Дар як сатр
» » Пешниҳод: «фурӯшгоҳи «армуғони бохтар» кушода шавад»

Пешниҳод: «фурӯшгоҳи «армуғони бохтар» кушода шавад»

7-04-2018, 10:07

Банда Марям Сафарова - нафақагир, ихтисосам рассом мебошад. Асарҳои ман тақрибан дар тамоми осорхонаҳои кишваршиносии Тоҷикистон, аз он ҷумла, дар осорхонаҳои шаҳрӣ ва вилоятӣ, Театри вилоятии мусиқӣ-мазҳакавии ба номи Ато Муҳаммадҷонови шаҳри Бохтар, инчунин дар коллексияҳои хусусии хориҷи наз-дику дур ҷой гирифтааст. Дар баробари рассом буданам, дар синну соли бознишастагӣ якчанд ҳунари миллӣ – дастидӯзиро дар сабки қуроқӣ, попурӣ аз худ карда, дорои сертификати дӯзандаи тарҳҳои аврупоӣ гардидам.

Тирамоҳи гузашта хабар ёфтам, ки соли 2018 тантанаҳои ҷумҳуриявии Наврӯзи байнал-милалӣ бо иштироки шумораи зиёди меҳмонони хориҷӣ дар шаҳри Бохтар баргузор мешавад. Бо рӯҳияи баланд ва эҳсоси масъулиятшиносӣ ба таҳияи маҳсулоти дастӣ, ки вақтҳои охир омӯхта будам, пардохтам. Ҳамин тавр, намудҳои гуногуни армуғон барои меҳмонон ва аҳолии вилояти мо тайёр шуд. Бо харҷи нафақапулӣ ва маблағе, ки аз дарсҳо ба даст меовардам, ҳамаи ин корҳоро анҷом дода, умедвор будам, ки аз ҳисоби ташкили намоишгоҳ-фурӯши маҳсулотам дар рӯзи таҷлили Наврӯз-2018 хароҷотамро мепӯшонам. Аммо дар охирин лаҳза раиси кумитаи маҳаллаи мо хабар дод, ки дар рӯзи Наврӯз танҳо ҳунармандони «интихобшуда» метавонанд маҳсулоташонро ба намоиш гузоранд. Аз ин хабар андак рӯҳафтода шудам.

Соли 2017 иштирокчии намоишгоҳи «Армуғон-2017» будам ва он ҷо бо маҳсули дастранҷи чандин ҳунарманди вилоят шинос гаштам. Ба ҳунари зебоиофарӣ ва санъати дастии онҳо қоил шуда будам. Омодагии ҷиддии нимсола ба намоишгоҳ-фурӯш ва лағви он дар арафаи таҷлили Наврӯз-2018 маро ба андешае овард, ки ба мисли пойтахти ҷумҳуриамон ва дигар шаҳрҳои калон, дар маркази маъмурии вилоятамон низ нуқтаҳои фурӯши армуғонҳо бояд кушода шаванд. Чунин фурӯшгоҳҳо метавонанд бо номи «Армуғони Бохтар», «Сувениры Бактрии» ва барои меҳмонони хориҷии вилоят бо забони англисӣ фаъолият кунанд. Ин иқдом метавонад боиси боз ҳам баландтар гаштани сатҳи маърифати сокинони водии мо шуда, таваҷҷуҳи қишрҳои гуногуни аҳолӣ ва меҳмонони вилоятро ба навъҳои гуногуни ҳунарҳои дастии мардумӣ ва намунаҳои кори ҳунармандони чирадасти минтақаи мо ҷалб намояд.

То имрӯз ба муносибати ҷашне агар ба касе ҳадя карданӣ шаванд, сокинони маҳал бо интихоби атрҳо ва гули коғазӣ маҳдуд мешаванд. Бехабар аз он ки гулҳои коғазиро маъмулан ба сари қабри марҳумон мебаранд.

Ҷойи пӯшида нест, ки сокинон ва меҳмонони ҷумҳурии мо армуғонҳои миллиро асосан аз Душанбе ва назди қалъаи Ҳисор харидорӣ мекунанд. Дар ин мавзеъҳо мақомоти маҳаллӣ нуқтаҳои махсуси фурӯш ташкил кардаанд, ки ба он ҷо армуғонҳои гуногуни дастсозро бо нархи арзон аз вилояти мо бурда, бо қимати гарон ба фурӯш мегузоранд.

Ҳамчун ҳунарманд орзу дорам, ки мо низ ақаллан дар маркази вилоят як ё ду нуқтаи фурӯши армуғонҳо дошта бошем. Дар назди даромадгоҳи бахши либосвории бозори «Фаровон» як нуқтаи хурди фурӯши ороишоти заргарӣ ва армуғон аз сангҳои гуногуни Бадахшон мавҷуд мебошад, вале ин кам аст. Албатта, чунин фурӯшгоҳҳоро дар назди осорхонаҳо низ ташкил кардан мумкин аст, аммо бо ин мақсад на ҳама ба осорхонаҳо ташриф меоранд. Барои ин кор бозорҳо макони мувофиқтаранд, чунки аксари меҳмонони вилоят ҳатман аз бозорҳо дидан мекунанд. Аз ин рӯ, пешниҳод дорам, ки аввалин нуқтаи фурӯши армуғонҳо дар наздикиҳои меҳмонхонаи «Қӯрғонтеппа» таъсис дода шавад, чунки он дар канори бозори марказӣ қарор дорад. Дар оянда чунин фурӯшгоҳро дар саҳни теппаи «Хонум» низ таъсис додан мумкин аст. Ба кори фурӯшгоҳҳои «Армуғони Бохтар» нигоҳ карда, осорхонаҳои вилоят низ ба ҷалби маводи армуғонӣ ва фурӯши он ҳавасманд мешавад, рақобат пайдо мегардад. Ба ин васила, сокинону меҳмонони вилоятамон водор намешаванд, ки барои харидории армуғонҳо ба пойтахт сафар кунанд, балки онро дар ҳамин ҷо ва бо нархи дастрас харидорӣ карда метавонанд.

Шуъбаҳои кор бо занон низ метавонанд дар маҳалҳо ҳунармандонро барои пешниҳоди маҳсулоташон ба мағозаи «Армуғони Бохтар» ҷалб намоянд. Барои сокинону меҳмонони водиҳои Кӯлобу Данғара чунин фурӯшгоҳро дар мавзеи Ҳулбук ташкил кардан мумкин аст. Аз ин иқдоми нек ҳам ҳунармандон ва ҳам меҳмонони вилоятамон баҳравар хоҳанд шуд. Яъне бо ин роҳ сатҳи зиндагиашон беҳтар гашта, меҳмонон бо худ як ҷузъе аз водии офтобиамонро хоҳанд бурд.

Амалӣ кардани ин пешниҳод, бахусус дар Соли рушди сайёҳӣ ва ҳунарҳои мардумӣ, ки аз ҷониби Асосгузори сулҳу ваҳдати миллӣ - Пешвои миллат, Президенти кишвар муҳтарам Эмомалӣ Раҳмон эълон шудааст, қобили дастгирӣ буда, озодшавии ҳунармандони мардумӣ аз пардохти ҳама гуна андоз ба муҳлати ду сол ғамхорӣ нисбат ба тамоми одамони боистеъдоди вилоятамон маҳсуб мегардад ва онҳо маҳсули дастранҷашонро метавонанд бемамониат ба фурӯш гузоранд.

Албатта, оғози ҳар кори нав чандон саҳлу сода нест. Аммо ман бовар дорам, ки аксари ҳунармандон ва устоҳои чирадаст хостори таъсиси чунин нуқтаҳои савдо барои фурӯши армуғонҳо дар маҳал мебошанд. Мардуми меҳнатқарини мо бо таъсиси бозори фурӯши маҳсулоташон кӯшиш мекунанд, ки бо дастони гулкорашон рафҳои холии онро пур созанд. Умедворам, ки мақомоти дахлдори давлатӣ ва дигар масъулон бо дарназардошти аҳамияти ин мавзӯъ пешниҳоди мо - ҳунармандонро мавриди баррасӣ қарор медиҳанд.

Марям САФАРОВА,
сокини шаҳри Бохтар,
рассом ва дӯзанда


Шарҳи хонандагон +

Матолиби дигар:

ИФТИТОҲИ МАРКАЗИ ХИЗМАТРАСОНИИ «МАЛИКА»

ИФТИТОҲИ МАРКАЗИ ХИЗМАТРАСОНИИ «МАЛИКА»

ҲУНАРҲОИ МАРДУМӢ
8736 сар чорвои хушзот вориди бозор гашт

8736 сар чорвои хушзот вориди бозор гашт

Хабарҳо, НИЗОМИДДИН ИСОЕВ
«Тоҷикматлубот» фурӯши ангиштро дар 69 нуқта роҳандозӣ кардааст

«Тоҷикматлубот» фурӯши ангиштро дар 69 нуқта роҳандозӣ кардааст

Хабарҳо, Иқтисоду тиҷорат
Дар шоҳроҳи Данғара-Душанбе 4 ҳазор арча мешинонанд

Дар шоҳроҳи Данғара-Душанбе 4 ҳазор арча мешинонанд

Хабарҳо, Арсаи кишоварзӣ, НИЗОМИДДИН ИСОЕВ
Намоиш-фурӯши техникаи кишоварзӣ дар ноҳияи Ҷомӣ

Намоиш-фурӯши техникаи кишоварзӣ дар ноҳияи Ҷомӣ

Иқтисоду тиҷорат, Хабарҳо, Арсаи кишоварзӣ, НИЗОМИДДИН ИСОЕВ