Дар як сатр
» » Падари ҷинояткор, ҳуҷраи пурасрор, тифлони хору зор…

Падари ҷинояткор, ҳуҷраи пурасрор, тифлони хору зор…

21-01-2015, 17:47

Падари ҷинояткор, ҳуҷраи пурасрор, тифлони хору зор…



Шаҳло ба духтарчаи 3-солааш, ки аз субҳ инҷониб чизе ба даҳон набурдааст, шир пухтанӣ шуд. Шавҳараш имрӯз барвақттар ба хона омада, саросема дар даромадгоҳ чизеро пинҳон карду ба меҳмонхона гузашта, дар рӯйи кӯрпача дароз кашид. Ӯ ба як нуқтаи ноаён чашм дӯхта, ба андеша фурӯ рафт. Ҳатто инҷиқиҳои духтарчааш, ки аз ғояти гуруснагӣ ҳар чиро баҳона пеш оварда гиря мекард, барои ӯ беаҳамият буданд.

Шокир ним сол мешавад, ки рӯҳану ҷисман тағйир ёфтааст. Қариб ҳар бегоҳ аз берун ланҷу хотирпарешон ба хона медарояд. Иштиҳои хӯрокхӯрӣ надорад. Чашмонаш сурху беҷо, дар ҳаракатҳояш як навъ оромии ғайритабиӣ ба мушоҳида мерасанд. Вақтҳои охир хеле камгап шудаасту аз ҳама чашми гурез меҷӯяд. Аз баданаш бошад, як навъ бӯйи бад меояд ва ин бештар модари хонадонро нигарон мекард. Охир пештар ин хел набуд. Аз ӯ бадгумон шуд, ба назараш мерасид, ки Шокир пинҳон аз дигарон чизе истеъмол мекунад. Аз ин хотир дар набудани шавҳараш хонаро чандин бор тагурӯ кард, вале чизи ғайриоддие пайдо карда натавонист.

Сар рафтани шир, ки дар як лаҳза бӯйи ғализи он хонаро фарогир кард, Шаҳлоро аз банди хаёлот берун сохт.

-Ҳозир, Анисаҷон, каме сабр намо, шир хунук шавад, якҷоя ноништо мекунем, - духтарчаашро ором карданӣ шуд, Шаҳло.

Ҳамин вақт занги дари даромадгоҳ баланд шуд. Дарро шавҳараш кушод. Ба хона чанд тан шахсони ношинос, ки худро кормандони Агентии назорати маводи нашъаовари назди Президенти Ҷумҳурии Тоҷикистон муаррифӣ намуданд ва ду нафар ҳамсояҳо даромаданд. Бо нишон додани ҳуҷҷате кофтукови хона шурӯъ шуд.

Баъди кофтукови тӯлонӣ аз пойафзолмонаки даромадгоҳ як миқдор хокаи сафеди зардчатоб аз дохили қуттии «Нескафе» ва як дарза калидҳои гуногун пайдо шуданд. Аз гуфтугӯи кормандон бо шавҳараш маълум буд, ки онҳо боқимондаи маводи мухаддирро мепурсиданд. Кофтукови дуюмбораи хона Шаҳлоро ба танг оварду ӯ беихтиёр дод зад:

- Нест!.. Нест! Он чиро, ки мекобед, дар хона нест, - гиря гулӯгираш мекард.

-Пас дар куҷост? - пусиданд кормандони Агентӣ.

-Намедонам. – Ӯ ҳар дафъа аз берун масту мадҳуш меояд, - гӯён Шаҳло духтарчаи худро, ки аз ҳузури ин қадар одамони ношинос тарсону гирён шуда буд, ором карданӣ шуда, ба даст бардошт, - дигар Шаҳло мадори сухан гуфтанд надошт, чунки ашк гулугираш карда буд.

-Баред ӯро, баред! Дигар тоқати бо ин гуна мард зиндагӣ кардан надорам. Ҳама ашёи қимматноки хонаро фурӯхт. Вақтҳои охир метарсидам, ки чизеро аз ман пинҳон карда, боз ягон нохушие ба сарамон наорад, - ана, оқибат омад ба сарам аз он чӣ метарсидам…- мегуфт Шаҳлои бадбахт.

Кормандони Агентӣ калидҳои ёфташударо як ба як дар ҳама қулфҳои дари хонаҳо санҷида диданд. Азбаски ду калид ба қулфе рост наомад, лозим омад, ки онҳоро дар дигар ҷой санҷанд. Бо ин мақсад аз ҳама аввал ба таҳхона фаромаданд. Яке аз калидҳо ба қулфи дари умумии панҷарадори таҳхона рост омад. Бо калиди дигар дари яке аз ҳуҷраҳои таҳхона кушода шуд. Ба ҳуҷра аввал саги хизматиро сар доданд. Саги махсусан тайёркардашуда ҳуҷраро давр зада, ба қуттии картонӣ наздик шуда, онро бо пойҳояш харошид. Қуттиро аз назар гузарониданд. Аз дохили он қуттии оҳанине пайдо шуд. Дар сандуқчаи оҳанин ду бастаи селофании пур аз героин ҷойгир будааст. Кормандони Агентӣ маводи мухаддирро мусодира намуда, Шокирро ба ҳабс кашиданд.

Ҳангоми хайрухуш Шокир аз ҳамсараш курткаашро талаб кард. Нигоҳҳо ба ҳам бархӯрданд. Нигоҳи яке маҳзуну дигаре илтиҷоомез. Яке маънои хайрбод дошту дигаре ранҷу алам. Ашк дар чашмони ҳар ду ҳалқа зад. Онҳо акнун дарк карданд, ки лаҳзаи ҷудоӣ фаро расидааст.

Кӣ медонад ин ҷудоӣ чанд сол идома мекунад? Ҳоли чор нафар фарзандони ноболиғ чӣ мешавад? Барои чӣ ин нохушӣ маҳз ба сари онҳо омад? Кӣ сабабгори содир шудани ин ҷиноят гардид?

Ҳамсари Шокир гӯё ки аз хоби ғафлат акнун бедор шуда бошад, якбора доду фиғон бардошта, зораю тавалло мекард, ки шавҳарашро ба ҳеҷ куҷо набаранд.

Кӯдак аз домони модар дошта, сахт гиря мекард. Зане, ки чанд лаҳза пеш аз рафтору кирдори ҳамсараш безор шуда, хоҳиши ба ҷавобгарӣ кашидани ӯро дошт, чун мурғи посӯхта ба кунҷу канори хона даву тоз карда, шири дар дасташ бударо резонда, қариб буд худрову духтарчаашро сӯзонад…

Шуъбаи тафтишотии Агентӣ аз рӯйи ин ҳодиса парвандаи ҷиноӣ оғоз намуда, муайян намуд, ки Раҳимов Шокир зиёда аз як килограмм маводи сахттаъсири героинро дар яке ноҳияҳои наздисарҳадии бо Ҷумҳурии Исломии Афғонистон аз як нафар афғон харидорӣ карда, бо мақсади фурӯши ғайриқонунӣ онро дар таҳхонаи хонаи истиқоматиаш нигоҳ медоштааст.

Шокир чандин доғи судӣ дошт. Аз ҳукмҳои пештара ба худ хулосаи даркорӣ набароварда, даст ба ҷинояти боз ҳам вазнинтар зад. Дар рафти тафтишоти пешакӣ ӯ худро сафед карда, мегуфт, ки ҷойи кор ва маоши муносибе надошт, ки талаботҳои оилаи худро таъмин намояд. Вале наход ин баҳона шуда метавонад ба марди ҷавони солим? Чӣ тавр акнун бо чунин нанг фарзандони ӯ дар назди рафиқони худ сархам нашаванд? Инро фикр накард, Шокир, афсӯс…

Ин дафъа, Суд ҳамаи ҳолатҳои корро ба инобат гирифта, ба Раҳимов Шокир ҷазои муносиб хоҳад дод.

(Бознашр аз сомонаи Агентии назорати маводи нашъаовари назди Президент)


Шарҳи хонандагон +

Матолиби дигар:

Бозгашт ба маҳбас

Бозгашт ба маҳбас

Ҳаёти иҷтимоӣ, Хабарҳо, Ҳуқуқу амният, ҒАЙБУЛЛО ҲАЛИМОВ
Боздошти шаҳрванди ҶИА бо 41 кг маводи мухаддир

Боздошти шаҳрванди ҶИА бо 41 кг маводи мухаддир

Хабарҳо, Ҳуқуқу амният, НОСИРҶОН МАЪМУРЗОДА
Боздошти

Боздошти "Шерчангол" бо силоҳу ним кило афюн

Хабарҳо, Ҳуқуқу амният, НОСИРҶОН МАЪМУРЗОДА
Бӯсаи вопасини падар (Ҳикоя)

Бӯсаи вопасини падар (Ҳикоя)

Фарҳанг ва адабиёт, ЗОКИРҶОН МУРОДОВ

"Модарамро ёд кардам" - мегӯяд момои Ҳуснигул

Ҳаёти иҷтимоӣ, Номаҳои Шумо