Дар як сатр
» » Бо меҳнати аҳлона мушкилоти ҷомеаро бартараф созем

Бо меҳнати аҳлона мушкилоти ҷомеаро бартараф созем

4-02-2018, 12:11

Давлатшоҳ Гулмаҳмадзода:

 Бо меҳнати аҳлона мушкилоти ҷомеаро бартараф созем

Шанбеи гузашта раиси вилоят, узви Маҷлиси миллии Маҷлиси Олии Ҷумҳурии Тоҷикистон Давлатшоҳ Гулмаҳмадзода, дар шаҳри Сарбанд қабули шаҳрвандонро ба роҳ монд.

Роҳбари вилоят, сараввал, сокинони шаҳрро доир ба рӯйдоди фараҳбахш - тағйири номи шаҳри Сарбанд ба Леваканд табрик гуфта, иброз дошт, ки Леваканд номи таърихии ниёкон буда, боиси ифтихори шаҳрвандон мебошад. Роҳбари вилоят қабл аз оғози шунидани арзу шикояти шаҳрвандон, иброз дошт, ки ҳадафи мулоқоти имрӯза дар баробари шунидани арзу ниёзи шаҳрвандон ҳамчунин баррасии дастуру супоришҳои Президенти Ҷумҳурии Тоҷикистон дар Паёмашон ба Маҷлиси Олии ҷумҳурӣ ва таҳлили бурду бохти соли 2017 ва масъалагузориҳо, нақшаву ниятҳо барои соли 2018 мебошад.

Нахуст Фирӯза Бедилова, омӯзгори муассисаи таҳсилоти миёнаи умумии №1-и шаҳри Сарбанд оид ба масъалаи мусоидат намудан барои пахши барномаҳои телевизиони вилояти Хатлон дар шаҳри Сарбанд арзи матлаб намуд. Тавре ки баён гардид, дар қаламрави шаҳри Сарбанд шаҳрвандон аз тамошои барномаҳои телевизиони вилояти Хатлон бархӯрдор нестанд. Доир ба ҳалли масъалаи мазкур раиси Кумитаи телевизион ва радиои вилояти Хатлон Ҳамро Салимов изҳори андеша намуда, ёдовар гардид, ки дар сурати ҳамкории тарафайн ва дастгирии мақомоти иҷроияи ҳокимиятҳои маҳаллии шаҳру ноҳияҳо масъалаи мазкур ҳалли хешро меёбад ва сокинони шаҳри Сарбанд аз тамошои барномаҳои телевизиони вилояти Хатлон бархӯрдор мешаванд. Сипас, Раҷабалӣ Изатуллоев, сокини деҳаи Табақчии Ҷамоати деҳоти "Ваҳдат” доир ба мусоидат намудан барои пешгирии ҷамъшавии обҳои зери пули роҳи оҳани даромадгоҳи шаҳри Сарбанд арзи матлаб намуд. Тавре номбурда иброз дошт, ҳинни обёрии заминҳои атроф оби зеризаминӣ баланд шуда, ба равуойи техникаву нақлиёти мусофирбар халал ворид месозад. Сари масъалаи мазкур низ роҳбари вилоят ба масъулини соҳаҳои дахлдор дастуру супоришҳои мушаххас дод.

Миралӣ Тиллоев, роҳбари хоҷагии деҳқонии "Бӯстон-2013”, оид ба тамдид намудани муҳлати истифодаи барқ барои пойгоҳҳои обкашӣ то 1 ноябр бо нархи мавсимӣ арзи матлаб намуд. Нархи мавсимии барқ барои пойгоҳҳои обкашӣ 9,3 сомонӣ буда, аз 1 октябр беш аз 16, 6 сомониро дарбар мегирад. Сари масъалаи мазкур низ роҳбари вилоят андеша ронда, ба масъулин бобати бартараф намудани мушкилоти ҷойдошта супоришҳои дахлдор дод.

Абдуназар Ҳусейнов, собиқ корманди корхонаи "Тоҷик - Азот”, бобати мусоидат намудан барои пардохти нафақаи кормандони ҶСК "Азот” арзи дил намуд. Тавре ки равшан гардид, ба 35 нафар нафақахӯрон аз 1 апрели соли 2016 ба мабалғи 236 ҳазору 800 сомонӣ нафақаи имтиёзнок пардохт нагардидааст. Равшан гардид, ки муддати мадиде корхонаи "Тоҷик -Азот фаъолият надошт ва ин масоил низ ҳалли худро пайдо накарда буд.

Мисоқов Хайрулло, роҳбари ҶДММ "Имкон” оид ба барқарор намудани роҳи корхонаи мазкур дар миқёси фурудгоҳи Қӯрғонтеппа арзи матлаб намуд. Бинобар сабаби таъмиру таҷдид ва васеъ намудани фурудгоҳи Қӯрғонтеппа роҳи ҶДММ "Имкон” ва аҳолӣ, ки дар ҳудуди марзиву маъмурии шаҳри Сарбанд ва ноҳияи Бохтар қарор дорад баста шудааст. Ҳамчунин, Абдукарим Мусофиров, роҳбари хоҷагии деҳқонии "Муҳаммадҷон”, бобати мустаҳкам намудани канали СМК ва саривақт истифода намудани хоҷагидорон аз об арз намуд. Тавре ки равшан гардид, аз канали мазкур хоҷагиҳои ноҳияҳои Бохтар ва Вахш низ истифода мебаранд. Агар канали мазкур саривақт таъмиру тармим ва мустаҳкам гардад, барои деҳқонон шароити хуби обёрии саривақтӣ даст медиҳад.

Ҳамин тавр, варзишгар Умедҷон Муҳиддинов, иштирокчиии чемпионати ҷаҳон андешаҳои хешро нисбати дастгирии Ҳукумати ҷумҳу-рӣ, вилоят ва шаҳри Сарбанд баён дошта аз ин ғамхориҳо изҳори сипос намуд. Барно Шамсова сокини Ҷамоати деҳоти "Гулистон” зимни суханронӣ таъкид дошт, ки дар шаҳри Сарбанд маркази касбомӯзии атласу адрасбофии "Шоҳзамон” бо дастгирии бевоситаи Президенти мамлакат фаъолият дорад. Тибқи гранти Президенти мамлакат маркази мазкур таъсис ёфтааст ва даҳҳо нафар духтарону занонро соҳиби касб ва ҷойи корӣ гардонидааст. Имрӯз маҳсулоти истеҳсолнамудаи дастомӯзони ин марказ пешкаши ҳаводорон гардидааст. Барои дастгирии беназираш аз Роҳбари давлат ва эълон гардидани соли 2018 ҳамчун Соли рушди сайёҳӣ ва ҳунарҳои миллӣ Барно Шамсова аз роҳбарияти мамлакат Эмомалӣ Раҳмон изҳори сипос намуд.

Пас аз шунидани арзу матлаби сокинони шаҳри Сарбанд раиси вилоят Давлатшоҳ Гулмаҳмадзода оид ба фаъолияти соҳаҳои хоҷагии халқи шаҳри Сарбанд изҳори назар намуда, бобати камбудиҳои ҷойдошта аз масъулини соҳаҳои марбута ва раиси шаҳр Санавбар Самизода пурсиш ба амал оварда, баҳри ҳаллу фасли камбудиҳои ҷойдошта дас-туру супоришҳои мушаххас дод. Сипас, Давлатшоҳ Гулмаҳмадзода доир ба Паёми Роҳбари давлат ба Маҷлиси Олӣ, ки сиёсати дохиливу хориҷӣ ва дастовардҳои иҷтимоиву иқтисодиро дарбар мегирад, андешаронӣ намуд. Номбурда таъкид дошт, ки агар соли пешин Паёми Роҳбари давлат аз таҳлили иқтисодиву иҷтимоӣ оғоз ёфта бошад, пас Паёми навбатӣ доир ба вазъи сиёсиву иқтисодӣ ва амнияти ҷа-ҳон оғоз гардидааст. Роҳбари давлат зимни суханронӣ нисбати раванди бартариҷӯйӣ, мусаллаҳшавии бошитоб, пайдоиши нишонаҳои марҳалаи нави ҷанги "сард” изҳори нигаронӣ намуд. Вазъи сиёсии ҷаҳон нишон дод, ки соли ҷорӣ дар гӯшаҳои гуногуни олам нооромиву низоъҳо идома ёфта, барои ҷомеаи ҷаҳонӣ ҳамчун аёми душвору пуртазод эътироф гардидааст. Дар ин давра зиёда аз 100 давлати дунё мавриди ҳамлаҳои ғайриинсонии террористон ва ифротгароён қарор ёфтааст. Тавре ки роҳбари вилоят таъкид дошт, ҷуғрофияи нооромиҳо торафт доман паҳн намуда, таҳлилу хатарҳои глобалӣ имрӯз ба асосҳои бунёдиву тартибу низоми ҷаҳонӣ ва усулҳои муносибати байналмилалӣ таъсир гузошта истодаанд. Идомаи минбаъдаи ин ҳолат метавонад боиси таҳдиду хатарҳои сиёсиву иқтисодӣ, амниятӣ ва башарию фарҳангӣ дар минтақаҳои гуногуни олам гардад. Тавре ки раиси вилоят иброз дошт, дар ин раванд бештар ба ҷомеаи ҷаҳон ва минтақа, сохторҳои байналмилалӣ ва минтақавӣ ба роҳ мондани ҳамкориҳои фарогир афзалияти махсус дорад.

Ҳамчунин, Давлатшоҳ Гулмаҳмадзода таъкид дошт, дар Паёми Роҳбари давлат масъалаҳои мазкур дар мадди аввал гузошта шудааст. Аз ин рӯ, бо мақсади таъмини амнияти устувор ҷиҳати пешгирӣ аз хатарҳои афзояндаи терроризму ифротгароӣ ва дигар таҳдидҳои замони муосир Ҷумҳурии Тоҷикистон омода аст, ки ҳамкориҳои густурдаро бо созмонҳои байналмилаливу минтақавӣ ва кишварҳои шарик тақвият бахшад. Давлатшоҳ Гулмаҳмадзода доир ба дигар самтҳои Паёми Роҳбари давлат бобати дастовардҳои иқтисодиву иҷтимоӣ низ изҳори андеша намуда, таъкид дошт, ки соли ҷорӣ нишондиҳандаҳои макроиқтисодии кишвар дар сатҳи устувор нигоҳ доштани суръати рушди воқеии иқтисодиёт ва ҳаҷми маҷмӯи дохилӣ ба 60 млрд сомонӣ баробар гардид. Тибқи дурнамо дар се соли минбаъда ҳаҷми маҷмӯи маҳсулоти дохилӣ зиёда аз 30% афзоиш ёфта, то ба 82 млрд сомонӣ расонида мешавад. Дар соли 2017 маҷмӯи маҳсулоти дохилӣ ба ҳар нафар аҳолӣ нисбат ба соли гузашта 12% ва дар муқоиса бо нишондиҳандаи пешбинишудаи барномавӣ 8% зиёд гардида, даромади пулии аҳолӣ 10 фисад афзоиш ёфт.

Гарчанде ки дар 11 моҳи соли 2017 содирот нисбат ба ҳамин давраи соли гузашта 35,4 фоиз афзоиш ёфтааст, воридот низ 10% кам гардид. Чуноне ки Давлатшоҳ Гулмаҳмадзода зимни суханронӣ таъкид дошт, дар 5 соли охир маблағгузории соҳаҳои маориф аз буҷети- давлатӣ 2,3 баробар ва тандурустӣ 2,1 баробар зиёд шуда, нисбати соли пешин 16 - 25% афзоиш ёфтааст.

Чуноне ки узви Маҷлиси миллии Маҷлиси Олии Ҷумҳурии Тоҷикистон Давлатшоҳ Гулмаҳмадзода зикр намуд соли 2017 дар миқёси ҷумҳурӣ 150 корхонаи саноатӣ бо таъсиси 3000 ҷойи корӣ мавриди истифода қарор гирифт. Дар ин давра истеҳсоли риштаи пахтагин наздики 3 баробар, қолину маҳсулоти он 1,6 баробар ва газворҳо 42 % афзуд. Бобати истеҳсоли неруи барқ, ки "Тоҷикистон дар арсаи байналмилалӣ яке аз кишварҳои тадбиқкунандаи "иқтисодиёти сабз” маҳсуб меёбад, ибрози андеша намуда, Давлатшоҳ Гулмаҳмадзода таъкид дошт, ки лоиҳаи таҷдиди неругоҳи барқи обии Норак дар ду марҳала бо ҷалби 6 млрд сомонӣ пешбинӣ шуда, марҳалаи аввали он оғоз ёфтааст. Ҳамчунин, дар самти татбиқи лоиҳаи таҷдиди неругоҳи барқи обии "Сарбанд” бо маблағи 1,1 млрд сомонӣ корҳо оғоз ёфта агрегати он соли равон ба кор андохта мешавад.

Ҳамин тавр, раиси вилоят доир ба эълон гардидани Соли 2018 соли Рушди сайёҳӣ ва ҳунарҳои мардумӣ андешаҳояшро баён намуда, таъкид дошт, ки масъулину сокинони шаҳри Сарбандро зарур аст, корҳои бунёдкориву ободгароиро хуб ба роҳ монда, барои ҷалби бештари сайёҳон тадбирҳо андешанд. Зеро рушди сайёҳӣ ва эҳёи ҳунарҳои мардумӣ имкон фароҳам меовард, ки корхонаҳои хурду миёна бунёд гардаду ҳазорҳо ҷойҳои нави корӣ бунёд ёбад ва муҳим аз ҳама бо маҳсулоти аълосифати худӣ муаррифгари ватани аҷдодии хеш бошем. Раиси вилоят бори дигар масъулини шаҳри Сарбандро баҳри ислоҳи камбудиҳои ҷойдошта ва дар амал татбиқ гардидани нишондодҳои Роҳбари давлат, Асосгузори сулҳу ваҳдати миллӣ - Пешвои миллат Эмомалӣ Раҳмон дар Паёми навбатиашон ба Маҷлиси Олӣ супоришҳои мушаххас дод.

ВАХШОНА,

"Хатлон”




Шарҳи хонандагон +

Матолиби дигар:

Раиси вилоят: «Ба арзу дархости мардум таваҷҷуҳи бештар мебояд»

Раиси вилоят: «Ба арзу дархости мардум таваҷҷуҳи бештар мебояд»

Хабарҳо, Ҳаёти иҷтимоӣ, АСАЛМО САФАРОВА
Мулоқоти Раиси вилоят бо сокинони ноҳияи Ёвон

Мулоқоти Раиси вилоят бо сокинони ноҳияи Ёвон

Хабарҳо, Ҳокимияти давлатӣ, АСАЛМО САФАРОВА
Қабули шаҳрвандон дар ноҳияи Панҷ

Қабули шаҳрвандон дар ноҳияи Панҷ

Хабарҳо, Ҳокимияти давлатӣ, Ҳаёти иҷтимоӣ, АСАЛМО САФАРОВА
Д. Гулмаҳмадзода: “Қарздиҳӣ аз ҷониби бонкҳо коҳиш ёфтааст”

Д. Гулмаҳмадзода: “Қарздиҳӣ аз ҷониби бонкҳо коҳиш ёфтааст”

Хабарҳо, Ҳокимияти давлатӣ, Ҳаёти иҷтимоӣ
Д. Гулмаҳмадзода: «Бо ҷалби соҳибкорон корхонаҳои саноатӣ бунёд намуда, ҷой ...

Д. Гулмаҳмадзода: «Бо ҷалби соҳибкорон корхонаҳои саноатӣ бунёд намуда, ҷой ...

Хабарҳо, Ҳокимияти давлатӣ, АСАЛМО САФАРОВА