Баррасии раванди хизматрасонии стоматологӣ дар вилоят

Муҳаррир: Суҳроби Рустам аз 11 август, Бахш: Ҳокимияти давлати / Слайдер / Матлабҳои охирин / Хабари рӯз / Тандурусти ва экология / Хабарҳо, Боздид 862

---

Конференсияро муовини раиси вилояти Хатлон Фирӯза Шарифӣ ифтитоҳ бахшида, доир ба раванди рушди соҳаи тандурустӣ дар вилоят сухан гуфт.

- Тайи солҳои соҳибистиқлолии кишвар бо дастгирии бевоситаи Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон барои таъмини шароитҳои мусоиду муосири хизматрасониҳои тиббӣ ба аҳолӣ тадбирҳои зиёди натиҷабахш амалӣ гардидаанд, - зикр кард муовини раиси вилоят Ф. Шарифӣ. - Имрӯз тамоми амалиёти ташхису табобати муроҷиаткунандагон дар муассисаҳои тандурустии дохили мамлакат, аз он ҷумла вилояти Хатлон, анҷом дода мешаванд.

Дар идома масъулин ва олимону мутахассисони соҳа вобаста ба мавзӯи меҳварии конференсия маърӯзаҳои пурмуҳтавои таҳлилӣ ироа намуда, оид ба вазъи хизматрасонии стоматологӣ ва самтҳои рушди он дар вилояти Хатлон, камбудиву мушкилоти ҷойдошта дар ҷода ва роҳҳои ҳалли он ибрози ақида карданд.

Чорабинии мазкур дар арафаи Иди касбии табибон бо дастгирии мақомоти иҷроияи ҳокимияти давлатии вилояти Хатлон ва ташаббуси Вазорати тандурустӣ ва ҳифзи иҷтимоии аҳолии Ҷумҳурии Тоҷикистон, Пажӯҳишгоҳи илмӣ-клиникии стоматология ва ҷарроҳии ҷоғу рӯй, Раёсати тандурустӣ ва Маркази стоматологии вилояти Хатлон бахшида ба ҷашни 30-солагии Истиқлоли давлатӣ роҳандозӣ карда шуд.

Ҳангомаи Исмат,
“Хатлон”