Дар як сатр
» » Аз ҷавонӣ то ба пирӣ дар хизмати ватан

Аз ҷавонӣ то ба пирӣ дар хизмати ватан

8-05-2018, 11:09

Вақте аз замони Ҷанги Бузурги Ватанӣ ёдовар мешавем, пеши рӯямон симои ҷавонони ватандӯсту нотарси солҳои 1941-1945 ва мӯйсафедони барнодилу шуҷои 90-100-солаи имрӯз падидор мегарданд, ки рӯйи синаи хеш медалҳоро овехта, солорона ва бо ифтихор сухан мегӯянд. Бояд гуфт, ки онҳо шоистаи таҳсинанду офарин, зеро вақте зиндагиномаи ҳар яки онҳоро варақ мезанем, аён мегардад, ки барои дифои марзу буми Ватан  ҷисму ҷони хешро дар хатар гузоштаанд. Ин маротиб низ мо тасмим гирифтем бахшида ба Иди ғалаба аз шуҷоату қаҳрамонии ду нафар иштирокчии  Ҷанги Бузурги Ватанӣ аз ноҳияи Панҷ, ки айни ҳол дар ноҳия 7 нафар собиқадори ҶБВ дар қайди ҳаётанд, барои хонандаҳои арҷманд қисса кунем.

Ёқуб Ҷӯраев соли 1925 дар ноҳияи Кировобод (ҳозира ноҳияи Панҷ) дар оилаи деҳқон таваллуд шудааст. Волидайн ӯро бо як меҳру муҳаббат ва орзуҳои нек ба камол расониданд. Мехостанд  ҷигарбандашон мисли фарзандони барӯманди миллати тоҷик номдор ва донишманд ба воя расад. Вале хабари оғози ҷанги хонумонсӯзи соли 1941 орзуҳои волидайнро ба ғамхона дабдил дод.

Замоне ки  Ёқуб 16 сол дошт, дар сарзамини Иттиҳоди Ҷамоҳири Шӯравии Сотсиалистӣ  ҷанг алайҳи фашизми гитлерӣ сар шуд. Баъд аз як соли оғози ҷанг ӯро дар синни 17, яъне моҳи марти соли 1942 аз комиссариати ҳарбии ноҳия ба сафи Қувваҳои мусаллаҳи мамлакат даъват намуданд. Ёқуби ҷавон мисли ҳазорҳо ҷанговарони ҷасури меҳан барои ҳимояи ватан ба майдони ҷанг рафт. Сараввал, ӯро барои омӯхтани яроқҳои ҷангӣ ва тактикаҳои ҳарбӣ ба  шаҳри Самарқанди Ҷумҳурии Ӯзбекистон оварданд. Ӯ тӯли се моҳ дар он ҷо тамрин намуда, баъдан ба шаҳри Кёнигсберг, сипас, ба кишвари Руминия фиристода мешавад. Ёқуб бештар дар амалиётҳои ҷангии фронти шимолии соҳили Балтика иштирок намуда, ба муқобили душманон мубориза бурдааст. Солҳои охири Ҷанги Бузурги Ватанӣ дар яке аз муҳорибаҳои шадидтарин дар сарҳади Руминия аз тири фашистони гитлерӣ  маҷруҳ мешавад. Барои табобат Ёқубро ба госпитали ҳарбӣ мебаранд. Бо ҳамин ӯ Ғалабаи бузургро дар госпитал истиқбол мегирад.

Баъди пирӯз гаштани собиқ Иттиҳоди Шӯравӣ Ёқуб мехост бо сари баланд ба назди волидону хешовандон ба ватан баргардад. Вале ин орзуҳо низ ба гӯшаи хомӯшӣ рафт. Зеро баъди шикасти Германияи фашистӣ кишвари Ҷопон моҳи августи соли 1945 ба муқобили Иттиҳоди Шӯравӣ ҷанг эълон намуд. Артиши бузурги Шӯравӣ ба муқобили Ҷопон муборизаро оғоз намуд. Ёқуб дар ин муҳориба дар ҳайати фронти Забайкал ҳамчун миномётчӣ ҷангидааст. Аскарони шуҷои Иттиҳоди Шӯравӣ тавонистанд бори дувум низ Японияи милитаристиро торумор намуда, ба ҷанг хотима гузоранд. 

Ёқуб  то соли 1950 хизмати ҳарбиро идома дода, баъдан ба зодгоҳаш баргашт. Ӯ барои корнамоиҳояш дар Ҷанги Бузурги Ватанӣ бо 17 ордену медал сарфароз гардонида шудааст. Соли 1952 оиладор шуда, соҳиби 8 фарзанд мебошад. Ӯ аз соли 1950 то соли 1980 дар шуъбаи Вазорати корҳои дохилии ноҳияи Панҷ дар вазифаҳои гуногун фаъолият намуда, баъдан ба нафақа баромадааст.

 

Фаромӯз Бобоев,

«Хатлон»



Шарҳи хонандагон +

Матолиби дигар:

Корнамоиҳои ҷангӣ бемисланд

Корнамоиҳои ҷангӣ бемисланд

Чеҳранигорӣ
Аз ҷавонӣ то ба пирӣ дар хизмати ватан

Аз ҷавонӣ то ба пирӣ дар хизмати ватан

Чеҳранигорӣ, ҲАНГОМА ПАҲЛАВОНОВА
Рӯйдоди  фаромӯшнопазири башарият

Рӯйдоди фаромӯшнопазири башарият

Хабарҳо, Ҳаёти иҷтимоӣ, Номаҳои Шумо
Достони чор бародари ҳамяроқ

Достони чор бародари ҳамяроқ

Хабарҳо, Ҳаёти иҷтимоӣ, Номаҳои Шумо
Азми таҷлили 100-солагии аввалин қаҳрамони СССР аз Тоҷикистон дар вилояти Х ...

Азми таҷлили 100-солагии аввалин қаҳрамони СССР аз Тоҷикистон дар вилояти Х ...

Хабарҳо, Ҳаёти иҷтимоӣ, Фарҳанг ва адабиёт