Дар як сатр
» » Бонуи равшанзамир

Бонуи равшанзамир

10-03-2018, 13:09

«Мо бояд баҳри баланд бардоштани ҳисси худшиносии миллӣ, ифтихори ватандорӣ ва дар рӯҳияи инсонпарварӣ тарбия намудани насли наврас таваҷҷуҳи аввалиндараҷа зоҳир намоем».

 Эмомалӣ Раҳмон
 

Муаррифинома

Сатторова Зебуннисо Мансуровна овони наврасиашро дар шаҳри Бохтар (собиқ Қӯрғонтеппа)  гузаронида, мактаби миёнаро дар ҳамин ҷо хатм намудааст.

Соли 1971 ба факултаи таърихи Донишгоҳи миллии Тоҷикистон дохил шуда, соли 1975 онро ба итмом расонид. Аз соли 1976 дар ноҳияи Ҷайҳун аввал ба ҳайси омӯзгор, баъд директори мактаб шуда кор кард. Солҳои 1980 - 1992 дар ДДҚ ба номи Н. Хусрав фаъолият намуда, солҳои 1993- 96 муовини раиси шаҳри Бохтар ва то соли 2000-ум мудири шуъбаи маориф шуда кор кард.

Айни ҳол дотсенти кафедраи таърих ва ҳуқуқи ДДҚ ба номи Н. Хусрав мебошад.

Номзади илмҳои таърих, дорандаи медали «Хизмати шоиста». Оиладор, соҳиби 4 фарзанд.

Асосгузори сулҳу ваҳдати миллӣ - Пешвои миллат муҳтарам Эмомалӣ Раҳмон ҳамасола дар Паёмашон ба Маҷлиси Олии кишвар бо ифтихор таъкид месозанд, ки нақш ва мақому манзалати зан - модар дар рушди ҷомеаи башарӣ ниҳоят арзишманд аст, чунки имрӯз бонуи тоҷик на танҳо сарвари кордону муҳаққиқи донишманд, балки тарбиятгару омӯзгори меҳрубон аст.

Мо тасмим гирифтем дар бораи яке аз чеҳраҳои шинохта, бонуи равшанзамир ва модари дилсӯзу меҳрубон, олимаи маорифпарвар Сатторова Зебуннисо қисса намоем.

Зебуннисо худ зодаи шаҳри Бохтар буда, ҳанӯз аз овони мактабхонӣ дар дил орзу мепарварид, ки омӯзгор шавад. Касби интихобкардаи  ӯро падар, ки аз аҳли уламо буд, чандон напазируфт, балки мехост, ки нахустфарзандаш дар мадраса таълим гирифта бибиотун шавад. Зебуннисо бо ифтихор мегӯяд, ки падараш инсони дилсӯзу меҳрубон буд ва орзу дошт, ки духтараш дар зиндагӣ роҳи дурустро пеша намояд, ки то муҳтоҷу вобастаи атрофиён нагардад. Аз ин рӯ, Зебуннисои ҷавон ҳам дарси ниёгон меомӯхт ва ҳам дар мактаб аълохон буд. Пас аз хатми мактаб волидайн ӯро ба Маҳмадамин ном ҷавоне, ки донишҷӯи макотиби олӣ буд, ба шавҳар доданд. Аммо то ҳанӯз ӯ дар ақидааш устувор буд ва дилаш аз он гувоҳӣ медод, ки соҳибмаълумот мегардад. Хушбахтона, шавҳари ҷавонаш розигӣ дод, ки ҳуҷҷатҳояшро ба донишгоҳ супорад. Акнун ҳарду дар факултаи таърих таҳсил менамуданд. Зебуннисо соли 1976 Донишгоҳи миллии Тоҷикистонро хатм намуд. Ӯ ки дар дил завқӣ омӯхтани илми таъриху кишваршиносиро дошт ва чанде пас аз омӯзгориаш ба Аспирантура дохил шуда, соли 1983 рисолаи номзадиашро ҳимоя намуд.

Зебуннисои олима шабу рӯз пайваста меомӯхт ва асару мақолаҳои илмиаш рӯйи чоп меомаданд. Китоби таълифнамудаи ӯ, ки «Хоксорӣ ибрати бузурги тарбиявист» ном дорад, бевосита ба масъалаҳои нақши волидайн дар таълиму тарбияи фарзанд нигаронида шудааст. Қобили зикр аст, ки дар солҳои вазнини ҷанги шаҳрвандӣ ӯ баҳри баҳамоии мардуми гумроҳзада ва дӯстию рафоқати ҳамаи миллату халқиятҳои дар Тоҷикистон сукунатдошта саъю талош менамуд. Маҳз қобилияти ташкилотчигию кордониш ин зани оқилаю фарҳангдӯстро ба инобат гирифта, соли 1993 ӯро ба вазифаи муовини раиси шаҳри Бохтар таъин намуданд. Зиёда аз се сол дар ин вазифаи пурмасъулият пурсамар намуд. Сипас, ба кори маориф гузашт ва то  то соли 2000-ум ҳамчун мудири шӯъбаи маорифи шаҳри Бохтар ифои вазифа намуда, дар тарбия намудани омӯзгорони ҷавон ва дар рӯҳияи худшиносии миллӣ, зиракии сиёсӣ ба камол расонидани ҷавонону наврасон ҳиссаи худро гузошт.

Боиси ифтихор аст, ки ин бонуи маорифпарвар дар ин солҳо ҳамчун вакили мардумии Маҷлиси намояндагони шаҳри Қӯрғонтеппа ва вилояти Хатлон баҳри ободии диёри худ саҳм гузоштааст.

Зебуннисо Мансуровна лаҳза-ҳои фараҳбахшу хушбахтарини умри худро ба ёд оварда мегӯяд: "Соли 2011 дар арафаи 20 солагии Истиқлолияти давлатии Ҷумҳурии Тоҷикистон Асосгузори сулҳу ваҳдати миллӣ – Пешвои миллат муҳтарам Эмомалӣ Раҳмон дар рӯзҳои сафарҳои хизматии худ ба вилояти Хатлон шахсан маро дар қатори як зумра пешсафон бо мукофоти давлатӣ, медали «Хизмати шоиста» қадрдонӣ намуданд, ки дар ҳаёти худ воқеиёти нотакрору хушбахтарин меҳисобам”.

Дар ҳақиқат саҳифаҳои рӯзгори ин зани оқилаю равшанзамир пур аз меҳру садоқати бепоён ба ватан ва халқу миллати тоҷдори хеш буда, худ нурбахши қалбҳо ва неруи пешбарандаи ҷомеаи навини мо мебошад.

Ҳарчанд синни муаллимаи таърихшинос ба ҷое расида бошад ҳам, вале қалби ӯ ҷавон аст ва меҳри омӯзгорӣ ва садоқати бепоёни шогирдонаш намегузорад, ки вай дур аз боргоҳи илму маърифат бошад.

Олимаи шинохта ва модари мушфиқу меҳрубон Зебуннисо Сатторова ҳоло ба ҳайси дотсенти кафедраи таърих ва ҳуқуқи ДДҚ ба номи Носири Хусрав  фаъолият дорад ва дар дилу дидаи шогирдонаш ҳамеша завқи омӯзиши таърихи тамаддунофари кишвари азизи худро бедор месозад. Бузургон фармудаанд:

Агар дар ҷаҳон набвад омӯзгор,

Шавад тира аз бехирад рӯзгор.

Шиори ин зани оқилаю равшанзамир дар кору зиндагӣ хизмати софдилона ва беғаразона намудан ба ватану халқи азизи худ, баҳри шукуфоии кишвари биҳиштосои Тоҷикистони соҳибистиқлол мебошад.

 

Музаффар Муродов,

бойгоншиноси дастгоҳи

раиси вилояти Хатлон




Шарҳи хонандагон +

Матолиби дигар:

ЗАНОН-БУНЁДСОЗИ ҶОМЕА

ЗАНОН-БУНЁДСОЗИ ҶОМЕА

Ҳаёти иҷтимоӣ, НАҶОТ САФАРЗОДА
Тасдиқи рамзи «соли рушди  Сайёҳӣ ва ҳунарҳои мардумӣ»

Тасдиқи рамзи «соли рушди Сайёҳӣ ва ҳунарҳои мардумӣ»

ҲУНАРҲОИ МАРДУМӢ, Ҳаёти иҷтимоӣ
Симои ҷовидона

Симои ҷовидона

Чеҳранигорӣ
Рисолати омӯзгор

Рисолати омӯзгор

Маориф ва илм
Махфират Хидирзода муовини раиси вилояти Хатлон таъин шуд

Махфират Хидирзода муовини раиси вилояти Хатлон таъин шуд

Сиёсат, Хабарҳо, НОСИРҶОН МАЪМУРЗОДА