ва террористӣ-экстремистӣ дода мешаванд. Ба ин мактабҳои ғайрирасмӣ барои фарогирии таълимот аз ҳисоби оилаҳои рӯҳониён, оилаҳои камбизоат, шахсони каммаърифату кӯтоҳандеш ва калаванда интихоб карда мешаванд.

Ҳизби наҳзат ва роҳбарони кӯтоҳандешу бегонапарасташ ҳеҷ гоҳ аз пешрафту рушду инкишофи Ватани азиз, баланд гардидани сатҳи зиндагии сокинони кишвар забон намекушоянд. Фақат ба танқиду паст задани давлату Ҳукумати Тоҷикистон, чи дар дохилу чи дар хориҷи кишвар, машғул буда, аз дасти хоҷагони хориҷиашон обу нон мехӯранду ҷилваи сиёсатбозӣ намуда истодаанд. Ҳисси ватандӯстию миллатдӯстӣ, ифтихори ватандорӣ ва ғурури миллӣ дар ниҳоди онҳо мавҷуд нест ва ин бори дигар аз он шаҳодат медиҳад, ки онҳо на дин, на имон, на маҳзаб ва на Ватан доранд.

Ҳамин аст, ки аксарияти сокинони ноҳияи Темурмалик фаъолияти ҳизби наҳзати исломро, ки зери ниқоби дини мубораки ислом андешаҳои муғризона ва нопоку ғайриинсониро талқин менамоянд, истиқлолият, озодӣ ва шаъну шарафи ватандориро зери шубҳа мегузоранд ба хубӣ дарк менамоянд, ки дар фаъолияти ин ҳизб нишонаҳои ангехтани иғво ва тафриқагузорӣ миёни одамон баръало ба мушоҳида мерасад.

Ҳамватанони азиз!
Акнун фурсате фаро расидааст, ки мо аз пайравӣ ба анъанаҳои неку наҷибонаи пешгузаштагонамон дар роҳи таҳкими сулҳу дӯстӣ, эҳтироми ҳамдигарӣ ба муқобили ҳама гуна зуҳуроти номатлубу нанговар ва ҳаракатҳои фитнаҷӯй муборизаи беамон барем, то кишвари азизамон ободу ором, халқи он соҳиби зиндагии шоиста ва ҳаёти осуда бошад. Аз ин лиҳоз, бо итминони комил хулоса бароварда метавонем, ки Ватани азиз ва халқи бедордилу меҳанпарасту тамаддунофари тоҷик ба ҳеҷ гуна ҳизби ифротӣ, ба мисли ҲНИТ, ниёз надорад.

Бинобар ин, аз номи кулли сокинони ноҳияи Темурмалик якдилона аз Сарвари муаззами кишвар ва Маҷлиси Олии Ҷумҳурии Тоҷикистон даъват менамоем, ки фаъолияти ҲНИТ дар қаламрави Тоҷикистон қатъ гардонида шавад.

Тавре Президенти Ҷумҳурии Тоҷикистон, Ҷаноби Олӣ муҳтарам Эмомалӣ Раҳмон таъкид намудаанд: «Таърих ибратомӯз аст ва ваҳдати бадастомада ба мо ҳушдор медиҳад, ки аз хатоҳои гузашта хулоса барорем. Имрӯз бо азми бунёдкорию созандагӣ пойдевори зиндагии фардоро гузорем ва ба қадри давлату давлатдории миллии худ бирасем ва ба наслҳои оянда, кишвари обод, тараққикарда ва хуррамро ба мерос гузорем». Пас:

Ватанро бо тавони рустамона посбон бошем,
Мубориз аз барои ваҳдати худ ҷовидон бошем.


Муроҷиатнома дар машварати
фаъолони ноҳияи Темурмалик рӯзи
9 июли соли 2015 қабул гардид.



Шарҳи хонандагон +

Матолиби дигар:

Эмомалӣ Раҳмон – Пешвои арзандаи миллати тоҷик

Эмомалӣ Раҳмон – Пешвои арзандаи миллати тоҷик

Сиёсат, Ҳаёти иҷтимоӣ, Хабарҳо, Номаҳои Шумо
Дар соли 2016 ба дастовардҳои бештар ноил гардем

Дар соли 2016 ба дастовардҳои бештар ноил гардем

Сиёсат, Хабарҳо
Фарзанди фарзонаи миллат

Фарзанди фарзонаи миллат

Сиёсат, Хабарҳо, Номаҳои Шумо
Ҷавонони Фархор: ҲНИТ барои мо лозим нест

Ҷавонони Фархор: ҲНИТ барои мо лозим нест

Хабарҳо, Ҷавонон ва варзиш, Номаҳои Шумо
Ваҳдати миллиро чун дастоварди миллӣ пос дорем

Ваҳдати миллиро чун дастоварди миллӣ пос дорем

Сиёсат, Хабарҳо