Дар як сатр
» » «Ҳосилот» ва «равшан» ба дастгирӣ ниёз доранд!

«Ҳосилот» ва «равшан» ба дастгирӣ ниёз доранд!

2-04-2018, 09:58

Мактаби футболи вилояти Хатлон яке аз пурқувваттарин мактаби футбол дар кишвар маҳсуб меёфт. Зеро мактаби хуби тарбияи футболбозони моҳир буд, ки даҳҳо парвардаи ин мактаб дар тимҳои қавии дохилу хориҷи мамлакат карйераашонро идома дода, то ба сатҳи бозигари тими мунтахаби Тоҷикистон расидаанд. Дастпарварони ин мактаби варзишӣ дар замони собиқ Иттиҳоди Шӯравӣ ва замони истиқлолии мамлакат шуҳрати бесобиқа доштанду имрӯз ҳам доранд. Мутаассифона тайи солҳои охир мушкилиҳои молиявӣ, надоштани сарпарарасти асосӣ, коргузории нодурусти дастаҳои футбол ва менеҷменти замонавӣ ва даҳҳо мушкилиҳои дигаре аст, ки ин мактаби бузурги футболи ҷануби кишварро фаро гирифтааст. Коршиносон бар он назаранд, ки гунаҳкори асосӣ пул-молиёт мебошад, ки дастаҳои футбол бояд роҳи ба даст овардани маблағро пайдо кунанд.

Ҳатто, ин буҳрони иқтисодӣ дастаҳои «Ҳосилот»-и ноҳияи Фархор ва «Равшан»-и шаҳри Кӯлоб, ки яке дастаҳои соҳибном ва «бренд»-и ҳақиқии футболи Хатлонзаминанд, пахш намудааст. Ин мушкилӣ метавонад хатари ҷиддӣ дошта бошад, барои рушди футбол дар минтақаи ҷануби кишвар. Пас, чаро масъулин дар ин бора боре ҳам фикр намекунанд?

ХАЙР «ҲОСИЛОТ»?...

Дастаи овозадори «Ҳосилот»-и ноҳияи Фархор тайи солҳои охир ба мушкилоти молиявӣ рӯбарӯ шуда, маъмурияти даста ҳеҷ наметавонад онро аз ин варта раҳонад. Ягона мушкилии асосие, ки дастаро думболагир аст, надоштани сарпарасти асосӣ мебошад.

- Дастаи «Ҳосилот» дар ҳолати ногувори молиявӣ қарор дорад, - зикр кард дар суҳбат бо мо сардори даста Маҳмад Ҳакимов.-«Дастаи номдоре, ки дар чемпионати Осиё ва Лигаи олии кишвар ҳунарнамоӣ мекард, имрӯз бозӣ намудан дар лигаи якум барояш мушкил аст. Барои иштирок намудани даста дар лигаи якум 500-600 ҳазор сомонӣ лозим аст. Агар ин маблағро пайдо карда натавонем, тимро дар лигаи якум боқӣ монданаш зери суол аст.

Роҳбарони даста бар он назаранд, ки дар сурати ёфтани сарпараст ва кумаки мақомоти иҷроияи ҳокимияти давлатии ноҳияи Фархор метавонанд тимро дубора эҳё намоянд, агар на, даста пош мехӯрад. Хайр «Ҳосилот»!

Хуршед Глонов, сармураббии дастаи «Ҳосилот», бо изҳори таассуф мегӯяд, ки айни ҳол тими «Ҳосилот» майдони варзишӣ надорад. «Дар майдоне, ки мо тамрин мекунем, ба талаботи варзишгоҳи касбӣ ҷавобгӯ нест. Ҳолатҳое ҳам мешавад, ки ҳангоми машқу тамрин ва ё мусобиқа вақти тӯбро сахт задан он ба ҳавлии мардуми дар атрофи варзишгоҳбуда  меравад ё дар сим зада мекафад. Дар ҳоле ки барои мо  имрӯз харидории як тӯб мушкил аст», -афзуд Х. Глонов.

-Вақте ки дар варзишгоҳ даромада тамрин мекардем, пос-бони варзишгоҳ омада моро пеш кард, - мегӯяд сармураббии даста. – Дарвозаи он доимо маҳкам аст ва мо имкони ворид шудан надорем. Беиҷозат ба варзишгоҳ ворид шуда наметавонем.

Дар ин бора директори марказии варзишгоҳи ноҳияи Фархор дар суҳбат бо мо гуфт, ки барои тамрин намудан ва гузаронидани бозиҳо барои даста иҷозат аст, вале то  моҳи март дар варзишгоҳ таъмир рафта истодааст. Аз ҳамин хотир, тамрин намудан дар варзишгоҳ манъ аст.

Новобаста аз мушкилии ҷой-дошта тими футболи «Ҳосилот» бо дастгирии мақомоти иҷроияи ҳокимияти давлатии ноҳияи Фархор дар мусобиқоти Ҷоми ФФТ-2018 иштирок намуда, дар даври нимниҳоӣ мағлуб гашт.

Дар ин бора  Р. Бобохонзода, муовини раиси ноҳия, ба рӯзномаи «Хатлон» гуфт, ки аз тарафи ноҳия ба дастаи «Ҳосилот» 2500 сомонӣ барои иштирок дар мусобиқоти Ҷоми ФФТ кумак расонида шуд. Айни замон, аз ҳисоби маблағҳои буҷетӣ барои нигоҳдории дас-та дар буҷети соли 2018 маблағ пешбинӣ нагардидааст.

Ба қавли манбаъ, танҳо аъзоҳаққӣ аз ноҳия дастгирӣ карда шуд, боқимонда маблағро сарпараст ёфтем, яъне хона ба хона маблағ ҷамъ намудем. Ҳатто аз надоштани маблағ ҳайати тим омода буд, ки дар бозӣ бо дастаи «Равшан» мағлуб шавад, то ба ноҳияи Данғара нараванд. Зеро барои сафар намудани даста ба ноҳияи Данғара  500 сомонӣ зарур буду пайдо намудани маблағ мушкил.

Айни ҳол  аз надоштани шароити хуби молиявӣ даста дар ҳолати парокандагӣ қарор дорад, ки ҳайати он аз сардори даста, сармураббӣ, духтур ва 12 бозингар иборат аст. Шояд ҳоло «хайр, «Ҳосилот»! гуфтани мо бармаҳал бошад!

КФ «РАВШАН» ТУҲФАИ ПРЕЗИДЕНТРО ФУРӮХТ

Дастаи «Равшан» яке аз дастаҳои сермухлис, соҳибном ва пурқуввати Лигаи олии Тоҷикистон маҳсуб меёфт, ки ҳарифон бо ҷиддияти том ба бозӣ бо он омодагӣ мегирифтанд. Ҳатто он рақиби тими овозадори кишвар, яъне «Истиқлол»-и Душанбе ҳам буд. Клуби футболи «Равшан» тайи солҳои охир 2 карат чемпиони Тоҷикистон, барандаи суперҷом ва Ҷоми Тоҷикистон гардидааст.  Аммо, шурӯъ аз соли 2016 дастаро буҳрони шадиди молиявӣ фаро гирифтааст, ки тим натавонист бозиҳоро дар Лигаи олии кишвар давом диҳад. Ҳатто дар лаҳзаҳои охирин даста автобуси туҳфа намудаи Сарвари давлатро ҳам фурӯхт.

«Ҳосилот» ва «равшан» ба дастгирӣ ниёз доранд!-Мақсади асосии туҳфаи Президенти мамлакат – автобус ба халқ хизмат кардан аст, - иброз дошт зимни суҳбат Баҳром Рустамов, раиси ташкилоти ҷамъиятии дастаи «Равшан». - Сараввал, тӯли се соли охир автобус дар ҳолати корношоям буд ва даста имконият надошт, ки онро таъмир намояд. Дуюм, хароҷоти сӯзишвориаш хело зиёд буд, ки мо наметавонис-тем аз он истифода барем. Севум, ба хотири пароканда нашудану боқӣ мондани даста дар лигаи якум буд.

Б. Рустамов, дар рафти суҳбат, инчунин гуфт, ки автобусро бо маблағи 87 ҳазору 500 сомонӣ, баробар  ба 10 ҳазор доллари амрикоӣ, ба дастаи «Барқчӣ»-и Ҳисор барои иштироки даста дар Лигаи якум ва хизмати сафарӣ ба бозиҳо, сарулибос, тӯб фурӯхтаанд. Ҳамакнун, маслиҳат шудааст, ки дар ҳолати хуб шудани вазъияти даста метавонанд дубора автобусро баргардонанд.

Ба қавли манбаъ, буҳрони молиявие, ки дастаро думболагир буд, каме ҳам бошад даста аз ин варта берун баромадааст. Яъне, чор соҳибкори маҳаллӣ омодаанд, ки дастаро дар мавсими нави футбол сарпарастӣ намоянд. Ҳамчунин, аз тарафи мақомоти иҷроияи ҳокимияти давлатии шаҳри Кӯлоб оид бо маош таъмин намудани бозингарон ваъда шудаааст.

9 нафар бозингарони беҳтарине, ки тарбиятёфтаи мактаби варзишии «Равшан» буданд, имрӯз аз вазъи молиявии хуб надоштани тим дар дастаҳои «Регар-Тадаз»-и Турсунзода 4 нафар, «Хатлон»-и Қӯрғонтеппа 4 нафар  ва «Истиқлол»-и Душанбе  1 нафар ҳунарнамоӣ менамоянд.

- Имсол дастаро бо як мақсад ташкил намудем, ки ҳайати тимро бо бозингарони касбӣ қавитар намоем, - гуфт Баҳром Рустамов. - Айни ҳол, дар даста 20 нафар тамрин намуда, машқҳои яквақтаина рафта истодааст. Барои мо як дарвозабону муҳофизатгар лозим аст, ки дар наздиктарин фурсат ба дас-та ҷалб менамоем. Ҳадафи ниҳоии дастаи мо ба Лигаи олии кишвар баромадан аст, зеро инро дер боз мухлисони тим интизоранд.

 

БА ҶОЙИ ОХИРСУХАН

Ин мушкилӣ ва душвориҳои сангин ҳоли баъзе дастаҳои футболи ҷануби кишварро чунон танг намудааст, ки ба ҷуз ном дигар чизе боқӣ надоранд. Ҳатто, патриотизм ва энержии бозингарони маҳаллӣ то кай довом мекунад, суоли матраҳ мебошад. Суоли дигар ин  аст, ки чаро масъулини ноҳия ва шаҳр барои бартараф намудани ин мушкилӣ иқдом ё барномаеро тарҳрезӣ наменамоянд? Ин суолҳоеанд, ки аз масъулин посух мехоҳанд!

Фаромӯз Бобоев,

«Хатлон»



Шарҳи хонандагон +

Матолиби дигар:

Нуралӣ хоркашев: “мушкилиҳои футболи хатлон монеаи асосии пешрафти футболи  ...

Нуралӣ хоркашев: “мушкилиҳои футболи хатлон монеаи асосии пешрафти футболи ...

Ҷавонон ва варзиш, Мусоҳибаи мо, ФАРОМӮЗ БОБОЕВ
Ғалабаи навбатии «Ҳосилот»

Ғалабаи навбатии «Ҳосилот»

Хабарҳо, Ҷавонон ва варзиш, НОСИРҶОН МАЪМУРЗОДА
КФ«Вахш»: Сарбозе, ки намехоҳад генерал шавад…

КФ«Вахш»: Сарбозе, ки намехоҳад генерал шавад…

Хабарҳо, Ҷавонон ва варзиш, ФАРОМӮЗ БОБОЕВ
7 даста аз Хатлон дар лигаи дуюми футбол

7 даста аз Хатлон дар лигаи дуюми футбол

Хабарҳо, Ҷавонон ва варзиш
«Вахш» сарпараст меҷӯяд

«Вахш» сарпараст меҷӯяд

Хабарҳо, Ҷавонон ва варзиш, НОСИРҶОН МАЪМУРЗОДА