Дар як сатр
» » Нақзи ҳуқуқи боз 100 муҳоҷири тоҷик дар Русия

Нақзи ҳуқуқи боз 100 муҳоҷири тоҷик дар Русия

27-05-2015, 10:28

Нақзи ҳуқуқи боз 100 муҳоҷири тоҷик дар Русия

25 май наздик ба 100 нафар шаҳрвандони Тоҷикистон, ки дар ширкати «Монолитстрой»-и шаҳри Екатеринбурги Русия кор мекарданд, аз кор ронда шудаанд.

Умед, ҷавони зодаи ноҳияи Қубодиён дар суҳбат бо мо гуфт, ки сабаби аз кор пеш кардани наздик ба 100 нафар аз ҷониби корфармо он аст, ки маъмурият ба коргарони худ аз моҳи феврал ба ин сӯ маош надодааст.

- Ҳамаи коргарон ҷамъ шуда, ҳақмузди кори худро аз роҳбарамон талаб кардем, - мегӯяд Умед. - Вале роҳбари идора ба милисаҳо занг зада гуфт, ки «биёед, тоҷикҳои зиёд дар ин ҷо беҳуҷҷат кор карда истодаанд!». Милисаҳо омада, чанд нафар муҳоҷири меҳнатиро, ки беҳуҷҷат кор мекарданд, дастгир ва ба милисахона бурда, ҳар яке аз онҳоро ба андозаи 4 ҳазор рубли русӣ ҷарима бастанд.

Ба иддаои бархе аз муҳоҷирони корӣ, муддати 5 моҳ мешавад, ки корфармоён дар шаҳрҳои дигари Русия низ дар пардохти маоши коргарон бо ҳар баҳона таъхир мекунанд ё онро пурра намедиҳанд. Дар шарҳи ин мушкил кордиҳандаҳо буҳрони молиявии Русияро мисол меоранд, ки аз аввали соли 2015 шурӯъ гардидааст.

- Аз тарафи дигар, - идома медиҳад ҳамсуҳбати мо Умед, - супурдани имтиҳон, гирифтани патент ва таҳияи санадҳои дигар барои будубош дар қаламрави Русия мо – муҷоҷирони меҳнатиро нигарон намудааст. Барои омодасозии ин ҳама ҳуҷҷатҳо ҳар як муҳоҷирро зарур аст, ки камаш 40-50 ҳазор рубли русӣ масраф кунаду онҳоро ба даст орад.

Худ қазоват кунед, ки ин қадар маблағро муҳоҷири нав аз ватан ба Русияомада аз куҷо дастрас карда метавонад, то ҳуҷҷатҳояшро пурра таҳия созад. Ин ҳама сабабҳост, ки бархе аз ҳамватанони мо дар мулки ғарибӣ сарсону саргардон шудаанд.

Дар ҳамин ҳол, Раил, шаҳрванди Русия, ки дар шаҳри Уфа ронандаи такси шуда кор мекунад, зимни суҳбат бо мо иброз намуд, ки ҳамсараш дар муассисаи тиббие ба ҳайси ҳамшираи шафқат фаъолият дорад, вале ӯ низ муддати 5 моҳ боз маоши худро нагирифтааст. «Завҷаам ният дорад, ҳамин ки маоши панҷмоҳаи худро гирифт, корро бас кунад», - зикр намуд Раил.

Раҳмоналӣ ДОДАРХӮҶАЕВ,
махсус барои «Хатлон»,
Екатеринбург, Русия



Шарҳи хонандагон +

Матолиби дигар:

Бо кӯмаки «Хатлон» мушкил ҳал шуд! Маошро гирифтанду идона фиристоданд

Бо кӯмаки «Хатлон» мушкил ҳал шуд! Маошро гирифтанду идона фиристоданд

Хабарҳо, Ҳуқуқу амният
Оворагии 60 муҳоҷири тоҷик

Оворагии 60 муҳоҷири тоҷик

Хабарҳо, Ҳуқуқу амният
Ихроҷи 3 муҳоҷир аз Уфаи Русия

Ихроҷи 3 муҳоҷир аз Уфаи Русия

Хабарҳо, Ҳуқуқу амният, Ҷавонон ва варзиш
Қубодиён: Ҳоли ягона гимназияи хусусӣ табоҳ мешавад?

Қубодиён: Ҳоли ягона гимназияи хусусӣ табоҳ мешавад?

Хабарҳо, Маориф ва илм, Таҳқиқи журналистӣ, КОМРОНИ БАХТИЁР
«Пётри Кабир дар куҷо қаҳва нӯшидааст?»

«Пётри Кабир дар куҷо қаҳва нӯшидааст?»

Ҳаёти иҷтимоӣ, Ҷавонон ва варзиш