Дар як сатр
» » Нуралӣ хоркашев: “мушкилиҳои футболи хатлон монеаи асосии пешрафти футболи миллианд”

Нуралӣ хоркашев: “мушкилиҳои футболи хатлон монеаи асосии пешрафти футболи миллианд”

28-03-2018, 15:55

Мавсими нави футбол бо баргузории бозиҳо дар лигаи олии Тоҷикистон оғоз гардид. Вилояти Хатлонро дар ин мусобиқаи сатҳи аввали қаҳрамонии футболи мамлакат, ки дар он ҳамагӣ ҳашт дастаи пурқувваттарини шаҳру ноҳияҳои ҷумҳурӣ иштирок мекунанд, ду даста – "Хатлон”-и шаҳри Бохтар ва "Панҷшер”-и ноҳияи Ҷалолиддини Балхӣ намояндагӣ мекунанд. Бо мақсади ошноии бештар пайдо намудан ба мавзӯъ ва таҳлилу баррасии вазъу ҳолати футбол дар шаҳру навоҳии вилоят суҳбати мухбирамон Фаромӯз Бобоевро бо сармутахассиси шуъбаи робита бо ҷомеаи Федератсияи футболи Тоҷикистон Нуралӣ Хоркашев пешкаши шумо мегардонем. 

-Аввалан, фарорасии Наврӯзи оламафрӯз ва оғози мавсими нави футболро дар Тоҷикистон ба шумо муборакбод мегӯем.

-Ташаккур. Фарорасии иди баҳор ба рӯзгори мардуми сарбаланду шарафманди вилояти Хатлон низ фархундаву муборак бошад!

-Мехостем дар бораи вазъияти кунунии дастаҳои вилояти Хатлон ҳарф мезадед. Дар мисоли дастаҳои «Хатлон»-и Бохтар, «Ҳосилот»-и Фархор, «Равшан»-и Кӯлоб ва «Панҷшер»-и Ҷ. Балхӣ.

- Айни замон вилояти Хатлонро дар лигаи олии Тоҷикистон дастаҳои футболи "Хатлон” (Бохтар) ва "Панҷшер” (Ҷалолиддини Балхӣ) намояндагӣ мекунанд. Соли гузашта дастаи "Ҳосилот”-и Фархор бо сабаби надоштани сарпараст ва дастгирӣ наёфтан аз ҷониби мақомоти иҷроияи ҳокимияти давлатии ноҳия ба мушкилоти молиявӣ ва душвориҳои сангин рӯ ба рӯ гашта, билохира аз лигаи олӣ берун монд. Қаблан, дастаи дигари вилоят – "Равшан”-и шаҳри Кӯлоб, ки аз сермухлистарин дастаҳои футболи ҷумҳурӣ ҳи-соб меёфт ва 2 сол пайваста дар футбол унвони чемпиони Тоҷикисонро соҳиб гашта буд, ба ин иллат тамоман муфлис гашт ва аз он дастаи номӣ имрӯз ба ҷуз ном дигар чизе боқӣ намондааст. Мувофиқи баъзе маълумоти дар мусобиқаи имсола байни дастаҳои лигаи якум иштирок намудани дастаи "Ҳосилот”-и Фархор низ зери гумон қарор дорад. Зеро, даста аз ягон ҷиҳат дастгирӣ намешавад ва бидуни сарпараст иштирок намудан дар мусобиқаи ин сатҳ ғайриимкон аст. Хеле хуб шуд, ки дастаҳои футболи "Хатлон”-и Бохтар ва "Панҷшер”-и Ҷалолиддини Балхӣ ба муассисаҳои давлатӣ табдил дода шудаанд ва таҳти сарпарастии мақомоти иҷроияи ҳокимияти давлатии шаҳри Бохтару мақомоти иҷроияи ҳокимияти давлатии ноҳияи Ҷалолиддини Балхӣ қарор доранд. Дар ин амали хайр саҳми раиси шаҳри Бохтар Абдуалим Исмоилзода ва раиси ноҳияи Ҷалолиддини Балхӣ Убайдуллои Файзулло калон мебошад. Рушди футболи имрӯзаи мо аз роҳбарони аввали шаҳру ноҳияҳои ҷумҳурӣ вобастагии зиёд дорад. Ман борҳо гуфтам ва боз ҳам мегӯям, ки агар дар шаҳру навоҳии мамлакат роҳбарони аввал ба ин намуди зебои варзиш таваҷҷуҳ дошта бошанд, албатта футбол рушд меёбад, дар акси ҳол рушди футбол ғайриимкон аст. Ба гунаи мисол дар ин мавзӯъ метавон дастаҳои футболи "Ҳосилот”-и Фархор ва "Равшан”-и Кӯлобро номбар кард.   

 -Мактаби футболи вилояти Хатлон дар замони Иттиҳоди Шӯравӣ ва замони соҳибистиқлолӣ шуҳрат ва ҳаводорони зиёде дошт. Вале тайи чанд соли охир дастаҳои ҷануби кишвар ба як буҳрони молиявӣ рӯ ба рӯ ҳастанд, оё ин барои коҳиш ёфтани шуҳрати мактаби футболи вилояти Хатлон монеа шуда метавонад?

-Вилояти Хатлон ҳанӯз аз давраи ибтидои футболи тоҷик ҳамчун заминаи асосии рушду пешрафти он  дониста мешуд. Дастпарварони мактаби футболи ин минтақа, ки зикри номашон чанд сафҳаи дафтарро пур мекунад, дар давраҳои гуногун дар ҳайати тими миллӣ, дастаҳои мунтахаб ва бошишгоҳҳои футболи ватанӣ, шарафу шуҳрати футболи миллиро дар мусобиқаҳои расмии байналмилалӣ ҳимоя намудаанд. Ин анъана ҳанӯз ҳам идома дорад. Мураббии шоистаи Тоҷикистон Владимир Ғуломҳайдаров, ки худ дастпарвари мактаби футболи Хатлон буда, дар рушду инкишоф ва тарбияи мутахассисони соҳа саҳми бориз доранд, дар суҳбате гуфта буд: "Дар Қӯрғонтеппа футболбозон ҳамчун "бодиринг” месабзанд”.  Махсусан, мактаби футболи шаҳри Қӯрғонтеппа (ҳозира Бохтар) аз пурқувваттарин мактаби футболи тоҷик ба шумор мерафт. Ин мактаб чеҳраҳоеро тарбияту парвариш кардааст, ки баъдтар онҳо на танҳо дар ҷумҳурӣ, дар саросари ҷумҳуриҳои давлати абарқудрати Шӯравии собиқ яке аз ситораҳои футбол эътироф шуданд. Мутаассифона, тайи чанд соли охир, вобаста ба вазъи молиявӣ шуҳрати мактаби футболи Хатлон коста шуд. Бисёр истеъдодҳои болаёқате, ки метавонанд футболи миллиро дар арсаи баландтар муаррифӣ кунанд, роҳи интихобкардаашонро тағйир мекунанд ва ба хотири таъмини рӯзгори худ  дигар касбро пеша мекунанд. Хушбахтона, қабул шудани "Барномаи рушди футбол дар Тоҷикистон барои солҳои 2012-2016” ва "Барномаи рушди футбол дар Тоҷикистон барои солҳои 2017-2021” ба пешрафти футболи ватанӣ вусъати тоза бахшид ва боварӣ ҳаст, ки иҷроиши бевоситаи ин қарор  шарафу шаҳомати пештараро ба мактаби футболи Хатлон бармегардонад.

-Маҳв ва муфлисшавии буҷаи дастаҳо чӣ хатар дошта метавонанд барои рушди футбол дар кишвар?

-Албатта, хароб шудани буҷаи дастаҳо ва муфлисшавии онҳо ба рушду инкишофи футбол дар кишвар монеаи ҷиддӣ эҷод мекунанд. Бахусус дар вилояти футболие ҳамчун вилояти Хатлон. Зеро, ҳар қадаре ки сатҳи баргузории мусобиқаҳои дохилӣ шавқовар ва рақобатҳо дар ин мусобиқаҳо ҷолиб бошанд, тими миллӣ ва дастаҳои мунтахаб ҳамон андоза тавоно мешаванд ва дар арсаи байналмилалӣ муваффақиятҳои навро соҳиб мегарданд.

-Ҳамчун коршиноси масоили футбол мегуфтед, ки кадом омил ва воситаҳое ҳастанд, ки метавон дастаҳои вилоятро аз ин вартаи ногувор раҳо кард?

-Рушд додани футбол дар маҳалҳо яке аз вазифаҳои асосии дастандаркорони соҳа маҳсуб меёбад. Дастаҳои футболӣ низ бояд фаъолияти худро дар заминаи менеҷменти футболи замонавӣ ба роҳ монда, ҷиҳати расидан ба ҳадафҳои ниҳоияшон талошҳо кунанд. Ҷалби сарпарастон ба футбол бояд дар асоси ҳамкории судманди дуҷониба ва мутобиқи талаботи менеҷменти замонавии футбол ба роҳ монда шавад. Ҳамасола ҷиҳати беҳтар гардонидани дараҷаи тахассусии кормандони соҳаи футбол аз ҷониби Федератсияи футболи Тоҷикистон даҳҳо курсу семинарҳои дохиливу байналмилалӣ ташкил мешаванд. Мутахассисоне, ки аз дастаҳои вилояти Хатлон дар ин курсу семинарҳо иштирок мекунанд, вазифадоранд донишҳои андӯхтаашонро дар амал татбиқ созанд. Мушкилиҳои дар футболи Хатлон ҷойдошта монеаи асосии рушду пешрафти футболи миллӣ ҳастанд.   

- Дастаи «Хатлон»-и Бохтар соҳиби сармояи ҳамешагӣ барои фаъолият шуд, яъне аз ҳисоби буҷаи шаҳр 1 млн сомонӣ барои даста ҷудо гардид. Оё ин маблағ дар шароити кунунӣ басанда аст?

- Албатта! Ин ҳам дар ҳоле ки мувофиқи барномаи махсус Федератсияи футболи Тоҷикистон ҳамаи дастаҳои иштирокчии лигаи олии Тоҷикистонро ҳамаҷониба дастгирӣ кунад. Соли гузашта ин дастаҳо аз ҷониби лигаи футболи Тоҷикистон бо нақлиёти шахсӣ, сарулибос ва ашёҳои варзишӣ таъмин шуданд. Имсол бошад, ҳамаи ин дастаҳо бо техникаи компютерӣ, маблағ барои гузаронидани ҷамъомадҳои омӯзишиву машқӣ таъмин мешаванд. Маблағи ҳаққи хидмати доварону нозир ва комиссари бозиҳои хонагии дастаҳоро ҳам лигаи мазкур пардохт мекунад. Ба ибораи дигар, бештар аз 50 фисади харҷҳои иштирок дар лигаи олиро худи лига пардохт менамояд. Дастаҳо низ бо ин маблағ иктифо накарда, он гуна ки гуфтем, бояд аз менеҷменти замонавии футбол кор бигиранд.

-Барои суҳбати ошкоро ташаккур!

-Саломат бошед!

 

Фаромӯз БОБОЕВ,

"Хатлон”



Шарҳи хонандагон +

Матолиби дигар:

«Ҳосилот» ва «равшан» ба дастгирӣ ниёз доранд!

«Ҳосилот» ва «равшан» ба дастгирӣ ниёз доранд!

Ҷавонон ва варзиш, ФАРОМӮЗ БОБОЕВ
Талоши «Равшан» барои ҷойи 3-юм

Талоши «Равшан» барои ҷойи 3-юм

Хабарҳо, Ҷавонон ва варзиш, НОСИРҶОН МАЪМУРЗОДА
4 дастаи хатлонӣ дар 1/8 финали Ҷоми Тоҷикистон-2015

4 дастаи хатлонӣ дар 1/8 финали Ҷоми Тоҷикистон-2015

Хабарҳо, Ҷавонон ва варзиш
Тасмими таъсиси лигаи дуюми футболи Тоҷикистон

Тасмими таъсиси лигаи дуюми футболи Тоҷикистон

Хабарҳо, Ҷавонон ва варзиш, НОСИРҶОН МАЪМУРЗОДА
Панҷ. Оё «Саройкамар»-ро дар лигаи олӣ мебинем?

Панҷ. Оё «Саройкамар»-ро дар лигаи олӣ мебинем?

Хабарҳо, Ҷавонон ва варзиш, НОСИРҶОН МАЪМУРЗОДА