Дар як сатр
» » Давлатшоҳ гулмаҳмадзода: “дар рушди иқтисодиву иҷтимоии ватани азизамон саҳми бештар дошта бошем”

Давлатшоҳ гулмаҳмадзода: “дар рушди иқтисодиву иҷтимоии ватани азизамон саҳми бештар дошта бошем”

12-04-2018, 09:26

Ҷаласаи ҷамъбастии соҳаҳои иқтисодӣ ва иҷтимоии вилояти Хатлон дар семоҳаи аввали соли равон баргузор гардид. Ҷамъомадро раиси вилояти Хатлон Давлатшоҳ Гулмаҳмадзода ҳусни ифтитоҳ бахшида, ҳозиринро бо рӯзномаи ҷаласа ошно намуд. Дар ҷамъомад муовини аввал, муовинони раиси вилоят, дастгоҳ, сардорони раёсат ва мудирони шуъбаҳои мақомоти иҷроияи ҳокимияти давлатии вилоят, раисони шаҳру ноҳияҳо, роҳбарони ташкилоту муассисаҳои вилоятӣ ва шаҳру ноҳияҳо, раисони ҷамоатҳо масъулини мақомоти ҳифзи ҳуқуқ, намояндагони  соҳаҳои маориф, тандурустӣ  ширкат доштанд.

Аз рӯйи масъалаи якуми рӯзнома  муовини раиси вилоят Раҷабалӣ Раҷабов маърӯза намуда, ҳозиринро бо дастовардҳои соҳаҳои хоҷагии халқ ошно намуд. Тавре ки равшан гардид, ҳаҷми маҷмӯи маҳсулоти дохилии минтақавии вилояти Хатлон дар семоҳаи аввали соли 2018 ба 2 миллиарду 471 сомонӣ расида, афзоиш бошад, нисбати ҳамин давраи соли гузашта 6,7 фоизро ташкил дод.

Дар семоҳаи аввали соли 2018 иҷрои нақшаи андозҳо бо назардошти андози иҷтимоии ғайрибуҷетӣ 101,2 фоиз таъмин гардида, ба буҷа 297,5 миллион сомонӣ маблағ ворид карда шуд, ки нисбати нақша 3,5 миллион сомонӣ зиёд мебошад. Тавре ки нотиқ зикр намуд, тайи семоҳаи аввали соли равон соҳаҳои буҷетии вилоят ва шаҳру ноҳияҳо 312 миллион сомонӣ маблағгузорӣ карда шуда, 89,1 фоизи маблағҳои буҷетӣ ба соҳаи иҷтимоӣ равона гардидааст.

Фаъолияти бонкҳо низ дар давраи ҳисоботӣ хеле беҳ гардида,  ба соҳаҳои иқтисодӣ 258,4 миллион сомонӣ қарзҳои бонкӣ равона намуданд, ки дар қиёс нисбат ба ҳамин давраи соли 2017 11,7 миллион сомонӣ зиёд мебошад.

Яке аз масъалаҳои муҳиме, ки пайваста Роҳбари давлат, Асосгузори сулҳу ваҳдати миллӣ-Пешвои миллат Эмомалӣ Раҳмон таъкид месозад, бунёди ҷойҳои нави корӣ, ба шуғл фаро гирифта шудани шаҳрвандон мебошад. Дар ин давра 75 ярмаркаи ҷойҳои холии корӣ баргузор гардида, 762 нафар сокинони вилоят бо ҷойи кор таъмин ва дар умум 2651 нафар шаҳрвандон ба шуғл фаро гирифта шудаанд. Чуноне ки муовини раиси вилоят Раҷабалӣ Раҷабов зимни баромад таъкид дошт, музди миёнаи меҳнат ба 841,7 сомонӣ баробар буда, нисбати ҳамин давраи соли 2017 1,4 фоиз афзоиш ёфт. Ин нишондиҳанда дар соҳаҳои саноати истихроҷ 1851,3 сомонӣ, саноати коркард 1314,4 сомонӣ, энергетика 1771,5 сомонӣ, сохтмон 1164,5 ва коммуналӣ 987,2 сомониро ташкил медиҳад. Аз ҳисобот равшан гардид, ки тайи се моҳи соли равон гардиши савдо ба 1044,3 миллион сомонӣ, ҳаҷми хизматрасонии пулакӣ, ба аҳолӣ ба 477,3 миллион сомонӣ расидааст, ки нисбат ба ҳамин давраи соли 2017-ум 58,5 ва 40,8 миллион сомонӣ зиёд аст. Гардиши савдои хориҷӣ бошад дар семоҳаи аввал ба 68,4 миллион доллари амрикоӣ расида, аз ҷумла содирот 37,2 миллион доллари амрикоӣ ва воридоти молу маҳсулот 31,2 миллион доллари амрикоиро ташкил дод, ки мутаносибан нисбати ҳамин давраи соли гузашта содирот 10,8 ва воридот 10,6 миллион доллари амрикоӣ зиёд мебошад.

Чуноне ки нотиқ таъкид дошт, дар вилоят 31 лоиҳаи давлатии сармоягузорӣ амалӣ шуда истодааст ва маблағи азхудшуда 3082,9 миллион доллари амрикоиро ташкил медиҳад. Аз ҷониби соҳибкорони вилоят 21 лоиҳаи қарзӣ ба маблағи 11,9 миллион сомонӣ таҳия гардида, барои дарёфти сарчашмаи сармоягузорӣ ба муассисаи давлатии  «Фонди дастгирии соҳибкории назди Ҳукумати Ҷумҳурии Тоҷикистон» пешниҳод карда шудааст.

Хатлон вилояти аграрӣ буда, беш аз 60 фисади маҳсулоти тавлидшавандаро  кишоварзони вилоят истеҳсол менамоянд. Чуноне ки муовини раиси вилоят зимни суханронӣ ироа дошт, ҳаҷми истеҳсоли маҳсулоти  кишоварзӣ дар семоҳаи аввал 482,7 миллион сомониро ташкил дод, ки дар қиёс нисбати ҳамин давраи соли 2017-ум  27,4 миллион сомонӣ зиёд мебошад. Дар ҳамаи бахшҳои хоҷагидорӣ 659 тонна сабзавот, 13,8 ҳазор тонна гӯшт, 65,2 ҳазор тонна шир, 22,4 миллион дона тухм, 243,3 тонна моҳӣ истеҳсол гардида, афзоиш нисбати ҳамин давраи соли гузашта мутаносибан аз 1 то 29 фоизро дар бар гирифт. Дар бахшҳои ҷамъиятӣ ва хоҷагиҳои деҳқонӣ нисбати ҳамин давраи соли гузашта ҳамагӣ кишт 19,4 ҳазор гектар, аз ҷумла кишти баҳорӣ 5,7 ҳазор гектар, кишти баҳории ғалладонагиҳо 1416 гектар, картошка 1844 гектар ва сабзавот ҳамагӣ 2258 гектар зиёд гардид.

Ҳамин тавр, нотиқ нисбати  дастовардҳои чорводорон низ ибрози назар намуда, таъкид дошт, ки ширҷӯшӣ аз як сар моли ширдеҳ 14 литр, саршумори чорвои калон 670 сар, моли майда 7731 сар зиёд гардидааст. 

Саноат яке аз соҳаҳои муҳим барои баланд гардидани сатҳи иқтисодӣ ба шумор рафта, омили асосии тараққиёти иқтисодӣ аст. Ҳаҷми истеҳсоли маҳсулоти саноатӣ дар ин давра ба 1 млрд. 595,2 миллион сомонӣ расидааст, ки нисбати ҳамин давраи соли 2017-ум 306,6 миллион сомонӣ зиёд мебошад. Чуноне ки дар ҷаласа таъкид рафт, соҳаи саноат сол ба сол рушд ёфта, нисбати ҳамин давраи соли сипаригардида афзоиши истеҳсоли семент 69,7 фоиз, мебел 56 фоиз, маҳсулот аз пластикаи фулузӣ 40 фоиз, калобаи ришта 36,1 фоиз, равғани растанӣ 41 фоиз, маҳсулоти қаннодӣ 27, орд 83 фоиз, нон ва маҳсулоти нонӣ 6 фисадро ташкил дода,  истеҳсоли хишти сементӣ 9 баробар, гаҷи сохтмонӣ 24, истеҳсоли афшура 11 баробар, маҳсулоти  доруворӣ 8 ва нахи пахта 4 баробар афзоиш ёфт. Чуноне ки нотиқ таъкид дошт, тибқи дастуру супоришҳои Асосгузори сулҳу ваҳдати миллӣ-Пешвои миллат муҳтарам Эмомалӣ Раҳмон  дар семоҳаи аввали соли равон 12 адад корхона ва коргоҳи нави саноатӣ бо таъсиси 135 ҷойи корӣ ташкил карда шудааст. Дар ҷамъомад доир ба фаъолияти муассисаҳои сохтмонӣ ибрози назар намуда, таъкид гардид, ки аз ҳамаи манбаъҳо азхудкунии маблағгузориҳои асосӣ бе сармояи хориҷӣ ба маблағи 274,6 миллион сомонӣ, корҳои сохтмону васлкунӣ ба маблағи 257,9 миллион сомонӣ, корҳои пудратӣ ба маблағи 140,4 миллион сомонӣ иҷро гардида, афзоиш нисбати ҳамин давраи соли гузашта мутаносибан 96,9-97,6 ва 64,7 фоизро ташкил дода, ба маблағи 76,7 миллион сомонӣ фондҳои асосӣ ба истифода дода шуд.

Дар вилоят 44 адад бинову иншооти истеҳсоливу ғайриистеҳсолӣ ба маблағи 39,3 миллион сомонӣ, аз ҷумла 6 муассисаи таълимӣ бо 850 ҷойи нишаст, 5 корхона ва коргоҳи саноатӣ,  1 неругоҳи барқи обӣ, 23 маркази савдо ва дӯконҳои тиҷоратӣ, 1 бунгоҳи тиббӣ, 4 майдончаи варзишӣ ва дигар иншоот, 531 адад хонаҳои иқоматӣ дар масоҳати 55,7 ҳазор метри мураббаъ сохта шуда, мавриди истифода қарор дода шуд. Аз ҷамъомад баромад, ки дар давраи ҳисоботӣ ҳаҷми боркашонӣ 5,3 миллион тонна иҷро гардид.

Аз ҳисоби ҳамаи манбаъҳои маблағгузорӣ ба маблағи 1,2 миллион сомонӣ дар 3,3 километр таъмири роҳ, 818 километр роҳҳо таъмири ҷорӣ, аз ҳисоби соҳибкорон ду адад пул бо дарозии 38 метр гузаронида шуда, 8,7 километр роҳҳо сангфарш карда шуд. Маблағи умумии корҳои иҷрогардида 3,231 ҳазор сомониро ташкил дод. Муовини раиси вилоят дар баробари рушди соҳаҳои иқтисодӣ нисбати фаъолияти соҳаҳои илм ва маориф, тандурустӣ ва фарҳанг низ ибрози назар намуд. Тайи се моҳи соли равон  варзишгарони вилоят дар 16 мусобиқаи ҷумҳуриявӣ ва байналмилалӣ ширкат варзида, 55 медали тилло, 72 медали нуқра ва 84 медали биринҷӣ ба даст оварда, соҳиби 211 медал шуданд, ки нисбати ҳамин давраи соли 2017-ум 8 медал зиёд мебошад.

Дар семоҳаи аввали соли равон дар ҳудуди вилоят 1303 адад маъракаҳои суннатӣ ва 118 ҷуфт тӯйҳои домодиву арӯсии хайриявии дастаҷамъона гузаронида шудааст. Пас аз шунидани маърӯзаи муовини раиси вилоят Раҷабалӣ Раҷабов раиси вилоят Давлатшоҳ Гулмаҳмадзода  аз раисони шаҳру ноҳияҳои А. Ҷомӣ, Восеъ, Ёвон, Муъминобод, Ҷайҳун ва Панҷ оид ба бурду бохт ва камбудиҳои ҷойдошта пурсиш ба амал оварда, баҳри ислоҳи саривақтии онҳо  дастуру супоришҳои мушаххас дод. Ҳамчунин роҳбари вилоят аз масъулини соҳаҳои иқтисод ва иҷтимоиёт, раисони ҷамоатҳои деҳот пурсиш ба амал оварда, баҳри пешбурди фаъолият маслиҳатҳои муфид дод. Аз ҷумла таъкид дошт, ки кушода гардидани роҳи оҳан ба ҷумҳурии ҳамсоя имкон фароҳам меоварад, ки кишоварзон маҳсулоти бо арақи ҷабин рӯёндаи хешро ба хориҷи кишвар ба фурӯш бароварда, сатҳи зиндагии хешро баланд бардоранд. Яъне деҳқонон метавонанд ҳарчи бештар маҳсули меҳнати хешро тариқи роҳи оҳан бемамониат ба хориҷи кишвар содирот намоянд.

Ҳамчунин,  роҳбари вилоят ба масъулин оид ба додани ҳисоботи аниқи оморӣ супориш доданд. Давлатшоҳ Гулмаҳмадзода зимни суханронӣ дар ҷамъомади ҷамъбастии соҳаҳои иқтисодиву иҷтимоии вилояти Хатлон дар семоҳаи аввали соли равон таъкид дошт, ки дастуру супоришҳои Президенти Ҷумҳурии Тоҷикистон муҳтарам Эмомалӣ Раҳмон дар Паёми навбатиашон ба Маҷлиси Олӣ бояд дастурамали кории ҳар як нафар масъулин  дар шаҳру навоҳӣ ва маҳалҳо гардад. «Баҳри ободониву гулгулшукуфоии диёрамон беҳтару бештар кӯшиш ба харҷ диҳем. Рӯйдоди  таърихӣ аввали соли равон дар рӯзи таҷлили Наврӯзи байналмилалӣ дар маҷмааи Созмони Милали Муттаҳид оғоз бахшидан ба Даҳсолаи байналмилалии амал "Об барои рушди устувор” ба шумор меравад. Иқдомҳои башардӯстонаи Асосгузори сулҳу ваҳдати миллӣ-Пешвои миллат, Президенти мамлакат Эмомалӣ Раҳмон ҳар яки моро водор месозад, ки дар рушди иқтисодиву иҷтимоии ватани азизамон саҳми бештаре дошта бошем», - таъкид дошт роҳбари вилоят.

ВАХШОНА,

"Хатлон”



Шарҳи хонандагон +

Матолиби дигар:

Давлатшоҳ Гулмаҳмадзода: «Андоз сари вақт супурда шавад!»

Давлатшоҳ Гулмаҳмадзода: «Андоз сари вақт супурда шавад!»

Хабарҳо, Ҳокимияти давлатӣ, ФАРОМӮЗ БОБОЕВ
Д. Гулмаҳмадзода: “Саҳми ВАО дар рушди ҷомеа бузург аст”

Д. Гулмаҳмадзода: “Саҳми ВАО дар рушди ҷомеа бузург аст”

Хабарҳо, Ҳокимияти давлатӣ, Иқтисоду тиҷорат, АСАЛМО САФАРОВА
Вазъи иҷтимоию иқтисодии вилояти Хатлон дар семоҳаи якуми соли 2017

Вазъи иҷтимоию иқтисодии вилояти Хатлон дар семоҳаи якуми соли 2017

Хабарҳо, Ҳокимияти давлатӣ, Иқтисоду тиҷорат, АСАЛМО САФАРОВА
Истеҳсоли маҳсулоти кишоварзӣ афзоиш ёфт

Истеҳсоли маҳсулоти кишоварзӣ афзоиш ёфт

Иқтисоду тиҷорат, Хабарҳо, Арсаи кишоварзӣ, АСАЛМО САФАРОВА
Дастовардҳои Хатлон дар соли 2014

Дастовардҳои Хатлон дар соли 2014

Иқтисоду тиҷорат