Дар як сатр
» » Тақдири насли пешбарандаи давлат дар дасти омӯзгор аст

Тақдири насли пешбарандаи давлат дар дасти омӯзгор аст

26-01-2015, 06:28


«Омӯзгор дар раванди таълиму тарбия ҳуқуқи хато карданро надорад, зеро тақдири насли ояндасоз ва пешбарандаи давлату ҷомеа дар дасти ӯст. Яъне омӯзгор дар раванди таълиму тарбия баробари падару модар ва шахсоне, ки онҳоро иваз мекунанд, нақши асосӣ дорад ва ҳамчун роҳнамои маънавӣ барои ба камол расонидани насли шоистаи даврон масъул аст».

Аз Паёми Президенти кишвар Эмомалӣ Раҳмон ба Маҷлиси Олӣ, 23 январи соли 2015

Тақдири насли пешбарандаи давлат дар дасти омӯзгор аст

Президенти мамлакат Эмомалӣ Раҳмон зимни ироаи Паёми навбатиаш ба Маҷлиси Олии Ҷумҳурии Тоҷикистон чун ҳамасола ба соҳаи илму маориф, мақоми омӯзгор дар рушди ҷомеа ва зарурати боло бурдани сифати таълиму тарбияи шогирдон таваҷҷуҳи хоса зоҳир намуд. Сардори давлат аз ҷумла таъкид кард, ки масъалаҳои баланд бардоштани сатҳу сифати таълим ва дар низоми таҳсилоти миёнаи умумӣ ҷорӣ намудани усулҳои инноватсионӣ ва фаъоли таълим, инчунин баланд бардоштани сатҳи касбии омӯзгорон таваҷҷуҳи боз ҳам бештари масъулонро тақозо мекунад.

Роҳбарият ва ҳайати профессорону устодони Донишгоҳи давлатии Қӯрғонтеппа ба номи Носири Хусрав ҷиҳати иҷрои дастуру ҳидоятҳои Сарвари давлат тадбирҳои зиёдеро меандешанд. Дар ҳақиқат, сатҳу сифати дониши шогирдон, тарбияи шоистаи онҳо маҳз ба донишу таҷриба, малакаву маҳорати касбӣ, усули таълим, дигар паҳлӯҳои фаъолияти шахсии омӯзгор ва инчунин ба кӯшишу ғайрат, шавқу ҳаваси толибилмон вобастагии зич дорад.

Ҳар як муваффақияти донишҷӯён, омӯзгорон ва кормандонро роҳбарияти донишгоҳ комёбии худ дониста, онҳоро бо ифтихорномаву мукофотҳо сарфароз менамояд. Ҷоизаҳои махсуси донишгоҳ барои устодону донишҷӯёне, ки ихтирооте анҷом медиҳанд ё дар олимпиадаҳо дастболо мешаванд, боиси рӯҳбаландӣ ва ҳавасмандии онҳо барои идомаи кандуковҳои илмӣ мегардад.

Тараққиёти ҷамъият ва прогресси илмию техникӣ аз мактабҳои олӣ тақозо мекунад, ки муаллимони дорои малакаю маҳорати баланди эҷодкорӣ, донандаи хуби технологияи муосир ва дар амал татбиқкунадаи донишро омода ва равонаи дабистонҳо намоянд.

Бо дарназардошти ҳидоятҳои Сарвари давлат, роҳбарияти ДДҚ ба номи Носири Хусрав ва омӯзгорони он ба равнақу ривоҷ додани малакаҳои касбии донишҷӯён диққати махсус медиҳанд. Таҷрибаомӯзии донишҷӯён нишон медиҳад, ки иштирок ва дониши донишҷӯён-таҷрибаомӯзон-муаллимони оянда сол аз сол беҳтар шуда истодаааст. Масалан, ҳамин гуна коромӯзиро чанде пеш донишҷуёни курси чоруми ихтисоси технологияи ДДҚ дар муассисаҳои таҳсилоти миёнаи умумии рақамҳои 3 ва 15-и шаҳри Қӯрғонтеппа анҷом доданд.

Донишҷӯён дар ҳафтаи аввали таҷрибаомӯзӣ бо мактаб, бо хонандагони синфҳои вобасташуда, ҳуҷҷатнигорӣ шинос шуда, ҳуҷҷатҳои лозимаи таҷрибаомӯзӣ, нақшаи тақвими фанни технология, нақшаи корҳои беруназсинфӣ аз ихтисос, нақшаи кории роҳбари синфиро тартиб доданд.

Вазифаи асосии мактабҳои олии омӯзгорӣ тайёр намудани муаллимони аз ҷиҳати касбӣ пурра ва хуб ташаккулёфта, дорои маданияти баланди инсонӣ, донишманди асосҳои истеҳсолот, техника ва технологияи замонавӣ, мустақилона, ташаббускорна ва эҷодкорона ҳал карда тавонистани масъалаҳои таълиму тарбия мебошад, ки онро дар рафти таҷрибаомӯзӣ дар амал ҷорӣ намудан имконпазир мешавад.

Санҷишҳои мунтазам аз тарафи мушовирон, роҳбарони факулта ва донишгоҳ нишон дод, ки донишҷӯёни курси 4-уми ихтисоси технология дар рафти таҷрибаомӯзӣ фаъолияти хуб нишон доданд. Онҳо ба ғайр аз корҳои таълимӣ, беруназсинфӣ ва мактабӣ ба фаъолияти тарбиявӣ низ машғул шуданд. Бо талабагони сустхон, қафомон, аз оилаҳои камбизоат пайваста кори тарбиявӣ ва фаҳмондадиҳӣ мебурданд. Дар рафти таҷрибаомӯзӣ ба маҳфилҳои гуногуни фанни технология роҳбарӣ намуда, ҳамроҳи шогирдони мактаб ва омӯзгори фанни технология асбобҳои гуногун сохтанд. Дар мактаби миёнаи №3 донишҷӯёни таҷрибаомӯз асбобҳои амалкунандаи модели нерӯгоҳи барқи бодиро сохтанд.

Дар рафти таҷрибаомӯзӣ донишҷӯён донишҳои амиқ ва мустаҳкам, малакаҳои босифат гузаронидани машғулиятҳо бо истифодабарии усулҳои гуногуни таълимӣ, ба монанди баён, амалӣ, озмоишӣ, намоишдиҳӣ ва самаранок истифода бурдани вақти таълим омӯзонда шуда, вазифаи омӯзгор дар такмил додани техникаю технологияи истеҳсолот ва ҷорӣ намудани технологияи замонавиро омӯхтанд.

Сарварони мактабҳо ва муаллимон қаноатмандии худро дар робита ба дониш ва иштироки донишҷӯён дар рафти таҷрибаомӯзӣ изҳор намуданд.

Раҳбарият ва устодони ДДҚ ба номи Носири Хусрав минбаъд низ ҷиҳати боз ҳам баланд бардоштани маҳорат ва малакаи касбии донишҷӯён – омӯзгорони оянда ба таври доимӣ таҷрибаомӯзӣ ва барои омӯзгорони мактабҳо курсҳои такмили ихтисосу бозомӯзӣ ташкил карда, барои ҳарчи бештар шинос намудани онҳо бо технологияҳои муосири таълим кӯшиш ба харҷ медиҳанд. Ин тадбир, он гуна ки дар Паёми имсолаи Президенти мамлакат Эмомалӣ Раҳмон ба Маҷлиси Олӣ омадааст, амри зарурӣ мебошад.

Ҳақназар ФАТТОЕВ,
саромӯзгори кафедраи технологияи коркарди масолеҳи ДДҚ ба номи Носири Хусрав



Шарҳи хонандагон +

Матолиби дигар:

Паёми Пешво саодати рӯзгори мост

Паёми Пешво саодати рӯзгори мост

Хабарҳо, Маориф ва илм, Номаҳои Шумо
ДДҚ: Дастовардҳо хурсандибахшанд

ДДҚ: Дастовардҳо хурсандибахшанд

Хабарҳо, Ҷавонон ва варзиш, Маориф ва илм, АМОН МАҲКАМОВ
Чаро омӯзгор бо либоси хоси наварӯсон ба мактаб меояд?

Чаро омӯзгор бо либоси хоси наварӯсон ба мактаб меояд?

Фарҳанг ва адабиёт, Хабарҳо, Маориф ва илм, ҲАНГОМА ПАҲЛАВОНОВА
Ҷорӣ намудани дарси маърифати оиладорӣ ба нафъи кор аст

Ҷорӣ намудани дарси маърифати оиладорӣ ба нафъи кор аст

Ҳаёти иҷтимоӣ, Номаҳои Шумо
Н. Хусрав. Таҳсили 3528 хонанда дар синфҳои ӯзбекӣ

Н. Хусрав. Таҳсили 3528 хонанда дар синфҳои ӯзбекӣ

Хабарҳо, Маориф ва илм