Дар як сатр
» » Боздид аз мамнӯъгоҳи «хуталон» дар ноҳияи данғара

Боздид аз мамнӯъгоҳи «хуталон» дар ноҳияи данғара

2-04-2018, 08:17

1 апрели соли 2018 Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон бо сафари корӣ ба ноҳияи Данғара ташриф оварда, дар Ҷамъияти дорои масъулияташ маҳдуди «Хуталон» бо вазъи ин мамнӯъгоҳ шинос шуданд.

Боздид аз мамнӯъгоҳи  «хуталон» дар ноҳияи данғара

Масоҳати заминҳои мамнӯъгоҳи "Хуталон” 6 ҳазор гектарро ташкил дода, бо дас-туру ҳидоятҳои Сарвари давлат дар ин ҷо парандагону чорвои нодир, аз қабили оҳуи холдор, уреал-гӯсфанди кӯҳии бухороӣ, муфлон ва аз парандагон бошад, асосан тазарв парвариш меёбад.

Ҳукумати Ҷумҳурии Тоҷикистон «Дар бораи зиёд намудани саршумори оҳуи холдор, гавазни бухороӣ, хуки ваҳшӣ ва мурғи тазарв» қарори махсус қабул намуда буд ва дар доираи татбиқи ин қарор то имрӯз дар саросари кишвар барои рушди соҳа, парвариши бештари чорво ва парандагони нодир, ки ба китоби сурхи Тоҷикистон ворид карда шудааст, тадбирҳои мушаххас амалӣ мегардад.

Айни ҳол дар мамнӯъгоҳи "Хуталон” беш аз 500 сар оҳуи холдор мавҷуд аст ва Президенти мамлакат муҳтарам Эмомалӣ Раҳмон ба хотири афзоиши саршумори он, инчунин тоза кардани насли ин ҳайвони нодир имрӯз беш аз 70 сар оҳуи холдорро, ки аз Федератсияи Россия ворид карда шуда, ба иқлиму табиати Тоҷикистон мутобиқ мебошанд, дар ҳудуди мамнӯъгоҳ сар доданд.

Баъди эълон шудани "Соли рушди сайёҳӣ ва ҳунарҳои мардумӣ” ва беҳтар кардани вазъи фаъолияти мамнӯъгоҳҳои кишвар таваҷҷуҳи сайёҳони хориҷӣ, аз ҷумла шикорчиён ба имкониятҳои рушди туризми байналмилалии Тоҷикистон бештар мегардад.

Дар асоси дастуру супоришҳои Пешвои миллат муҳтарам Эмомалӣ Раҳмон оянда бо дарназардошти имкониятҳои фаррох, боду ҳавои мусоид ва замини зархез барои парвариши ҳайвонҳои нодир мувофиқ, дар ҳудуди ноҳияи Данғара боз ду мамнӯъгоҳ дар майдони 22 ҳазор гектар таъсис дода мешавад.

Зимни шиносоӣ бо вазъи мамнӯъгоҳи "Хуталон” дар посух ба таваҷҷуҳи Сарвари давлат муҳтарам Эмомалӣ Раҳмон вобаста ба шароити мамнӯъгоҳ, иттилоъ дода шуд, ки барқарорсозии муҳити экологӣ, набототу ҳайвонот ва парандагони он хуб ба роҳ монда шудааст.

Ҳоло дар ин мавзеъ гавазни бухороӣ, оҳуи холдор, муфлон ва дигар ҳайвонот зиндагӣ мекунанд ва шумораи мурғи даштӣ ва дигар парандагону ҳайвонот низ рӯй ба афзоиш овардааст.  

Тавре маълум гардид, дар мамнӯъгоҳи "Хуталон” ба ғайр аз ҳайвоноти нодир парвариши парандаҳои нодир низ ба роҳ монда мешавад.

Соли 2017 мурғи фазан, ё ин ки тазарв низ аз Чехия ба ҷумҳурӣ оварда шуд ва аз рӯи маълумоти мутахассисон баъди парвариш ва афзоиш танҳо дар соли 2018 беш аз 1200 сар парандаи фазан дар мамнӯъгоҳҳои ноҳияи Данғара барои афзоиш сар дода шуданд.

Мурғи тазарв низ аз шумули парандаҳои нодири табиати Тоҷикистон ба шумор меравад.

Дар мамнӯъгоҳи "Хуталон” ҳамчунин 90 гектар боғи мевадиҳандаи дарахтони себ, нок ва чормағз мавҷуд аст, ки бо таъсиси он даҳҳо нафар сокинони ноҳияи Данғара соҳиби ҷойи кори доимӣ ва даромади хуби иқтисодӣ мегарданд.

Баъди шиносоии пурра бо вазъи мамнӯъгоҳи "Хуталон” ва сар додани оҳуҳои холдор дар ин ҷо Сарвари давлат диққати кормандони мамнӯъгоҳ ва роҳбарияти ноҳияро ба масъалаи вусъати парвариши парандаҳо, зиёд намудани саршумори чорвои нодир, инчунин оид ба ҷоннок намудани корҳои ободонӣ, ба тартиб даровардани ҳудуди мамнӯъгоҳ, таъмини хӯрок ба ҳайвонот дар фасли сармо, дигар ҳайвоноту наботот ва тавассути ин муҳайё намудани заминаи рушди туризм супоришҳо доданд.

Мавриди зикри хос аст, ки табиати нотакрору биҳиштосои Тоҷикистон имрӯзҳо таваҷҷуҳи сайёҳони дохилию хориҷиро бештар ба худ ҷалб кардааст.

Хислатҳои ҳамидаи меҳмоннавозию инсондӯстии Пешвои миллат, амну субот дар саросари кишвар, сиёсати дарҳои бози Ҳукумати Ҷумҳурии Тоҷикистон, рушди бахшҳои муҳим, фасли зебои баҳор, рӯду чашмаҳои мусаффо, кӯҳҳои сарбафалак, мавзеъҳои таърихӣ, мамнӯъгоҳҳо, дар сатҳи олӣ ва бошукӯҳу шаҳомат таҷлил кардани ҷашну идҳои умумимиллӣ ва байналмилалии Наврӯз ва дигар омилҳо имкон фароҳам меорад, ки ташрифи сайёҳон ба хусус дар "Соли рушди сайёҳӣ ва ҳунарҳои мардумӣ” ба Ҷумҳурии Тоҷикистон бештар гардад.

www.prezident.tj



Шарҳи хонандагон +

Матолиби дигар:

Фахробод ҷаннати рӯйи замин аст

Фахробод ҷаннати рӯйи замин аст

Хабарҳо, Ҳокимияти давлатӣ, Арсаи кишоварзӣ
Сафари кории Роҳбари давлат ба ноҳияи Шаҳритус

Сафари кории Роҳбари давлат ба ноҳияи Шаҳритус

Хабарҳо, Ҳокимияти давлатӣ
Иштирок дар ярмаркаи фурӯши чорво ва маҳсулоти кишоварзии вилояти Хатлон

Иштирок дар ярмаркаи фурӯши чорво ва маҳсулоти кишоварзии вилояти Хатлон

Хабарҳо, Арсаи кишоварзӣ
Оғози бунёди корхонаи нави саноатӣ ва шиносоӣ бо сохтмону азнавсозии роҳҳои ...

Оғози бунёди корхонаи нави саноатӣ ва шиносоӣ бо сохтмону азнавсозии роҳҳои ...

Хабарҳо, Иқтисоду тиҷорат
«Бешаи палангон»

«Бешаи палангон»

Хабарҳо, Туризм, Номаҳои Шумо