Дар як сатр
» » Ҷавонон бо амри дил ба артиш мепайванданд

Ҷавонон бо амри дил ба артиш мепайванданд

4-04-2018, 08:37

 Даъвати баҳорӣ-2018

   Имрӯзҳо садҳо ҷавон-мардони баору номуси диёрамон тибқи Фармони Президенти Ҷумҳурии Тоҷикистон Эмомалӣ Раҳмон ва баҳри таъмини иҷрои қарори раиси вилояти Хатлон Давлатшоҳ Гулмаҳмадзода бо амри дил ба хизмати Ватан-Модар ба сафи Қувваҳои Мусаллаҳи Ҷумҳурии Тоҷикистон сафарбар шуданд.

       3 апрели соли равон чорабинии вилоятӣ бахшида ба рӯзи аввали гусели наваскарон ба сафи Қувваҳои  Мусаллаҳи Ҷумҳурии Тоҷикистон дар саҳни Теат-ри вилоятии мусиқӣ-мазҳакавии ба номи Ато Муҳаммадҷонови шаҳри Бохтар бо иштироки беш аз 7 ҳазор нафар ҷавонон, афсарону сарбозон ва фаъ-олон баргузор гардид. Ҷавонон бошанд, бо шиору навиштаҷоти ватандӯстона, парчамҳои рангоранг ва рӯҳияи ватандӯстона ҷамъ омада буданд.

Муҳиддин Шарифзода, муовини комиссари ҳарбии вилояти Хатлон, Фармони Президенти Ҷумҳурии Тоҷикистонро қироат намуд. Инчунин, дар доираи маъракаи даъвати баҳории ҷавонон ба сафи Қувваҳои Мусаллаҳи Ҷумҳурии Тоҷикистон нахустин гурӯҳи ҷавонони вилояти Хатлон, ки синнашон аз  18 то 27  расидааст, бо тантана ба артиш сафарбар карда мешаванд.

Дар чорабинии мазкур Давлатшоҳ Гулмаҳмадзода, раиси вилояти Хатлон ширкат варзида, изҳор дошт, ки ҷавонони ватандӯсту бонангу номуси мо бо дарки масъулият ва ҳисси ифтихори милливу хештаншиносӣ ҳамеша барои иҷрои рисолати фарзандии хеш омода ҳастанд.

- Имрӯз Қувваҳои Мусаллаҳи Тоҷикистон ҳам аз лиҳози таъминоти моддию техникӣ, ҳам аз лиҳози қудрату маҳорати ҳарбӣ ва низоми ҳайати шахсӣ аз солҳои пешин афзалият дорад ва мо ифтихор аз он дорем, ки ҷавонони вилояти Хатлон низ дар таъмини сулҳу оромӣ ва амнияти кишвар саҳми назаррас доранд, - зикр кард Д. Гулмаҳмадзода. - Хизмат кардан ба ватан шарафи бузург ва дар айни замон вазифаи муқаддаси ҳар як ҷавон мебошад. Ҳар як хизматчии ҳарбӣ бояд хуб дарк намояд, ки ватандӯстӣ ин арзи садоқат ба Ватан-модар ва халқу давлати соҳибистиқлоли худ буда, дар пос доштани арзишҳои миллӣ ва аз тамоми манфиатҳо боло гузоштани манфиати давлату халқ зоҳир мегардад.

- Имрӯз дар сафи Қувваҳои Мусаллаҳи Ҷумҳурии Тоҷикистон  тамоми шароит барои сарбозон фароҳам оварда шудааст. Ҷавонон бояд аз хизмати ҳарбӣ саркашӣ накарда, марзу буми ватани азизамон-Тоҷикистонро якдилонаву содиқона ҳимоя намоянд,- зикр намуд Исломбек Султонов, сарбози  қисми низомии 07256-и Вазорати мудофиаи Ҷумҳурии Тоҷикистон.

Сипас, Ҳанифа Саидмуродова, модари яке аз наваскарон аз шаҳри Левакант аз номи модарони даъватшудагон ба сухан баромада, гуфт, ки онҳо аз даъвати фарзандонашон ба сафи ҷавонмардони миллат мефахранд ва дигаронро низ ба он тарғиб намуда, хушнуд аз он аст, ки писараш ихтиёран дар сафи Қувваҳои Мусаллаҳи мамлакат хизмати аскариро ба ҷо меорад ва марзу буми ватанро ҳифз менамояд.

-Вақти он расидааст, ки фарзанди ман низ қарзи фарзандии худро дар назди ватан адо кунад ва суботи Тоҷикистони азизро дар қатори дигар ҷавонмардони шуҷои ватан таъмин намояд.- иброз намуд модари наваскар Ҳанифа Саидмуродова. 

- Имрӯз боиси ифтхор аст, ки ман ба сафи Қувваҳои Мусаллаҳи Ҷумҳурии Тоҷикистон шомил гашта, қарзи ҷавонмардиамро дар назди Ватан - модар адо хоҳам кард, - зикр кард наваскар Кароматуло Маҳмадаминов, аз ноҳияи Ёвон. - Ман ваъда медиҳам, ки хизматро бо сари баланд ва интизоми намунавӣ ба анҷом расонида, пас аз адои хизмат дар ҳама ҳолатҳо омодаам, ки барои ин ватану миллат ҷони худро дареғ надошта хизмат намоям.

Аз ҷониби раиси вилоят Давлатшоҳ Гулмаҳмадзода ва комиссари ҳарбии вилоят Куганзода Ҳаким Самад ба наваскарон туҳфаҳои хотиравӣ тақдим карда шуд.

Чун анъана маросими "нонгазон” аз ҷониби модарон хеле ҳаяҷонангез сурат гирифт. Онҳо ба наваскарон кулчаҳои ширмоли бомеҳру муҳаббати беандоза пухтаи хешро пешниҳод намуда, чун анъанаи куҳани аҷдодӣ дуои нек доданд. Зеро пос доштани кулчаи дастпази модар  ҳар як ҷавонро водор месозад, ки содиқона хизмати Ватан-модарро баҷо ораду бо сари баланд ба хона баргардад. Дар ин баробар, гулдухтарони зебои атласу чаканпӯш гулу рӯймолчаҳои нақшин ба наваскарон тақдим намуданд. Аз чеҳраҳои зебову нигоҳи гарму ошиқонаи духтарон эҳсос мешуд, ки ба ин ҷавонмардон боварии комил доранд. То даме ки ин гуна родмардон марзу буми меҳани азизро ҳифз менамоянд, онҳо бо хотири болида ба омӯхтани илму ҳунар машғул ва бозгашти онҳоро бесаброна интизор хоҳанд шуд.

Дар охир барномаи консертии санъаткорони Раёсати фарҳанги вилоят баргузор гардид. Дар анҷоми маърака падарону модарон бо дуои нек фарзандони худро ба хизмати ҳарбӣ гусел намуданд.

 

Комрони БАХТИЁР,

«Хатлон»


Шарҳи хонандагон +

Матолиби дигар:

«Кулчагазон» ва иҷрои нақшаи даъвати ҷавонон ба Артиш дар рӯзи аввали мавси ...

«Кулчагазон» ва иҷрои нақшаи даъвати ҷавонон ба Артиш дар рӯзи аввали мавси ...

Хабарҳо, Ҷавонон ва варзиш, ҲАНГОМА ПАҲЛАВОНОВА
Гусели аввалин гурӯҳи наваскарон дар Хатлон

Гусели аввалин гурӯҳи наваскарон дар Хатлон

Хабарҳо, Ҳуқуқу амният, Ҷавонон ва варзиш, КОМРОНИ БАХТИЁР
Гусели аввалин гурӯҳи наваскарон дар Хатлон (аксҳо ва видео)

Гусели аввалин гурӯҳи наваскарон дар Хатлон (аксҳо ва видео)

Хабарҳо, Ҳокимияти давлатӣ, Ҷавонон ва варзиш, АСАЛМО САФАРОВА, КОМРОНИ БАХТИЁР
Ноҳияи Носири Хусрав яке аз аввалин шуда маъракаи даъвати наваскаронро ба о ...

Ноҳияи Носири Хусрав яке аз аввалин шуда маъракаи даъвати наваскаронро ба о ...

Хабарҳо
Ҷавонони шуҷоъ ба хизмати Ватан мераванд

Ҷавонони шуҷоъ ба хизмати Ватан мераванд

Фарҳанг ва адабиёт, Хабарҳо, АМОН МАҲКАМОВ