Дар як сатр
» » То кай ба фарҳанги миллиамон беэҳтиромӣ мекунем?

То кай ба фарҳанги миллиамон беэҳтиромӣ мекунем?

25-04-2018, 08:10

Либос муаррифгари миллату давлат буда, ҳангоми зебо дӯхта шудан ҳусну ҷамолро меафзояд. Дуруст пӯшида тавонистани либос низ нишондиҳандаи рафтору ахлоқи неки инсон аст. Мардуми тоҷик аз замонҳои қадим ба тозагии либос диққати ҷиддӣ дода, ба пироҳанҳои миллии атласу чакан таваҷҷуҳи бештар доштанду доранд. Вале имрӯзҳо дар кӯчаву хиёбон, маконҳои дилхушию фароғатӣ, бозор, ҷойҳои ҷамъиятӣ қисме аз занону духтарони тоҷикро дучор меоем, ки либосҳои хориҷии нозеб, аз қабили сатру ҳиҷоб, пироҳани сиёҳу торик ба бар карда, гаштугузор мекунанд. Дар ин баробар бо якдигар бо садои баланд суханони қабеҳ гуфта, механданду ба ғайбати дигарон машғул мешаванд. Бояд гуфт, ки дур будан аз асолати хеш ва тақлид кардан ба фарҳанги бегона хоси мардуми тоҷик набуда, пайомади бад дорад.

Оид ба ин масъалаи мубрам ва роҳҳои пешгирии он бо чанд тан суҳбат оростем, ки фишурдаи онро манзур месозем.

Низора Олимова, мудири бахши кор бо ҷавонон ва варзиши ноҳияи Дӯстӣ:

- Вақте ки мо дар маҳаллаҳо бо падару модарон оид ба бар кардани сатри сиёҳ дар ҷавондухтаронашон суҳбат мекунем, онҳо мегӯянд: «Дар хусуси пӯшиши либос духтарони мо бештар тақлид ба филмҳои хориҷӣ мекунанд. Зеро, вақтҳои бекории худро онҳо на бо китобхонӣ, балки ба тамошои филмҳои туркӣ мегузаронанд».

Ин падидае мебошад, ки аз берун ба мо ворид шудааст. Шояд бархе соҳибкороне бошанд, ки мехоҳанд бо ин роҳ соҳиби маблағе шаванд ва истифода аз иродаи сусти баъзе аз модарону ҷавондухтарон истифода карда, онҳоро тарғиб мекунанд ба чунин либосҳо. Умедворем, ки дар рӯзҳои наздик духтарону модарони мо либоси бегонаро аз худ дур мекунанд ва боз рӯ меоранд ба либоси миллии худ. Дар ин маврид дуруст баён доштаанд: «Зани тоҷикро либоси миллиаш зеботар мекунад, на ин ки либоси халқу миллати дигар».

 

Манучеҳр Ҳасанов, донишҷӯ:

- Дар хиёбонҳои шаҳр баъзан ашхосеро мушоҳида мекунем, ки фарҳанги миллии хешро риоя накарда, рӯ ба фарҳанги бегонагон ниҳодаанд. Ин рафтор хусусан барои мо-ҷавонон нигаронкунанда мебошад. Дар ВАО мехонем ва мебинем, ки ҳамарӯза ин мавзӯъ мавриди баҳси кормандон қарор мегирад. Аммо то ҳол ин амал ҳалли худро наёфтааст. Хуб мешуд, ки дар муассисаҳои таълимӣ барномае бо номи «Анъанаҳои миллӣ ва риояи он» роҳандозӣ гардад. Ин то ҷое метавонад ба ҷавонон ва умуман аҳли ҷомеа дарси хубе шавад.

 

Тӯтинисо Юсупова, директори Китобхонаи оммавии вилояти Хатлон ба номи Шамсиддин Шоҳин:

- Либоси миллии мо ҳеҷ зиддияте ба таълимоти ислому Қуръону суннат надорад. Он либосе, ки модаркалонҳои мо ва имрӯз миллати тоҷик дорад, кушод асту тозаву озода. Дини мубини Ислом инро қабул мекунад. Мо набояд ба тақлидкорӣ роҳ дода, бо либоси бегона ифтихор кунем. Либоси миллии занони тоҷик беҳтарин либос буда, аз ба бар кардани он ифтихор дорем. Дар бисёр ҳолатҳо аксарияти занону духтарон барои камбудиҳои худро пӯшонидан ва ё диққати атрофиёнро ба худ ҷалб кардан ҳар гуна сатрро ба бар мекунанд, ки боиси нигаронии аҳли ҷомеа мегардад.

Ҳар вақте ки зани сатру ҳиҷоби сиёҳпӯшеро мебинем, фикр мекунем, ки ӯ мотамзада бошад. Ҳатто дар ҳолати мотам доштан либоси сиёҳ хосияти хуб надорад. Дар чунин ҳолат, яъне мотамдорию азодорӣ либоси сабз беҳтарин либос аст, ки то якчанд рӯзи муайян ба бар карданаш ҷоиз аст. Аксарияти занҳои сатрпӯшро на нодориву камбизоатӣ ва на илму дониши динӣ, балки ҳирси молу сарват ба амалҳои бадахлоқӣ водор намудааст, ки сатрпӯш шаванд, чунки дини мубини Ислом дар ҳар давлат ва минтақае, ки по гузошт, ҳаргиз либоси миллии қавмеро аз байн набурд. Бо зоҳирпарастиву худнамоӣ, тақлид ба урфу одатҳои бегона ва дурӣ аз маданият ва арзишҳои миллӣ наметавон пеш рафт ва инкишофи ҷомеаро таъмин намуд.

 

Абдуқодир Аббосов, сокини ноҳияи Данғара:

- Сатру ҳиҷоб дар миллати мо зебанда нест ва ҳеҷ гоҳ нахоҳад буд. Худоро бо ақл мешиносанду бо қалб мепарастанд, на бо сару либосу сатру ҳиҷобу риш. Либоспӯшӣ ҳам қоидаву одоби худро дорад. Либос пӯшидан барои ҷойи кор, барои хона, тӯю маърака ва ҷашнҳо ва ғайра. Ҳар як либосро бояд фарқ кард. Ҳастанд нафароне, ки бо як пироҳан ҳам тӯй мераванд, ҳам ҷойи кор ва ҷойҳои варзишӣ. Имрӯз шукрона мекунем, ки тамоми шароит барои мо муҳайё аст. Ҳама гуна либосро дарёфтан мумкин. Бояд мо бештар либосҳои миллии худро тарғибу ташвиқ кунем.

 

Муқаддас Сатторова, корманди Раёсати кор бо занон ва оилаи вилояти Хатлон:

- Дар ноҳияҳои Панҷ, Абдураҳмони Ҷомӣ, Кӯшониён ва Хуросон нафарони сатру ҳиҷобпӯш нисбат ба дигар шаҳру навоҳии вилоят бештар ба чашм мерасанд. Ин нафарон фикр мекунам, ки доир ба таърихи ин пироҳан маълумот надоранд. Вазифаи асосии ҳар як падару модар аз он иборат аст, ки насиҳат карда гӯяд, ки либоси миллии тоҷикиро бипӯш, зеро барои ҳар як миллат зебанда либоси худаш аст. Ба фарҳанги миллатҳои дигар тақлид кардан маънои онро дорад, ки мо фарҳанги бойи худро эҳтиром намекунем.

 

Гулистон Пиракова, директори Осорхонаи таъриху кишваршиносии вилояти Хатлон ба номи «Авасто»:

- Хизматчиёни давлатӣ, кормандони ташкилоту муассисаҳо тарзе либос пӯшанд, ки мувофиқ ба сиёсати давлати дунявӣ бошад. Сиёсати давлати мо имрӯз онро талаб мекунад, ки фарзандонамонро ҳамчун тоҷик дар рӯҳияи ватандӯстӣ ва зебопарастӣ тарбия намоем. Ҳангоме ки духтарону занонро бо либоси сиёҳу ҳиҷоб мебинем, фикр мекунем, ки онҳо шаҳрванди хориҷи кишвар бошанд. Духтарону заноне, ки сатри сиёҳро ба бар мекунанд, хонашин ҳастанду саводи кофӣ надоранд. Ин як тақлиди кӯркӯрона аст. Нафарони ҳиҷобпӯш аз сабаби иродаи суст ва саводи кофӣ надоштанашон либоси миллии тоҷикиро қадр намекунанд. Фаромӯш набояд кард, ки тақлид ба фарҳанги ғайр ва зоҳирпарастӣ инсонро гумроҳ мегардонад.

Роҳбари кишвари мо имрӯз қадри тоҷик ва либоси миллиамонро дар тамоми дунё баланд бардошта, пайваста ҳунарҳои қадимаро аз нав эҳё намуда истодааст. Мо-ҳамагон ин ташаббусҳои ҳомии сулҳу ваҳдатро бо самимият дастгирӣ менамоем. Сарҷамъона амал кардан метавонад дар пешгирӣ аз паҳн шудани расму ойини миллати бегона дар қаламрави ҷумҳурӣ ва ҳифзи арзишҳои милливу фарҳангӣ асос гузорад.

 

 Таҳияи

Кароматулло РАҲМАТОВ,

махсус барои «Хатлон»




Шарҳи хонандагон +

Матолиби дигар:

Чакан - куртаи наврӯзӣ

Чакан - куртаи наврӯзӣ

ҲУНАРҲОИ МАРДУМӢ
Шоҳҷоизаи «маликаи наврӯз»-ро  зебосанами  кӯлоб  соҳиб шуд

Шоҳҷоизаи «маликаи наврӯз»-ро зебосанами кӯлоб соҳиб шуд

Ҷавонон ва варзиш
Бо пироҳани миллӣ мо аз ҷамъият дур нахоҳем шуд

Бо пироҳани миллӣ мо аз ҷамъият дур нахоҳем шуд

Хабарҳо, Фарҳанг ва адабиёт, Номаҳои Шумо
Сокини шаҳр будан масъулият надорад?

Сокини шаҳр будан масъулият надорад?

Хабарҳо, Ҳаёти иҷтимоӣ, Тандурустӣ ва экология, Матолиби чандрасонаӣ, КОМРОНИ БАХТИЁР
Матои синтетикӣ зарар дорад

Матои синтетикӣ зарар дорад

Тандурустӣ ва экология