Дар як сатр
» » Силсилаи омӯзишҳо барои кормандони миёнаи тиб

Силсилаи омӯзишҳо барои кормандони миёнаи тиб

11-03-2018, 16:03

Аз 29 январ то 3 марти соли 2018 дар шаҳрҳои Душанбе ва Бохтар як силсила тренингҳои омӯзишӣ оид ба омодасозии кормандони миёнаи тиббӣ дар мавзӯи «Вокуниши кормандони соҳаи тандурустӣ ба ҳолатҳои зӯроварӣ дар оила» доир гардиданд.

Тренингҳои мазкур дар асоси фармони Вазорати тандурустӣ ва ҳифзи иҷтимоии аҳолии Ҷумҳурии Тоҷикистон, таҳти №64, аз 25 январи соли 2018 «Дар бораи гузаронидани тренингҳои омӯзишӣ» барои кормандони сатҳи миёнаи тиббии муассисаҳои ҳифзи тандурустии Ҷумҳурии Тоҷикистон ташкил дода шуд.

Барои кормандони миёнаи тиб дар маҷмӯъ 15 тренинг (9 тренинг барои мутахассисони шаҳри Душанбе ва 6 тренинг барои мутахассисони вилояти Хатлон) гузаронида шуд. Қобили зикр аст, ки 300 мутахассис, аз он ҷумла 180 нафар дар шаҳри Душанбе (ҳамшираҳои шафқат –165 нафар; момодоя – 15 нафар; мард – 1 нафар) ва 120 мутахассис (ҳамшираи шафқат - 115; момодоя – 5; мардҳо - 4) дар ноҳияҳои таҷрибавии вилояти Хатлон ба омӯзиш фаро гирифта шуданд.

Тренингҳо барои 280 ҳамшираи шафқат ва 20 момодоя дар Маркази ҷумҳуриявии таълимӣ-клиникии шаҳри Душанбе ва Маркази вилоятии таълимӣ-клиникии тибби оилавӣ дар шаҳри Бохтар гузаронида шуданд.

Ҳадафи асосии тренинг таҳкими зарфияту тавоноии кормандони сатҳи миёнаи тиббӣ ҳангоми кор бо ҷабрдидагони хушунати оилавӣ дар Ҷумҳурии Тоҷикистон унвон гардид. Дар ҷараёни омӯзишҳо ба иштирокчиён аз таҷрибаи беҳтарини байналмилалӣ ва миллӣ оид ба расонидани кумаки саривақтии тиббӣ ба ҷабрдидагони зӯроварӣ дар оила намунаҳо манзур гардид. Барои гузаронидани тренинг модули таълимӣ, ки аз ҷониби коршиноси байналмилалии Лоиҳаи PDV/GOPA таҳия гардида, бо фармоиши Вазорати тандурустӣ ва ҳифзи иҷтимоии аҳолӣ аз 24 январи сол 2018, таҳти № 61 тасдиқ карда шудааст, мавриди корбурд қарор гирифт.

Дар баробари мутахассисон-тренерони маҳаллӣ (онҳо 07-09 августи соли 2017 аз омӯзиш гузашта буданд), бахшҳои алоҳидаи тренингро коршиносону мутахассисони соҳибноми ҷумҳурӣ, ки таҷрибаи бойи кор бо ҷабрдидагони хушунати оилавиро доранд, аз ҷумла равоншинос Юнусова Н.М., Н. Қодиров ва М. Ҳусейнова, юрист-адвокатҳои Маркази буҳронии «Боварӣ ба фардо», инчунин психолог, корманди иҷтимоӣ ва ҳуқуқшиноси Маркази буҳрони «Ғамхорӣ» гузарониданд.

Қобили зикр аст, ки тамоми иштирокчиён ба мавзӯи зӯроварӣ дар оила мароқ зоҳир намуда, дар тренинг фаъолона ширкат варзиданд. Аз ҷониби иштирокдорон - кормандони соҳаи тиб оид ба ҳолатҳои гуногуни хушунат, тарзу усулҳои хизматрасонӣ ё ёрии амалӣ ба ҷабрдидагони зӯроварӣ дар оила саволҳои бешуморе доданд.

Дар ҷараёни омӯзиш маълум гардид, ки аксари иштирокдорон бо қонунгузории ҷорӣ ва санадҳои меъёрию ҳуқуқӣ оид ба ироаи кумак ба ҷабрдидагони зӯроварӣ дар оила ва ҳуқуқи онҳо маълумоти кофӣ надоштаанд. Аз ин рӯ, тренинги номбурда барои беҳтар фаҳмидани масъалаҳои ҳуқуқии вобаста ба ҷабрдидагони зӯроварӣ дар оила ва нақши кормандони соҳаи тиб, ки бо ин қишри ҷомеа кор мекунанд, мусоидат намуд. Ин чорабинӣ боз аз он лиҳоз муҳим аст, ки барои коҳиши тазйиқу дискриминатсияи ҷабрдидагон аз хушунати оилавӣ равона шудааст.

Яке аз мақсадҳои асосии тренинг сайқал додани ҳунари иштирокчиён дар тартиб додани саволҳои муносиб ва дуруст оид ба зӯроварӣ дар оила, инчунин фаҳмонидани аҳамияти расонидани кумаки аввалиндараҷа ба ҷабрдидагони хушанати хонаводагӣ буд. Дар ин бахши омӯзиш ба иштирокчиён махсусиятҳои азназаргузаронӣ ва бақайдгирии тиббии ҷойҳои зарбдидаи бадан ва барои сабт шудани осори ҷароҳатҳо дар доираи экспертизаи судӣ-тиббӣ шарҳу тафсир дода шуд. Инчунин, масъалаҳои профилактикаи норасоии масунияти бадан ва расонидани кумаки оҷилӣ ба гирифторони ин беморӣ, тарзи дуруст тартиб додани санад оид ба ҳолатҳои зӯроварӣ мавриди баррасӣ қарор гирифтанд. 

Дар ҷараёни тренинг тавсияҳои байналмилалӣ, ки бо далелҳо оид ба расонидани кумаки тиббӣ ба ҷабрдидагони зӯроварӣ асоснок гардидаанд, низ муҳокима шуданд.

Таъкид гардид, ки расонидани ёрии психологӣ ба қурбониёни хушунат аҳамияти вижа дорад. Дар доираи омӯзиш дараҷаи дониши иштирокчиён оид ба муайянсозии аломатҳои ҳолати нохуби равонии ҷабрдидаҳо, андешидани чораҳои муассир оид ба кумаки равоншиносӣ ва психотерапевтӣ ба онҳо баланд бардошта шуд.

Иштирокчиёни тренинг барои пешниҳоди маълумоти муфид, варақаҳои иттилоотӣ, дастраснамои санадҳои меъёрӣ-ҳуқуқии вобаста ба масъалаи зӯроварӣ дар оила, шумораи тамоси кормандони масъули Кумитаи кор бо занон ва оила ва ниҳодҳои тобеи он дар маҳалҳо, ташкилотҳои ғайриҳукуматӣ ва марказҳои буҳроние, ки бо ҷабрдидагони зӯроварӣ дар оила кор мекунанд, инчунин телефонҳои нафарони масъули мақомотҳои ҳифзи ҳуқуқ ва ғайра изҳори сипос намуданд.

Таҳлили назарпурсиҳое, ки қабл аз омӯзиш ва баъд аз он гузаронида шудаанд, нишон дод, ки дониши иштирокчиён ба таври назаррас боло рафтааст. Холи миёнаи назарпурсии пешакӣ агар 52%-ро ташкил дода бошад, пас аз анҷоми омӯзиш он ба 90,2% баробар гардид.

Дар охир иштирокчиёни тренингҳо миннатдории худро ба Вазорати тандурустӣ ва ҳифзи иҷтимоии аҳолии Ҷумҳури Тоҷикистон ва Лоиҳаи "Пешгирии зӯроварӣ дар оила дар Ҷумҳурии Тоҷикистон” (PDV/GOPA) барои ташкилу баргузории чунин омӯзишҳои муфиду актуалӣ баён намуда, изҳори омодагӣ карданд, ки донишҳои гирифтаашонро зимни адои фаъолияти хизматӣ дар амал ба кор баранд.

И. Ҳангома,

"Хатлон



Шарҳи хонандагон +

Матолиби дигар:

Пешгирии зӯроварӣ дар оила

Пешгирии зӯроварӣ дар оила

Хабарҳо, Ҳаёти иҷтимоӣ, ФАРОМӮЗ БОБОЕВ
Баҳри пешгирии зӯроварии хонаводагӣ дар оила

Баҳри пешгирии зӯроварии хонаводагӣ дар оила

Хабарҳо, Ҳаёти иҷтимоӣ, ФАРОМӮЗ БОБОЕВ
Ҷайҳун. Пешгирии зӯроварӣ дар оила

Ҷайҳун. Пешгирии зӯроварӣ дар оила

Ҳаёти иҷтимоӣ, Хабарҳо, ҲАНГОМА ПАҲЛАВОНОВА
Ба иҷро даромадани «Барномаи рушди оила дар вилояти Хатлон»

Ба иҷро даромадани «Барномаи рушди оила дар вилояти Хатлон»

Ҳаёти иҷтимоӣ, Хабарҳо, НОСИРҶОН МАЪМУРЗОДА
Шаҳритус. Баҳси пешгирии зӯроварӣ дар оила

Шаҳритус. Баҳси пешгирии зӯроварӣ дар оила

Ҳаёти иҷтимоӣ, Хабарҳо, ҲАНГОМА ПАҲЛАВОНОВА