Дар як сатр
» » Ҳабиби модарони Фархор

Ҳабиби модарони Фархор

7-03-2015, 10:25

Модар. Чи ҳарфи ширине. Ҳамин ки вожаи модарро ба забон мегирем, пеш аз ҳама зиндагӣ, ҳаёт пеши назар меояд. Зеро эҳёбахшу давоми зиндагӣ модар аст. Модар ба ҳар як тавсифу ситоиш меарзад. Ин аст, ки аз Арастуву Афлотун сар карда, то пайғамбарамон Ҳазрати Муҳаммад (с) ва баъдан Наполеону дигар бузургони илму адаб ва сиёсат дар ситоиши модар ҳарф задаанд. Хуллас, дар васфи модар чи қадар асару достонҳо эҷод намоем ҳам, кам аст.

Табиист, ки пеш аз иди Рӯзи Модарон чи дар саҳфаи рӯзномаву чи дар садою симо дар ситоиши модар менависанду соатҳо ҳарф мезананд. То заррае бошад ҳам, шукӯҳу мартабаи зан-модарро ба қалам диҳанд ва ё манзури хонандагону тамошобинон гардонанд.

Суханро ба дарозо набурда, мо низ тасмим гирифтем, ки каме ҳам бошад, аз рӯзгори зан - модар ҳарф занем, номи ӯро дар саҳфаи рӯзнома оварем.
Сафари хизматии мо дар ноҳияи Фархор чун рӯзе чанд қабл аз ҷашни Рӯзи Модар рост омада буд, ба ин хотир зимни суҳбат аз муаллима Раъно Раҳимзода, раиси ноҳияи Фархор, ки як зани ҳалиму меҳрубон ва таҷрибаи зиндагиомӯхта ва давоми солҳои фаъолияташ дар вазифаҳои масъули хизматӣ кор кардааст, хостем бифаҳмем, ки кӣ дар ноҳия бештар фаъолият кардаасту дар рушди ноҳия саҳм гирифтааст, то дар борааш рӯйи саҳфа чизе биёрем. Муаллима чанд лаҳза таҳаммул карданд ва баъд гуфтанд:

- Бароям хеле мушкил аст, киро гӯям, намедонам. Агар номбар кунам, шояд рӯйи рӯзномаатон пур шавад. Ҳам дар соҳаи маорифу ҳам тандурустӣ, саноат ва хусусан хоҷагии қишлоқро намегӯӣ, чи қадар корнамоию диловарӣ нишон медиҳанд занон. Кори таълиму тарбияи фарзандон ва нигоҳубини хона болокории ин. Ба ҳар ҳол, номи занони зиёдеро ёдовар шуд апаи Раъно.

Ба тасмими банда сараввал пешаи духтурӣ омад, чаро ки табиб ба ҳаёт сару кор дорад ва дар поси саломатии мардум аст, барои ҳифзи саломатии омма ранҷи бисёр мекашад.
- Ин тавр ки бошад, худат медонӣ, - гуфт апаи Раъно ва моро соҳибихтиёр кард.

Ҳабиби модарони Фархор

Дар беморхонаи марказии ноҳия бо мудири шуъбаи таваллудхона Қоғазмо Муъминова вохӯрдем. Суҳбат оростем. Аз худаш дида бештар дар бораи ҳамкоронаш ҳарф зад. Номи табибон Садафмоҳ Одинаева, Моҳира Кишварова, Гулшанбӣ Давлатова ва дигаронро бо эҳтиром ба забон гирифта, дар бораи фаъолияташон ҳарф зад ва қайд кард, ки ҳатто Садафмоҳ Одинаева ба ӯ ҳаққи устодӣ ҳам дорад. Зеро он малакаю таҷрибае, ки дорад, аз ин зани меҳнатӣ омӯхтаю сабақ гирифтааст. Давоми суханаш байти Мавлои Румро хонд:

Ҳеҷ кас аз пеши худ чизе нашуд,
Ҳеҷ оҳан ханҷари тезе нашуд.
Ҳеҷ мавлоно нашуд мавлои Рум,
То муриди Шамси Табрезӣ нашуд.

Хуллас, Қоғазмо Муъминова аз ҳамкорон, устодон барои дастгирию меҳнати душворашон баҳри нигаҳдошти саломатии мардум, ба дунё омадани тифлони навзод, баланд бардоштани обрӯю нуфузи шуъба миннатдории зиёд намуд.

Акнун чанд ҳарфе дар бораи зиндагинома ва фаъолияти меҳнатии ин зани рӯзгордида.

Қоғазмо Муъминова як зани ҳалиму хоксор аст. Бо вуҷуди он ки вазифаи масъулеро бар дӯш дораду дар миёни ҳамкорон ва умуман мардуми ноҳия эътибори хосаеро дорост, ҳеҷ гоҳ худашро боло намегирад. Дар муомилаю муносибат бо эҳтиёҷмандон, беморон аз рӯйи одоби шарқиёна рафтор мекунад, хеле нарм сухан мегӯяд. Зеро хуб медонад, ки пеш аз ҳама барои дардмандон сухани хушу гуворо дору аст.

Қоғазмоҳ дар шаҳраки Фархори ноҳияи Фархор ба дунё омадааст. Падари марҳумаш Шералӣ Муъминов пешаи муҳандисӣ дошт. Дар оила ёздаҳ нафар фарзанд буданд. Қиблагоҳашон кӯшиш мекард, ки фарзандонашон дониши хуб гиранду оянда роҳи зиндагии худро пайдо кунанд. Қоғазмоҳ фарзанди калонӣ буд. Мехост пешаи дорушиносиро касб намояд. Вале ба ин воқеае сабаб шуду духтури муолиҷавӣ-момодоягӣ (акушер-гинеколог)-ро интихоб намуд. Аниқтараш ӯро ба ин роҳ ҳидоят намуданд.

Соли 1982 котиби Кумитаи марказии Ҳизби коммунисти Тоҷикистон Гулҷаҳон Бобосодиқова дар ҷамъомади фаъолони ноҳия ширкат варзида, баробари дигар масъалаҳои доғи рӯз дар бораи соҳаи тандурустӣ ҳарф зада, изҳори ташвиш намуд, ки дар ноҳия духтурон аз ҳисоби занон ниҳоят каманд ва алалхусус духтурони акушер-гинеколог. Падари Қоғазмоҳ, ки яке аз фаъолони ноҳия буду дар ҷамъомад иштирок дошт, бегоҳии он рӯз бо духтараш дар ин хусус суҳбат намуд. Раъйи Қоғазмо дигар гашт ва ӯ ҳамон сол ба Донишгоҳи давлатии тиббии Тоҷикистон ба факултаи муолиҷавӣ, ихтисоси акушер - гинеколог ҳуҷҷат супорид ва аз санҷишҳо гузашта, донишҷӯ гардид. Қоғазмоҳ аз солҳои донишҷӯӣ, ҳамсабақон, лаҳзаҳои хотирмони он замонаш ёддовар шуд. Аз заҳмати устодон дар таълиму тарбия, омӯхтани дарси тиб изҳори сипос намуда, номи устодонаш Саодат Мансуровна, Уруна Узоқовна ва дигаронро ёдоварӣ намуд. Қоғазмо зери таълиму тарбияи чунин устодони сахтгиру меҳрубон соли 1987 донишгоҳро бомуваффақият хатм намуда, бо роҳхати Вазорати тандурустии ҷумҳурӣ ба шаҳри Кӯлоб ба кор омад ва тайи ду сол дар ин ҷо фаъолият кард. Баробари ин курси дусолаи ординаториро низ гузашт ва табиби баркамол гардид. Таҷриба ва маҳорати кори табибони шинохтаи шаҳри Кӯлоб Малика Файзова, Раъно Бобохонова ва боз дигаронро омӯхта, аз мактаби онҳо гузашт. Баъди хатми ординатура соли 1989 ба зодгоҳаш - ноҳияи Фархор баргашта, дар беморхонаи ҷамоати деҳоти Ғайрат фаъолият намуд. Ва баъдан то соли 2003 ҳамчун табиб, маслиҳатчӣ роҳбарии маркази солимгардонӣ-репродуктивии ноҳияро ба уҳда дошт. Дониши хубу таҷрибаи кориашро ба назар гирифта, соли 2003 Қоғазмоҳро мудири шуъбаи зоишгоҳи беморхонаи маркази ноҳия таъин намуданд. ӯ кору амали роҳбарони қаблиро идома дод. Кӯшид, ки дар беҳдошти фаъолияти шуъба саҳми худро гузорад. Чуноне ки имрӯз ба мушоҳида мерасад, ба мақсади пеши худгузошта то дараҷае расидааст. Инро ҳамкорону беморон низ тасдиқ менамоянд. ӯ то ин замон роҳбарии шуъбаро ба уҳда дошта, кӯшиш менамояд, ки ҳам худу ҳам кормандони шуъба ба ниёзмандон бештару беҳтар хизмат расонанд.

Ранҷу заҳматҳои шабонарӯзӣ, самараи меҳнати ҳалол ва хизматҳои зиёди Қоғазмоҳ буд, ки Вазорати тандурустӣ ва ҳифзи иҷтимоии кишвар ӯро бо унвони «Аълочии тандурустии Тоҷикистон» сарфароз гардонидааст. Духтури дараҷаи олӣ буда, ҳамчунин дар ҷамъбасти сол сазовори номи баланди «Духтури сол» гардидааст. Ва инак, чанде пеш фаъолияти баландашро ба назар гирифта, ӯро вакили Маҷлиси вакилони халқи ноҳия интихоб намуданд.

- Баробари он ки мо аксаран дар беморхона фаъолият менамоем, иловатан рӯзҳои шанбе дар деҳот рӯзҳои қабул дорем, - мегӯяд Қоғазмоҳ Муъминова. - Ба ҷамоатҳои деҳот рафта, ҳамзамон ғайр аз муоинаи беморон боз бо онҳо суҳбату вохӯриҳо гузаронида, дар мавзӯҳои гуногун суҳбатҳо доир менамоем. Оид ба пешгирии бемориҳо маслиҳату дастурҳо медиҳем. Ин кор натиҷаи дилхоҳ ба бор овард. Аз рақамҳо бармеояд, ки имрӯз шумораи таваллуд дар беморхона хеле афзудааст. Ва беҳбудии кор ин аст, ки вазъи тансиҳатии тифлони навзод ҳам хеле хуб аст.

Чуноне ки Қоғазмоҳ Муъминова изҳор дошт, бо дастгирии давлату Ҳукумати кишвар, бахусус Сардори давлатамон, Ҷаноби Олӣ муҳтарам Эмомалӣ Раҳмон вазъи беморхонаи маркази ноҳия дучанд беҳтар гардид. Он аз таъмири босифат бароварда шуда, бо дастгоҳҳои навтарин муҷаҳҳаз гардид, ки кори мо-табибонро хеле осон намуд. Акнун эҳтиёҷмандон барои ташхису муайян намудани бемориашон ба ҷойи дигар саргардон намешаванд. Дар ҳамин ҷо мо бемории онҳоро муайян ва табобат менамоем.

Акнун дар бораи ҳаёти оилавии Қоғазмо мухтасар маълумот медиҳем. ӯ оиладор ва соҳиби 4 фарзанд аст. Дар оилаи онҳо аксарият касби духтуриро пешаи худ намудаанд. Ин аст, ки оилаи онҳоро дар ноҳия оилаи тиббӣ низ мегӯянд. На танҳо бародарону хоҳарон пайи ӯ рафтаанд, балки фарзандонаш низ пешаи ӯро интихоб кардаанд. Ҳоло яке аз онҳо дар бахши дорушиносӣ ва дигаре дар бахши иқтисодии Донишгоҳи миллии Тоҷикистон таҳсил менамоянд. Фарзандони дигар ҳоло дар мактаби миёна таҳсил намуда, оянда табиб шуданианд.

Дар поёни суҳбат Қоғазмоҳ Муъминова хоҳиш карда, афзуд:
- Мо дар арафаи Рӯзи Модар қарор дорем, мехоҳам дуруду таманниёти неки худро ба модарон расонда, ба онҳо саломатӣ, табъи хуш, хотири ҷамъ ва осмони софу амонӣ орзу менамоям. Бигузор, модарон ҳамеша шоду хандон бошанду дар таълиму тарбияи фарзандон муваффақ гарданд ва ҷавонони шоистаи давру замонро тарбия намоянд.

Мо низ ба табиб ва ҳабиби модарон Қоғазмо Муъминова барору комёбиҳо ва тансиҳатӣ орзу намуда, Рӯзи Модарро барояш табрик мегӯем.

Наҷот САФАРЗОДА,
ноҳияи Фархор



Шарҳи хонандагон +

Матолиби дигар:

Умри ибратбахши табиби музофотӣ

Умри ибратбахши табиби музофотӣ

Ҳаёти иҷтимоӣ, Хабарҳо, ИСМАТУЛЛО ҲАСАНОВ
Р. Сапармуротова: «Барои муваффақ гардидан бояд аз дили замин огоҳ бошӣ»

Р. Сапармуротова: «Барои муваффақ гардидан бояд аз дили замин огоҳ бошӣ»

Иқтисоду тиҷорат, Хабарҳо, Арсаи кишоварзӣ, ҲАНГОМА ПАҲЛАВОНОВА
Ғамхори аҳли заҳмат

Ғамхори аҳли заҳмат

Маориф ва илм, НАҶОТ САФАРЗОДА
Нинае, ки бо лутфу забондонияш дилҳоро тасхир карда

Нинае, ки бо лутфу забондонияш дилҳоро тасхир карда

Ҳаёти иҷтимоӣ
Ҳамеша дар хизмати мардум хоҳам буд

Ҳамеша дар хизмати мардум хоҳам буд

Тандурустӣ ва экология, ҲАНГОМА ПАҲЛАВОНОВА