Дар як сатр
» » Корнамоиҳои ҷангӣ бемисланд

Корнамоиҳои ҷангӣ бемисланд

7-05-2018, 11:23

Германияи фашистӣ, бе эълон намудани ҷанг, субҳи 22 июни соли 1941 аҳдшиканона бо қувваи бузургу техникаи зиёди ҷангӣ, аскарони бешумор ба хоки давлати Шӯравӣ зада даромад. Дар як муддати кӯтоҳ шаҳрҳо ва маҳалҳои аҳолинишинро хароб намуда, ба шаҳри Москва, ки пойтахти як давлати абарқудрат буд, то ба 30 километр наздик шуд. Мақсад дошт, ки ин давлати абарқудратро барҳам дода, мардумашро ғулом намуда, тамоми сарватҳояшро азони худ намояд. Вале, чи тавре ки халқ мегӯяд: «чоҳкан зери чоҳ аст».

Дар ин ҷанги мудҳиш аз тамоми ҷумҳуриҳои бародарӣ, ки дар тобеияти Иттиҳоди давлатҳои Шӯравӣ буданд, барои гирифтани пеши роҳи Германияи фашистӣ ҳазорон ҳазор ҷавонмардони ғаюру далер ба фронт даъват шуданд. Хурдсолону пиронсолон бошанд, дар ақибгоҳ шабу рӯз меҳнат карда,  ба ҷанговарон хӯрокаву пӯшока равон менамуданд.

Дар солҳои Ҷанги Бузурги Ватанӣ аз ҷумҳурии мо низ ҳазорон нафар ватандӯстонро ба фронт фиристоданд, ки онҳо дар муҳорибаҳои назди шаҳри Моск-ва, Сталинград, Ленинград, Ки-ев, Минск ва озодкунии як қатор давлатҳои Европа иштирок намуда, ҷоннисорӣ карданд. Душманро то ба лонааш - шаҳри Берлин бурда, шаҳди Ғалабаро онҷо чашиданд. 

Ҷанги Бузурги Ватании солҳои 1941-1945 даҳшатноктарин ҷанг дар дунё ба ҳисоб меравад. Ин ҷанг ҷони миллионҳо аскарони Шӯравӣ ва дигар давлатҳои сулҳдӯстро ба коми худ фурӯ бурд. Қисме аз фиристодагони Тоҷикистон, аз ҷумла аз ноҳияи А. Ҷомӣ (онвақта Куйбишев) дар ин ҷанг қурбон шуданд. Қисмашон бо тани маҷрӯҳ бошанд ҳам, бо сари баланд, ба хонаҳояшон баргаштанд. Ҷанговарон Салим Ҳафизов, Маҳмуд Мирзоев, Шомаҳмад Шоимардонов, Қарохӯҷа Дӯстов, Ғиёсиддин Мирзоев, Сафарбек Нозимов, Маллабой Шодиев ва дигарон   дар солҳои барқароркунӣ, ободии диёр ва тарбияи насли наврас саҳми босазо гузоштанд. Имрӯз онҳо дар қайди ҳаёт нестанд ва дуо мекунем, ки рӯҳашон шод бошад.

Хушбахтона, имрӯз иштирокчиёни Ҷанги Бузурги Ватанӣ  Қутбиддин Сироҷов аз шаҳраки Абдураҳмони Ҷомӣ, Турсун Юлдошев ва Давлатхӯҷа Саидхоҷаев аз деҳоти Калинин, Абдулҳамид Маҳмудов ва Теша Ҷалолов аз деҳоти Яккатут, Гулмурод Тағоев ва Туфон Ҳайдаров аз деҳоти Ифтихор, инчунин, шахсони ба онҳо баробаркардашуда, ки дар ақибгоҳ заҳмат кашидаанд, Насриддин Мирзоев, Назрӣ Саидхоҷаев ва Ғуломалӣ Давлатов дар қайди ҳаёт буда, дар иҳотаи фарзандону наберагон ва аберагон давлати пирӣ доранду маҳфилорои ҳар маъракаву маҳфиланд.

Рӯзи 9 май 73 - солагии Ғалаба дар Ҷанги Бузурги Ватаниро қайд менамоем. Ин рӯзи фархундаро ба ҷанговарон, шахсони ба онҳо баробаркардашуда ва тамоми мардуми шарифи вилояту ноҳия табрику муборакбод мегӯем. Орзумандем, ки осмони Ватани азиз – Тоҷикистон доимо софу беғубор ва мардуми шарифаш хушу хурсанд, зиндагии шоиста дошта  бошанд.   

 

СафармуҳаммадЗарифӣ,

раиси Шӯрои ветеранҳои ҷангу меҳнати ноҳияи

Абдураҳмони Ҷомӣ

 

Турсун Юлдошев аз зумраи он иштирокчиёни Ҷанги Бузурги Ватанист, ки хизматро на дар майдони набард, балки баҳри ҳифзи сарҳадоти Иттифоқи Шӯравӣ ба анҷом расонидааст. Ӯ соли 1942 аз деҳаи Чашмасор (Нахимов)-и деҳоти ба номи Калинин ба хизмат даъват шуда, баъди омӯзиши начандон тӯлонии ҳарбӣ дар қисми ҳарбии наздисарҳадии Қазоқистон-Хитой то соли 1947 мемонад. Барои ҳушёриву зиракӣ ва боздошти сарҳадвайронкунандагон дар ин нуқтаи ҳассос бо чандин ордену медал қадрдонӣ гардидааст.

Баъди адои хизмат баҳри ободонии диёр ба ҳайси омӯзгор, инспектори маориф, котиби ҳизб, роҳбари колхоз хизмати босазо карда омадааст.

Айни замон бо шукргузорӣ аз ғамхориҳои давлату Ҳукумат давлати пирӣ меронад.

 

 

Гулмурод Тағоев ба синни 94 расида, ҳоло ҳам чун ҷавонмардони асил машғули кори саҳрост. Ҳамчун деҳқони муваффақ дар самти пахтакорӣ 33 сол инҷониб, дар деҳаи Навободи деҳоти «Ифтихор», пешаи касб дорад. Пеш аз ин, ҳамчун назоратчӣ дар самтҳои кишоварзӣ ва чорводории ҳамин хоҷагӣ фаъолият карда, ба муқобили дуздони моликияти ҷамъиятӣ мубориза бурдааст.

Хизматҳои ҷангиашро бошад, ҳамчун ватанпарвари асил аз музофоти Курск оғоз бахшида, то давлати Чехословакиямардонавор расидааст. Дар ҳамин ҷо рӯзи Ғалабаро истиқбол мегирад. Хизматро баҳри барқароркуниҳои оқибати ҷанг, дар сарҳадот то соли 1947 давом додааст.

Корнамоиҳои ҷангиаш бо медалу орденҳои «Ғалаба бар Германия», «Барои шуҷоат», «Ситораи сурх», «Шараф» қадрдонӣ шудаанд. Хушбахтии оилавӣ низ насиби Гулмурод Тағоев гардидааст. Имсол Сафаргул, духтари хурдии ин пири мушкилнописанд, ба синфи якум меравад.

 

 

 Иштирокчии Ҷанги Бузурги Ватанӣ Туфон Ҳайдаров, калонсолтарин байни ҳамяроқони ҷангист, ки айни замон дар деҳаи Навобод, деҳоти Ифтихор ба сар мебарад. Ӯ соли 1942 аз ҳамин макон ба хизмат даъват шуда, баъди се моҳи машқи ҳарбӣ, ки дар музофоти Ката-Қурғони Ӯзбекистон мегузаранд, ҳамроҳи ҳамяроқон ба фронти Украина фирис-тода мешаванд.

Ҳарчанд дар майдони ҷанг зиёд набуд, бо вуҷуди ин, тавонист аз худ корнамоиҳои зиёд нишон диҳад. Ҳамчун тирандози моҳиру нишонгир дар як сол ба гирифтани ордену медалҳои «Барои шуҷоат», «Ситораи сурх» ва «Ғалаба бар Германия» сазовор мегардад.

Ноомади кор, баъди ҳамин, сахт маҷрӯҳ гардида, ҳамчун маъюби гурӯҳи дуюм ба зодгоҳ бармегардад ва то ин дам баҳри пешравии хоҷагии халқ содиқона ва босазо кор карда омадааст. Ин пири ботадбир ба наздикӣ ба синни мубораки 100-солагӣ қадам мениҳад.

И. Ҳасанов, М. Ашӯров

 

 

 

 

 

 



Шарҳи хонандагон +

Матолиби дигар:

Аз ҷавонӣ то ба пирӣ дар хизмати ватан

Аз ҷавонӣ то ба пирӣ дар хизмати ватан

Чеҳранигорӣ, ФАРОМӮЗ БОБОЕВ
Аз ҷавонӣ то ба пирӣ дар хизмати ватан

Аз ҷавонӣ то ба пирӣ дар хизмати ватан

Чеҳранигорӣ, ҲАНГОМА ПАҲЛАВОНОВА
Тасдиқи рамзи «соли рушди  Сайёҳӣ ва ҳунарҳои мардумӣ»

Тасдиқи рамзи «соли рушди Сайёҳӣ ва ҳунарҳои мардумӣ»

ҲУНАРҲОИ МАРДУМӢ, Ҳаёти иҷтимоӣ
Рӯйдоди  фаромӯшнопазири башарият

Рӯйдоди фаромӯшнопазири башарият

Хабарҳо, Ҳаёти иҷтимоӣ, Номаҳои Шумо
Саҳми тоҷикистониҳо дар ғалаба бузург аст

Саҳми тоҷикистониҳо дар ғалаба бузург аст

Ҳаёти иҷтимоӣ, Ҳуқуқу амният