Дар як сатр
» » Нигоҳе ба таърихи ташаккули театри Қўрғонтеппа

Нигоҳе ба таърихи ташаккули театри Қўрғонтеппа

7-11-2017, 10:42

Нигоҳе ба таърихи ташаккули театри Қўрғонтеппа


Театри вилоятии мусиқӣ-мазҳакавии шаҳри Қўрғонтеппа таърихи беш аз 70-сола дорад. Ин театр соли 1946 дар маркази вилоят дар заминаи театри халқии он солҳо амалкунанда таъсис ёфтааст. Баъди барҳам хўрдани вилоят (соли 1947) то соли 1951 фаъолият карда, минбаъд боз ба театри халқӣ табдил дода мешавад.

Он солҳо дар театр намоишномаҳои «Тоҳир ва Зуҳро», «Найрангҳои Майсара», «Арўси панҷсўма» ва ғайра таҳия шуда, ҳунарпешаҳои машҳури ҷумҳурӣ Хайрӣ Назарова, Бегимсултон Алифбекова ва дигарон ҳунарнамоӣ мекардаанд. Баъди ташкил гардидани вилояти Қўрғонтеппа соли 1979 бо Қарори Ҳукумати Тоҷикистон дар заминаи театри халқӣ Театри давлатии мусиқӣ-мазҳакавӣ ташкил карда шуд, ки баъдтар ба тобеияти вилоят гузашт.

Баъди театри касбиро эҳё намудан мутахассиси театр Мурод Қурбоновро чун коргардон ба театри касбии шаҳри Қўрғонтеппа фиристоданд. Маҳмадалӣ Раҳматуллоев чун роҳбари мусиқӣ, А.Юлдошев чун устоди рақс, Эргаш Самадов чун ҳунарпешаи маълумоти олидор ба театр омаданд. Бо тавсияи кумитаи ҳизбию комиҷроияи вилоят, Шокир Сафаров роҳбари театр таъин гардид. Ҳарчанд ҳайати эҷодии театрро ҳаваскорон ташкил менамуданд, аммо дар кору фаъолияти театр ба таври касбӣ тағйиротҳо дароварданӣ мешуданд, чунки театр акнун театри касбӣ буд.

Нависанда Зариф Ибод дар китоби худ «Кохи хунинин Вахшон» навиштааст, ки дар солҳои 80-ум ҳаваскорон аз театри халқӣ ба театри касбӣ гузаронида ва тамомкунандагони омўзишгоҳи маданӣ-равшаннамоии ноҳияи Ленин (имрўза Рўдакӣ) саркаширо намедонистанд, ҷонкоҳона кор мекарданд. «Ёд дорам, ки Мурод Қурбонов бо онҳо дар саҳни театри тобистонаи шаҳр ё клуби заводи пахта (Рўзҳое, ки дар бинои театр таъмиру тармим мерафт) кор мекарданд. Онҳо аз корфармоии шабонарўзии коргардон гоҳо ба ҷон меомаданд, аммо бе розигии ў корро тарк намекарданд. Як-ду ҳафтаи пеш аз супоридани намоишнома шабро дар театр рўз мекарданд», - менависад З. Ибод.

Аз соли 1990 вазъияти сиёсӣ, иҷтимоӣ ва иқтисодӣ бад шудан гирифт ва дар тамоми минтақаҳои Тоҷикистон нооромиву бетартибиҳо ба амал омад. Бо вуҷуди ин коллективи эҷодии театр аз фаъолият намонду кори худро ба таври бояду шояд давом дод. Дигар аз шаҳри Душанбе коргардонҳо ба шаҳри Қўрғонтеппа барои таҳияи намоишнома намеомадагӣ шуданд.

Соли 1989 ҳайати эҷодӣ ҳунарпешаи болаёқат Бурҳониддин Раҷабовро бо роҳи демократӣ роҳбари бадеии театр интихоб намуда буданд. Ў лаҷоми кори эҷодиро дар театр ба даст мегирад. Б. Раҷабов то ин вақт борҳо ёвари коргардонҳо буд, вале мустақилона асареро рўи саҳна наоварда буд. Вай нахустин намоишномаи худро аз рўйи асари «Фариштаҳо»-и Сиёвуш ба рўи саҳна овард. Ба намоишнома бастакор Қ. Яҳёев оҳанг навишт ва рассом Х.Давлатов саҳнаро оро дод. Асар мавзўи маданияти одами ҳозиразамонро дар бар мегирифт. Ин намоишнома дар озмунҳои касбӣ, аз ҷумла “Парасту” сазовори ҷоизаҳо гардид.

Қобили зикр аст, ки аз соли 1979, ки театри касбӣ дар маркази Вахшонзамин аз нав эҳё гардонида шуд, ҳар сол мувофиқи нақшаи пешакии тартибдодашуда аз 3 то 5 намоишнома рўйи саҳна оварда мешуд. Бояд гуфт, ки солҳои ҷанги шаҳрвандӣ ба ин реҷа як дараҷа халал ҳам расонид. Ба ҳар ҳол, аз он сол то соли 2017 аз рўйи асарҳои муаллифони тоҷик ва дигар халқҳо зиёда аз 120 намоишнома рўйи саҳна оварда шуда, пешкаши тамошобинон гардид.

Дар саҳифаҳои таърихи муосири театр исми Ҳунарпешаҳои мардумии Тоҷикистон Аловуддин Абдуллоев (роҳбари кунунии театр), Бурҳониддин Раҷабов (сардори Раёсати фарҳанги вилояти Хатлон), Меҳриннисо Ҳоҷибоева, ҳунармандони маъруф Азимов Акамат, Аюбов Маҳмадалӣ, Ашўров Маҳмадризо, Давлатов Хайрулло, Маликова Бибимо, Муқимов Давлатҷон, Савзов Сайдалӣ, Сангимуродов Холмирзо, Саидов Отахон, Сатторқулов Хоҷамқул, Шарипов Муҳаммад, Шомуддинов Муҳаммад, Қуганов Талабшо ва ғайраҳо ҳамчун номбардорони театри мазкур сабт шудааст.

Бояд гуфт, ки бахшида ба 25-солагии Истиқлолияти кишвар аҳли эҷоди Театри вилоятии мусиқӣ-мазҳакавии ба номи Ато Муҳаммадҷонови шаҳри Қўрғонтеппа ба бинои нави барҳаво кўчиданд. Асосгузори сулҳу ваҳдати миллӣ - Пешвои миллат дар ҷараёни сафарашон дар шаҳри Қўрғонтеппа дар маросими ифтитоҳи ин бинои хуштарҳ иштирок намуда, онро бо як ҷаҳон умед ба дасти ҳунарпешаҳо супурданд, то дар оянда беҳтарин намоишномаҳоро пешкаши тамошобинони хатлонӣ гардонанд.

Дар арафаи Рўзи театри тоҷик, ки ҳар сол 7 ноябр таҷлил мегардад, мо ба ҳунармандони ин даргоҳ илҳоми бесарҳади эҷодӣ таманно дорем.

Ҳангомаи ИСМАТ,
“Хатлон”


Шарҳи хонандагон +

Матолиби дигар:

Театр. «Духтари бебисот» пешниҳоди кормандони милитсия шуд

Театр. «Духтари бебисот» пешниҳоди кормандони милитсия шуд

Хабарҳо, Фарҳанг ва адабиёт, ФАРОМӮЗ БОБОЕВ
Иштироки театр-студияи «Лӯхтак»-и Қӯрғонтеппа дар ҷашнвораи байналмилалӣ

Иштироки театр-студияи «Лӯхтак»-и Қӯрғонтеппа дар ҷашнвораи байналмилалӣ

Хабарҳо, Фарҳанг ва адабиёт, ҲАНГОМА ПАҲЛАВОНОВА
Даромади театр – 81500 сомонӣ

Даромади театр – 81500 сомонӣ

Хабарҳо, Ҷавонон ва варзиш
Сафари ҳунарӣ ба водии Рашт

Сафари ҳунарӣ ба водии Рашт

Фарҳанг ва адабиёт, Хабарҳо, ҲАНГОМА ПАҲЛАВОНОВА
Театри Кӯлоб соҳибҷоиза шуд

Театри Кӯлоб соҳибҷоиза шуд

Фарҳанг ва адабиёт, Хабарҳо